。
環境
地道車仔麵，一定係望住個廚房有咩餸吸引就叫邊樣，睇餐牌冇咁有feel
，揀好餸店員會幫埋你送餐，店內坐位唔算好多，但車仔麵嘛，人流流動快，所以冇所謂。餐牌
原來都幾多花款，居然章魚丸都可以放入車仔麵，但因為我冇點望餐牌，係望住廚房啲餸點餐，冇見到章魚丸所以冇點，仲有健康啲既菠菜麵添！
醬汁區
一麵五餸 $49
接近40款餸任揀，仲可以一麵六餸，一碗要特級潮汕牛筋丸、胡椒豬肚丸、秘製牛腩、秘汁雞翼同馳名辣魷魚，配菠菜麵(+$3)。而車仔麵既靈魂湯底醬汁，呢到居然係用自助形式，有18禁魔鬼辣醬配車仔麵，仲有自家秘制辣醬任你自己“拔”，中意幾濃都得！佢個秘制辣醬真係必不可少，食落甜甜地又帶少少辣，撈落湯底真係好正！而魔鬼辣醬寫到明係18禁咁辣，但如果你係食得辣之人，對你黎講應該唔算好辣，反而重XO醬香，好惹味，講返配菜，嗌哂店內招牌，不過牛筋丸同胡椒豬肚丸比較普普通通冇乜特別，辣魷魚都唔夠，但牛腩就燜得幾入味幾稔，而雞翼一定要點，醃到入面都係滷水色！
一麵六餸 $56
朋友呢一碗就叫左溏心蛋、特級墨魚丸、生筋、蠔皇靚花菇、油菜同甜心蘿蔔配米線。落醬當然唔少得，而呢碗就推介蘿蔔，稔度岩岩好又不失咬口，而且真係顧名思義係甜心蘿蔔，一咬湯汁溢出，再加清甜味道，必點！花茹勁大塊又彈牙又索汁，呢2樣配上佢個秘制醬汁加湯底冇得彈！
可口可樂 $8 ，凍咖啡 $9
美中不足係飲品冇跟餐價，都係散叫，但幸好唔算太貴。
唔怪得叫自己“來多碗”，對我而言，湯底醬汁真係評定一碗車仔麵高低既一個大準則，呢到本身湯底已經有股腩汁既清甜，再加埋個秘制醬汁真係好惹味，加上可以嗌一麵六餸，岩哂中意食餸既朋友仔。
