今次無叫以前食開嗰啲大路野，反而比個名吸引咗——「粟米濃湯拉絲麻糬窩夫」。講真，第一下見到個名，心入面真係打咗個突：「粟米湯加窩夫？會唔會好似嘔吐物架？」抱住一種「試伏」嘅心態叫咗黎食。
一上枱，聞到好香濃嘅粟米味。個賣相又幾得喎，金黃色嘅粟米湯淋喺剛烘起嘅窩夫上面。切開嗰下最驚喜，中間夾住層麻糬，拉絲效果一流！
重點係味道！原本以為會好怪，點知入口非常有驚喜。粟米湯嘅鹹香同窩夫嘅蛋香好夾，唔會整淋晒個窩夫，依然保持到外脆內軟。中間嘅麻糬增加咗煙韌嘅口感，鹹甜鹹甜咁，食多兩啖都唔覺得漏。這種味覺衝擊，就好似第一次食鹹蛋黃魚皮咁，聽落怪但食落停唔到口。
總結黎講，如果你同我一樣對嘆甜品嘅印象仲停留喺以前，不妨返黎試下呢個新款。雖然聽落好似暗黑料理，但絕對係誠意之作！
