仲即場入埋去探個究竟，知悉新店於牛年開張，午市分十二點及一點半兩個時段，晚市則只做一輪，最誘人嘅就係於未領取酒牌下全面免收開瓶費！由於晚市訂座要等到成六月，碰巧XO仔週三中午約咗喺附近睇醫生，兩父子就決定大膽一試。
嘩，真係唔知士丹利街五十號個地下會有咁多個舖位，幸好餐店和風味濃嘅門面夠顯眼，不難找到。
門外展出嘅餐牌清楚道出午市只提供一款廚師發辦午餐「お昼のおまかせコース」（$880/位），晚餐則有晚市天婦羅套餐「晩の天ぷらコース」（$1,380/位）及廚師發辦晚餐「晩のおまかせコース」（$1,880/位）兩款，食材會因應季節及供貨狀況而定，故未能預先告知。請留意，如果貴客有意於午餐時間享用晚市套餐的話，訂座時一定要講明，因為用餐時間會較長，店員不能安排有第二輪食客接駁。
地舖面積雖小，但勝在樓底極高，抽氣強，光線充裕，小屋形嘅設計配上木造嘅間隔成功營造出溫暖柔和嘅格調。店內合共有十個吧位圍繞著師傅個開放式大舞台，睇返幅相都覺得環境闊落舒適得黎好有線條美。
不用花巧之裝潢，雲石牆上簡單掛出花花裝飾及碗碗擺設，足以添上高雅嘅氣質。
入座後迅即有暖手嘅熱茶及熱毛巾。
桌上有齊備嘅口罩套、自用餐具及調味料。
彩色調味拼盤中有半隻青檸及四款鹽粉，相中左起分別為松露鹽、綠茶鹽、海藻鹽、梅子鹽、青檸。
配天婦羅汁有白雪雪嘅蘿蔔蓉，每人一份唔洗爭，夠哂衛生。
可惜服務生斟酒速度尚有進步空間，兩頁飲品牌嘅款式亦不甚廣泛。
由於午餐並無他選，人一到齊，高大黑實、身穿黑袍嘅次郎師傅即動手烹調美食。
天婦羅菜式由大師傅續件擺放於面前白色嘅厚碟上，並交由溫婉有耐性嘅服務生作出簡介。
為午餐揭開序幕嘅「長崎吞拿魚刺身」鮮紅亮澤，猶如舖上紅地毯般隆重地歡迎舌尖細嚐佳餚，妙哉！醬油漬吞拿魚片鮮香軟潤，捲入生磨山葵食落口，微微嘅辣勁醒神又醒胃。
呈「9」字形嘅蕨菜屬本地出品，外層香脆，菜身黏潤中帶點嚼勁，清香甜美，都幾得意。
最後件「蕃薯」因本身已夠香甜，故不必多添調味就最能食得出其原汁原味。
望住師傅炸蛋時先有咸香暖胃嘅紅麵豉蜆仔湯飲。
影片