蘭桂坊高級、靚裝嘅西餐廳多的是，求其搵一間都唔會太差。就好似呢間位於加洲大廈嘅意式餐廳，店內採用歐洲歌劇院設計風格，華麗有氣派之餘，仲有個小小嘅天台俾大家呼吸外，仲可以飽覽埋中環夜景添。 🐙Polpo & Caviale ($388) 配上奥西特拉鱘魚子醬嘅烤八爪魚，肉質軟腍，阿叔鍾意連埋車厘茄一齊食，鹹鮮味又食到點點酸味，唔會過濃。 🦞Linguine all‘Astice ($698) 龍蝦開邊原隻上，肉質結實彈牙，仲有唔少蝦膏添！扁意粉配上蕃茄醬汁煮成，份量認真唔少，夠晒兩個人有多。美中不足係阿叔略嫌佢賣相唔夠精緻，如果擺盤再靚啲就正晒喇！ 🐑Scottadito d’Agnello ($488) 羊架面頭加上香草一齊燒，可配意大利青醬或者酸忌廉一齊食。5大件嘅份量係唔少，不過可惜香草味太強，完全蓋過咗羊騷味。 🍰Tiramisu ($98) 經典提拉米蘇味道甜中帶苦，口感軟滑，今次以高杯裝示人，絕對係全晚賣相最吸睛嘅一道菜！

晚市再訪呢間位於銅鑼灣嘅上樓日式料理店，只因佢哋嘅晚市廚師發辦CP值實在太高，事問銅鑼灣地段、有齊前菜、時令魚刺身、壽司、龍蝦、生蠔、玉子、湯品同甜品25道菜都只不過係 $1,580，真心超抵食呢！ 逸 ($1,580) 前菜3款 蟹肉水雲|鮟鱇魚肝|黑梅貝 特色料理7款 螢光魷魚|蟹膏豆腐|長崎縣小長井牡蠣|拖羅蓉配紫海膽最中餅|白海膽|蟹膏鮑魚|香魚 時令刺身4款 北寄貝|沖繩龍蝦刺身|櫻魚|牡丹蝦配蟹膏 壽司9款 金目鯛|赤貝|油坊主|喜知刺|白見貝|銀雪魚|鹽水馬糞海膽|北海道毛蟹|拖羅 其他 玉子|龍蝦頭舞茸菇湯|博多士多啤梨配蕨餅 全個晚宴唔單止包你超飽，多款時令刺身、特色料理更令你食得超滿足，絕對會由心笑出嚟！當中特別推介嚟自嘅長崎縣嘅小長井牡蠣，呢款生蠔脹卜卜，肥美爽口，味道勁鮮甜，屬於出面料理店較少入貨嘅品種，蠔怪必食。另外，上次嚟食嘅沖繩龍蝦刺身今次繼續有提供，蝦肉爽囗結實，味道鮮甜，水準依然無得輸。

上環皇后街上年年尾迎嚟新咖啡店，新店店名好得意，Shuuuu…..！！彷彿嚟到要人靜靜地飲啡唔好騷擾其他人咁，但實情阿叔又覺得剛好相反，呢度嘅店主非常熱情健啖，鍾意嘅話可以坐喺長吧檯同佢吹吹水，開開心心飲啡之餘，更可以煩惱盡消。 另外，值得一提係呢度除咗黑、白咖啡、少少pastry外，店內更提供一樽樽50g嘅咖啡豆可供購買，啱晒各位啡友想試少少但又唔使成大包咖啡豆咁買嚟飲，試啱邊隻好先再買，非常方便。

再訪呢間位於金鐘半山嘅西餐廳，雖然佢位置唔太方便，但上次嚟食過佢哋嘅限定下午茶感覺好好，加上餐廳環境優雅，最啱就係相約三五好友嚟食飯吹水！ 🍴Tasting Menu ($728) 一個有齊2款前菜、2款主食同甜品共5道意、日fusion菜式嘅tasting menu，啱晒唔想用腦又想試晒呢度招牌菜嘅阿叔。 🍴Jasmine Tea Smoked Sea Scallop 北海道帶子以茉莉花茶葉煙燻至入味，建議食嘅時候可配埋側邊嘅青豆醬或者柚子蜜糖蛋黃醬，味道層次會更豐富。 🐖Jamon de Bellota Croquette 風乾咗52個月嘅伊比利亞火腿配上焦糖啤梨，鹹、甜滋味一次過品嚐。 🦞Maine Lobster Tagliolini 用上有龍蝦天堂之稱嘅美國緬因州龍蝦，肉質唔單止爽口彈牙，配埋意大利蛋麵同埋以蝦頭、蝦殼等材料煮成嘅龍蝦汁一齊食，簡直想一食再食，絕對係呢度必叫嘅菜式之一。 🐟Pan-Seared French Seabass / 🐂USDA Prime Rib Eye 另一款主食可揀法國鱸魚或者美國肉眼，前者口感嫩滑，配上日式蟹肉香菇高湯，味道更鮮甜；後者用上極佳級嘅肉眼扒，油脂唔算多，不過肉味濃郁。另外，值得一讚呢道菜嘅配菜，一片片嘅千層薯仔外脆內軟，真心好好食。 🍮Citrus Custard Caramel 晚餐以焦糖布丁配柚子奶酪作結尾，比起一般布丁口感結實，味道再甜啲啲。

一早聽聞呢間咖啡麵館好耐，先兩個月終於的起心肝同朋友諗住嚟食，結果遇上湯底賣晒，白行一趟。心有不甘之下，決定趁上星期例休日一個人再戰大西北，勢要食到為止。 呢度坐位唔多，10個左右，加上店內只有一人主理，由講解餐牌、落單、煮麵、沖咖啡都係一人包辦，所以想嚟食嘅朋友最好就唔好太趕，嚟到慢慢嘆就至啱。佢哋主打拉麵配咖啡，睇番餐牌介紹，呢種組合嘅原理係以拉麵嘅鮮味激發起咖啡中嘅谷氨酸，從而令到食麵前同後飲咖啡都會飲到唔同嘅風味。 頂立高湯拉麵 ($95) 小店剛剛轉咗新menu，宜家只提供一款湯底，另加黑、白醬油或者貝汁。新湯底混合咗魚乾、乾茹同昆布，浸泡1 日後再加入雞湯低溫慢煮，飲到濃郁雞湯之餘，亦有魚嘅鮮味，真心好好飲，阿叔又忍唔住飲晒喇！ 拉麵店內自家製，粗幼度適中，有咬口，掛湯力唔錯！配菜有2大塊叉燒，入口軟嫩，表現正常，反而特別加入嘅無花果味道甜甜地，口感又Q彈，好有驚喜！ 冷萃咖啡 + 昭和硬布丁 ($75) 又真係估唔到拉麵同咖啡都可以好夾，咖啡初飲味道濃郁，食過拉麵後果香味更出，層次更豐富。 難得嚟到食到，點可以唔食埋甜品呢！呢度嘅布丁屬於懷舊款嗰隻，蛋味香濃，口感實的的，有啲似食蛋糕咁，食完好飽肚。

呢間位於灣仔謝斐道嘅日式料理店，店內嘅午市廚師發辦可以話相當抵食！只需$450就可以食到18道菜，沙律、茶碗蒸、玉子燒、麵豉湯、甜品、壽司、手卷，連刺身都有埋，作為鍾意食日本嘢嘅阿叔，當然要嚟試吓啦！ 🕛午市．廚師發辦 ($450) 🐟刺身4款 真鯛｜真鯛上加咗梅蓉，酸酸的令人好開胃 真蠔｜嚟自大分縣，加埋黑松露酸汁，おいしい 螢光魷魚｜春天時令嘅海鮮，口感爽脆 煙燻鰤魚｜魚肉輕輕經過煙燻，食到淡淡嘅煙燻味之餘，亦有魚嘅鮮甜 🍣壽司8款： 深海池魚｜貝柱｜池魚｜車子｜火灸鰈魚邊｜拖羅｜穴子｜馬糞海膽 8款時令魚壽司，款款都新鮮肥美，食得阿叔好滿足 🍙手卷： 以吞拿魚蓉、蔥、芝麻碎同黃蘿蔔造成嘅手卷，口感軟綿，味道濃厚甘甜

呢間位於灣仔星街附近嘅法國餐廳，由女主廚主理，店內設計風格高尚優雅，充滿異國風情，而且由佢設計出嚟嘅菜式亦甚有創意同個人特色。 網上搵資料，餐廳創辦人背景好有故事性，佢由模特兒轉型做女主廚，中間患過大病，兼顧餐廳同時亦邊學邊做，佢最鍾意中菜西吃，剛剛畢業大師班中廚師課程就決定將中國「八大菜系」嘅精髓糅合法式烹調，設計出一系列中西合壁嘅精緻料理。 🥢Black Abalone 盛宴開始，先以兩款海鮮打頭陣！鮑魚先以特製嘅京蔥油浸煮，再用上備長炭烤熟；另一邊箱，嫩滑嘅海參經過風乾後再拎去油炸。兩者食嘅時候都可根據個人口味再沾上鮑魚蔥汁，味道會更濃郁！ 🐟Eel 賣相非常精緻嘅前菜！主廚以上海湯品醃篤鮮作為上湯，並配上竹筍同豆腐脆片，解膩之餘，亦能襯托出烤鰻魚嘅鮮味。 🐥French Yellow Chicken 菜式以黃油雞作主打，先係經過低溫慢煮嘅雞胸，金黃色嘅賣相，真正皮脆肉嫩。另一款法式凍雞肉批，主廚將拆晒肉嘅雞脾加埋麻辣烤雞汁同黃瓜整成，中西合壁，好有創意！ 🦞Lobster Ravioli 實屬阿叔全晚最喜歡嘅一道菜式。菜式靈感嚟自浙江菜，餐廳以自家製嘅餛飩皮包住波士頓龍蝦、杞子同萵筍，再配以味道超濃郁嘅龍蝦湯作底，加埋奶油鵝肝泡沫一齊食，簡直回味悠長，令人一食再食。 🍰Lotus Mont Blanc 為配合新菜單嘅主題，餐廳連甜品都加入點點中式元素。師傅捨棄栗子，改用蓮子蓉製成嘅Mont blanc，食到濃郁蓮蓉味，但又唔會過甜，配埋普洱味道嘅雪糕一齊食就最好不過喇！

冬天比較乾，大家除咗要保暖之外，仲要記得滋潤一吓！☺️☺️☺️ 呢間位於金鐘半山嘅西餐廳近日就聯乘本地護膚品牌 @pretti5_hk ，以滋養身心為主題並用上產品中嘅雪耳、蘆薈、薑🫚等食材為創作靈感，打造一個啱晒冬天食嘅「粉嫩滋潤」限定下午茶套餐🫖。 🫖粉嫩滋潤下午茶 ($518/2位) 傳統嘅英式3層高下午茶套餐，除咗必備嘅英式鬆餅，仲有以下鹹、甜點各4款。 🥢鹹點： 蕃茄芝士意大利香草包 煙三文魚慕絲撻 鮮蝦蒟蒻冷麵半明太子醬 茉莉茶葉煙燻鴨胸焦糖梨卷 🍰甜點： 冰糖雪耳蘆薈薑味啫喱 抹茶泡芙 西柚奶凍半牛油曲奇 紅桑子芝士餅 久違了嘅high tea，其實阿叔好鍾意食英式鬆餅架！呢度嘅鬆餅唔單止外層酥脆，而且內裏鬆軟濕潤，建議加埋呢度師傅自製嘅玫瑰士多啤梨果醬一齊食會更好味！👍🏽👍🏽👍🏽 另外，鮮蝦蒟蒻冷麵伴明太子醬同冰糖雪耳蘆薈薑味啫喱都係阿叔嘅個人之選😋，前者冷麵以蒟蒻製成，口感Q彈，配埋大大隻鮮蝦同明太子醬一齊食，口感、味道都一流；後者唔算好甜，淡淡嘅薑味加埋冰糖雪耳，感覺好滋潤！ 大家食完呢個下午茶後，記得拎埋由護膚品牌送出嘅粉嫩滋潤護膚套餐，咁就真正內、外都夠晒潤喇！

阿叔為人好性急😅，咩都講求快💨，行路快💨、做嘢快💨，連食嘢都成日俾人話快💨💨，所以日本嘅立食文化就啱晒我喇，唔使等太耐又可以食完快快走🏃🏻‍♂️！不過先旨聲明，快並唔代表無質素，有時都真係可以「快、靚、正」！ 就好似呢間新登陸香港嘅日本過江龍立食壽司專門店🍣，擁有35年歷史嘅佢喺日本都有幾多分店，淺草、秋葉原、池袋、新宿等地區都會輕易搵到佢嘅足跡🐾。專門店好堅持每日魚鮮海產🐟嘅品質，所以成日都會得到日本傳媒高度嘅評價。 今次香港好榮幸，能夠成為佢哋首間嘅海外分店。新店坐落於啟德新商場🛫，店內唔算大，採用開放式壽司吧檯設計足足可容納15個人。首次進軍香港🇭🇰，設計師特別為專門店設計可收納嘅櫈🪑，客人企耐咗覺得攰，都可以拎張櫈出嚟坐，真係細心又靈活嘅設計。☺️☺️☺️ 🍚三味吞拿魚丼 ($248) 一款丼飯有齊赤身、中拖羅同大拖羅🐟，每款都有3大片，片片都好香魚油味，自問係吞拿魚控人士嘅你，就絕對唔可以錯過喇！😋 🍣火炙壽司盛合 ($248) 盛合包括火炙過嘅帶子、油甘魚腩、拖羅同左口魚，每款有2件。值得一讚係無論魚生同飯粒嘅份量都唔少，雖然total 得8件，但食完都幾飽架！😙 下晝嚟到，午市套餐除咗包一款主食外，仲有沙律🥗、茶碗蒸🥚同阿叔好鍾意、味道好濃郁嘅鯛魚茶漬湯🥣。下次嚟開新商場行街食飯，大家又多一個好選擇喇！

大阪番嚟近一個月，依然好掛住當地美食，好可惜今次行程太趕，廚師發辦、壽喜燒都唔夠時間食，不過唔緊要，番嚟香港一次過補番！ 嚟到位於銅鑼灣渣甸街嘅新開壽喜燒專門店，呢度除咗可以食到關東⾵味嘅壽喜燒之外，亦由於店內嘅裝修佈局、精緻嘅菜式、貼心嘅服務，令人好似食緊廚師發辦咁。 Sukiyaki Dinner Set ($680) 未上主菜之前，先嚟先付同多款前菜打頭陣，前者以好可愛嘅熊仔最中餅裝住海膽同熟成魚，打卡同好味指數都爆晒登；後者海膽蒸蛋、汁煮和牛、南瓜羹同八爪魚，鹹甜滋味，共冶一爐。 主菜壽喜燒以師傅秘制嘅醬汁汁煮各款頂級⽇本和⽜， ⾁眼、西冷、肩⾁，3個部位4大塊，款款都⾁質細膩，肉味又濃。店內更特別提供蘭王蛋同無菌蛋2款蛋汁，既能提升幼滑口感，更可中和醬汁帶嚟嘅膩滯感。 除咗和牛，全個餐更跟有多款⽇本野菜、⾖腐同京蔥，蔬菜融合肉汁跟秘制醬汁，特別香甜，最衰係呢度白飯任裝，真心會不知不覺食多幾碗架，減肥人士小心啲！ 雖然係咁，不過無論幾飽都好，甜品都一定要食！店內用上日式傳統刨冰機製刨冰，加上抹茶同紅豆，為全個餐劃上完美句號！