阿一海景飯店 (已結業)

星期日比阿媽叫醒，話好耐無一家四口去飲茶，又話啲朋友有好介紹，唯有做下乖女應酬下佢啦！到左餐廳門口先知，原來阿媽講緊既係「阿一」，咁唔洗佢朋友介紹都知係好啦！呢度環境真係無得輸，搞到我本來勁眼訓都即時精神為之一振，真係居高臨下又開揚，喺度食嘢完全係享受！睇睇餐牌，當然比普通酒樓貴少少，但服務加埋環境都抵返，阿哥仲出到聲話呢餐佢請，阿爸阿媽即刻瘋狂點菜，我當然都唔執輸。無耐食物陸續上枱，大家都勁鍾意個焗菠蘿叉燒餐包，點左兩客。個包外脆內軟，入面D叉燒夠熱又甜，醃料比例岩岩好，講真一個人鯨吞一碟都完全無難度！老豆同阿哥都好buy個燒鵝，又係既，肉食男最緊要啖啖肉，呢份燒鵝皮脆肉滑，燒得好香口，人人爭住食。燒賣皇一人一粒唔洗爭，大大粒熱辣辣好美味，又夠鮮，確實同出面食開既有d分別喎！蝦餃望落晶瑩剔透，蝦肉豐富同食得出鮮味，忍唔住encore多一籠。阿媽最鍾意呢個鮑汁配鵝掌，佢話平時屋企整唔到咁入味，咁梗係啦，一分錢一分貨嘛！最後歎左個香滑芝麻糊，咁就坐左接近兩個鐘，真係唔捨得走。