Y Dining (已結業)

其實阿叔一直都好怕去旺角食飯，一嚟太多選擇唔知食乜好，二嚟就係至怕多人，今次同朋友嚟嘅呢間上樓西餐廳就「啱晒阿叔河車」，佢位於旺角同太子中間嘅一棟商業大廈樓上，呢度裝修雅緻，燈光暗暗地，甚有情調。佢哋主打精緻西餐，價錢以呢區嚟講屬中上價，晚餐由$398起包沙律、西湯、主菜、甜品同咖啡或茶，如果鍾意飲番一兩杯嘅人更可選擇餐廳自家製、好IGable嘅cocktail添！茴香燒春雞 ($398)意大利春雞原隻上，遠遠已經聞到好香燒雞味，雞肉用上秘製香料調味，夠惹味，而且肉質幼嫩，如果可以做到皮脆就更好喇！鬆脆帶骨豬排 ($418)經過慢煮嘅豬鞍扒，肉質軟稔，食嘅時候建議沾埋青蘋果醬，酸酸甜甜嘅味度會更好食。燴羊膝配玉米糕 ($438)羊膝嘅份量都幾大，肉質軟嫩，一啲都無羊羶味。配菜捨棄一般西餐嘅薯蓉改以玉米糕，啖啖嘅粟米味，又幾香幾好食喎！時令鮮魚 (時價)新鮮活魚經煎香後原條上，愛魚人士想食最好先打嚟餐廳詢問，因為活魚絕對每日限量供應，而且種類有機會日日唔同添！