影片
更多
2012-08-17
6591 浏览
突發吹雞即晚灣仔區食自助晚餐，放棄食咗幾次、價錢實惠食物又穩穩陣陣嘅六國酒店，上openrice另覓新選擇。見呢間Century Hotel價位適中，供應食物又似乎幾啱胃口，一於訂座。其實好多好多年前去食過幾次自助餐，當時Novotel集團仍未入主，印象中此店自助餐只係好一般，揀佢純粹因為地點同價位合理。今次重訪，餐廳裝潢入型入格，只驚喜嘅係環境竟然保持闊落，檯與檯有相當距離。今時今日就連貴價五星級酒店，包括老銅怡記、金鐘香記同尖嘴假日，自助餐廳都逼到櫈背貼櫈背，真係無諗過呢間Novotel仲keep到大家心目中星級酒店餐廳應有嘅用餐環境，非常難得!雖然主題係『任食深海扇貝及海鮮自助晚餐』，但我諗唔少食客都係被生蠔吸引而來。香港似乎愈來愈少自助餐廳有生蠔供應，就算有、價錢多數都要去到四五百一位。呢間Le Cafe三百蚊價位既有生蠔又有蟹腳，又係一個難得。此店冷盤選擇出奇地多，刺身、煙三文魚、凍蝦、藍青口、日式螺肉、泡菜蜆肉、煙肉、芝士等基本款式之外，連風乾火腿同毛蟹腳都有，加上沙律、冷麵、壽司等等，「生冷嘢」足足佔咗食物選擇近半，唔畀讚都唔得啦!生蠔得一種，size細細隻，乜嘢「海水味
突發吹雞即晚灣仔區食自助晚餐，放棄食咗幾次、價錢實惠食物又穩穩陣陣嘅六國酒店，上openrice另覓新選擇。見呢間Century Hotel價位適中，供應食物又似乎幾啱胃口，一於訂座。其實好多好多年前去食過幾次自助餐，當時Novotel集團仍未入主，印象中此店自助餐只係好一般，揀佢純粹因為地點同價位合理。今次重訪，餐廳裝潢入型入格，只驚喜嘅係環境竟然保持闊落，檯與檯有相當距離。今時今日就連貴價五星級酒店，包括老銅怡記、金鐘香記同尖嘴假日，自助餐廳都逼到櫈背貼櫈背，真係無諗過呢間Novotel仲keep到大家心目中星級酒店餐廳應有嘅用餐環境，非常難得!
雖然主題係『任食深海扇貝及海鮮自助晚餐』，但我諗唔少食客都係被生蠔吸引而來。香港似乎愈來愈少自助餐廳有生蠔供應，就算有、價錢多數都要去到四五百一位。呢間Le Cafe三百蚊價位既有生蠔又有蟹腳，又係一個難得。
此店冷盤選擇出奇地多，刺身、煙三文魚、凍蝦、藍青口、日式螺肉、泡菜蜆肉、煙肉、芝士等基本款式之外，連風乾火腿同毛蟹腳都有，加上沙律、冷麵、壽司等等，「生冷嘢」足足佔咗食物選擇近半，唔畀讚都唔得啦!生蠔得一種，size細細隻，乜嘢「海水味」、「金屬味」我就唔識分喇，我只知道實在鮮甜到不得了，細細隻密密食，正! 之前見有食評話有蠔殼碎，我食咗一打都有兩隻似乎有細細粒異物，但我唔敢肯定係殼碎定條冰碎；不過此店直接將已開殼生蠔放在冰上任人取，冰碎彈入生蠔內完全唔出奇。要避免，響冰上加層保鮮紙就KO，咁簡單唔通諗唔到?
毛蟹腳唔算大隻，不過又係鮮甜好味。蠔同蟹都係比較貴嘅食材，但就跟全場所有食物一樣，全晚源源不絕供應，而且有個廚師不停巡視有冇食物快將取光馬上補給。臨走時見盤刺身係一整盤滿滿的剛補充，但果時已經係用餐時段尾聲喇，咁落足本refill嘅自助餐廳真係無得彈。
冷盤樣樣都好正，但係盤壽司真係扣晒分，基本上賣相比$3/件自己拑嘅外賣壽司仲要悲劇， 成盤壽司得腐皮同玉子叫做見得下人，唉...其實既然其他選擇都已經咁多，保證唔到壽司質量的話，又何必擺出來呢?
生冷嘢一流，熟食又點呢?店方自己響openrice推介「燒特級牛肉」同主打「深海扇貝」，燒牛肉好巨型，但肉色係紫紅色異常詭異，而且就算好生都係靭嘅，並唔好食；深海扇貝仲以為係食開成隻手掌咁大果種，點知只不過係小兒科，成隻貝殼得手心咁大，貝肉烤熟後剩下細細粒，試咗牛油汁同忌廉汁，食唔出有乜分別，亦都冇乜味道可言。其實生冷嘢已經食到好飽，但係見唔少熟食都唔錯，飽都繼續食。清蒸海魚同香煎鱸魚柳獲一致好評，薄餅來自酒店著名意大利餐廳理所當然要正，印度咖哩牛腩同馬沙拉雞肉亦都係頂級美味，咖哩汁配瑤柱蛋白炒飯，正到呢...
生果款少量極多，甜品選擇則相對比較少，蛋糕得三四款、聞說朱古力蛋糕好好味；蘋果批算係比較特別，叫唔出名嘅小杯裝甜點就唔多吸引。不過有雪花冰、堂煎pancake、朱古力噴泉、軟糖等gimmick嘢，如果有埋格仔餅的話，小朋友會開心死。大朋友就被Ben and Jerry's四款雪榚吸引死。濃厚朱古力味獲同桌大讚，雲呢拿都幾好味。用上原廠雪榚紙杯，錯覺好似矜貴啲咁。收藏於桌面內擺放嘅雪榚冷凍系統唔夠力，第一round取雪糕時已唔夠凍，再出去取時因為不斷有人開蓋取用，雪糕已開始融化類似軟雪糕，要扣分。
食飽當然係餐飲時間，全檯叫得一杯凍飲「冬OT」，但就畀足一壺(半杯份量)嘅糖漿。員工都咪話唔倒米，但我會畀個like佢! 食得自助餐就係想要豪爽大擦一餐，咁樣大大方方畀人食先啱架嘛，le cafe員工我撐你喎!呢餐用咗七折優惠券(其實唔駛印券，開口都有折)每人三百有找，環境舒適又咁多好嘢食，『蠔』抵食啊!
张贴
