星林居雲南米線餐廳 (已結業)

今晚又米線做晚餐，放工去左尖沙咀買相機，唔想貴食就近近地去星林居食米線。譚仔以外星林居係我第二選擇，因為佢湯底甜甜酸酸幾開胃，配上腩肉同大腸，其實好好食。今次選左大腸同雞翼，雞翼好入味，啲豬大腸好稔，個湯底就酸酸地，大大碗上枱，見到都開心。其實星林居湯底好足料，有好多芽菜同埋肉碎，仲有莞茜，以及超多酸菜。成個配合起起黎，層次好豐富，無一般清湯咁單調。一個人食飯，米線配檸蜜，其實hea hea 地都可以好開心。