霸嗎拉麵 (已結業)

放左工，要去銅鑼灣做運動，行過駱克道，餓餓地，見到間門面幾唔錯既『霸嗎拉麵』，就決定入去試下！入到去，個格局又真係幾有日本拉麵店既氣氛，四四方方，唔大，目測坐到三十人左右。通常我第一次試新店拉麵，一定試佢既豚骨湯，今次都唔例外。而因為我好中意食叉燒，所以特登叫左個有四片叉燒既『特盛炙燒豚肉拉麵』加味玉（即溫泉蛋），另外再叫左燒餃子，同蘋果汁。不一會，碗麵就到左喇。我一望啲叉燒，我就心知不妙，皆因塊塊都接近手當咁大，接近一節指頭咁厚。但為左唔做『大嘥鬼』，我同自己講，點都要食晒佢！講完份量，講翻個味道先。佢湯底係的確唔錯，好夠濃！餃子都煎得好香膽。唯一後悔既，就係無叫多個朋友泥同我share呢一餐，搞到我飽到捧住個肚門口！