雖然係星期二嘅夜晚，但係呢間餐廳都幾多人，排隊攞籌大概等咗15至20分鐘左右啦，聽完就安排我哋坐喺店外嗰幾張枱嘅位置，都幾開揚，好似俾其他人望住曬自己食嘢咁，但都唔緊要啦，出面光猛啲，影啲相出嚟應該係會靚啲嘅，所以都ok。
三色冰 $28
食泰國嘢喎梗係要飲啲乜乜冰物物冰啦，叫咗一杯三色冰，入面就有啲類似啫喱粒粒嘅物體，杯嘢飲夠曬冰凍，椰汁味同奶味嘅比例調配得啱啱好，亦係我鍾意嘅甜度。
去骨海南雞飯 $68
媽咪就揀咗海南雞飯，海南雞飯好似係有兩至三款，我呢啲怕蝕骨嘅梗係揀去骨海南雞飯啦，啖啖肉先夠爽㗎嘛。海南雞飯會配埋湯畀我哋，亦可以選擇白飯或者油飯。
雞肉都幾嫩滑，而且夠熟，唔會話望埋去一達達血紅色，點埋醬就更加好味。
海南雞飯當然係配油飯先係perfect match，但係呢度嘅油飯我就覺得稍稍唔夠香，如果個油香味出啲會更加好。
湯都唔係求求其其㗎，大大舊紅蘿蔔係入面，潤下喉真係唔錯。
泰式青咖喱軟殼蟹鍋(配法包) $85
呢個軟殼蟹喎應該係餐廳頗為招牌嘅菜式，見到佢係咩料係自己佔一頁㗎，所以就決定要嚟試下。
青咖哩係連埋個爐一齊上，可以keep住個溫度，唔會食食下就變咗凍咖哩。
配菜都幾多，好足料。
軟殼蟹嘅份量好多呀，滿滿的盛載喺隻碟上面，炸得啱啱好外脆內軟，點一點青咖哩就即刻擺入口，仲可以保持著脆卜卜，果然值得喺餐牌想獨自佔一整頁。
配埋法包顯得餐廳嘅細心，因為咖哩都幾多，但係有冇理由當湯咁飲㗎嘛，攞嚟點下麵包就啱曬。
印式薄餅 $25
但係貪心嘅我，又點會畀法包完全滿足到我呢？梗係要點返個我最鍾意嘅印式薄餅啦，呢啲薄餅點咖哩真係一流，同埋呢度嘅薄餅都整得唔錯，因為我食得好慢，通常其他薄餅凍咗之後都會硬曬，但係呢度嘅薄餅都凍咗都唔會話太硬，保持到柔軟度。
串燒雞牛豬(半打) $85
其實叫完呢半打串燒之後，有少少後悔lol
好似叫得太多嘢食唔係好食得曬㖭，所以如果係細食嘅，可以考慮叫三串嗰隻。
三款串燒入面我覺得雞肉最出色，外面燒得香之餘，裏面都仲保持到嫩滑唔會乾爭爭，好有泰國味道。
但如果一次過食太多就會好似覺得有少少鹹了，不過都想可接受的，不錯不錯。
餐牌參考
