Secrettaste

聖誕節菜單，每位400，免收加一，共有七道菜，選了其中數項來評評。黑松露蛋白：蛋白跟上湯的味道混合得不錯，黑松露的點綴讓整體口感更具層次，可惜蛋白不夠細滑。黑毛豬扒伴草莓沙沙：失望的一道菜，豬扒放涼了，放涼了！沒有熱力的豬扒帶不出肉味，亦稍為過韌，令人食慾大減。放在上面的草莓粒酸酸甜甜，本是一個出色的配搭，叫人可惜。甜辣醬羊架：羊架配上甜辣醬對小弟是一個極新穎的嘗試，吃了一口，咦，豬仔骨黎既？無可能的，明明眼前既係羊架，恐怕潛意識已把甜辣醬和豬仔骨自動連上了，加上強勁的辣味把肉的味道都蓋過八成，不細味是吃不出分別，小弟亦沒再糾纏是羊是豬的問題，平心地繼續享用餘下的甜辣豬仔骨。蒜片蜆意粉：蜆和意粉的份量不少，加上經過前兩道菜的洗禮，正常狀態下早已飽了大半，不能再吃了，可是蒜味十分突出，跟蜆是一個很好的配搭，即使蜆不是特別新鮮，亦能帶出一點蜆的鮮味，是蜆的味道！加上意粉煮得al dente，再飽都值得多食兩口。朱古力心太軟：外層鬆軟，切開後濃稠的朱古力漿慢慢流出，賣相吸引，味道亦不錯。可是已經食到撑破肚皮了，未能夠完完全全地享受這道甜品。食物水準平平，未如其他食家食畢讚不絕口。進餐中途嗅到少量煙味。…查看更多

之前跟朋友仔 都去過好多唔同的私房菜 今次出奇地有驚喜。當日本身約左7點30 但最終我地8點30 先到 幸好主廚好nice 仲細心送上暖水 同餐前小食 而以私房菜黎講地點都好方便 地鐵站出左唔駛5分鍾就到 但大廈入口就有d難搵 不過book 枱的時候他們都特意send 左個門口相黎所以問題都唔不大。。當日我地4個女仔被安排係玻璃房內 環境萛有D情調幾舒服 岩哂幾個人傾計食飯 又唔怕比人趕交枱又無限時 坐左10分鐘左右 就上第一道菜喇。泰皇汁甜虾帶子刺身賣相ok..泰式醬汁味道正正常常 清新得黎唔會太辣 而甜虾同帶子都萛新鮮 大閘蟹粉釀脆皮雞翼沙律😴🐔呢個時候一聽到大閘蟹粉 即刻有d 雙眼發光 雞如其名🐔 雞皮好薄好脆完全無肥油的感覺 雞肉都好滑 美中不中係用刀叉食切開的時候 雞肉同蟹粉有d 分離 野菌忌廉濃湯一向喜歡飲磨菇湯的我黎講 呢個湯一上枱就覺得好香 入口又唔會太餾 加上長條形脆條 用黎點湯 配合得岩岩好 之後到主菜 呢個真係重點推薦 有3種選擇 豬牛羊 但係我地只係簡左牛🐄同豬🐷香煎紐西蘭牛肉眼朋友仔係牛魔王 比較喜歡食軟淋淋的牛扒 周圍食牛扒的佢對呢個牛扒🐄簡直係讚口不絕 口感和味道完全係佢喜歡的 佢話牛扒有肉汁 又香口 味道唔覆習 食得出主廚煎扒的功夫同埋用心 分分鍾出面食個4/500蚊的扒餐都未必有咁的水準 。咁ge 價錢超值。搞到我都想下次再黎試佢個牛扒。。西班牙黑毛豬扒配草莓沙沙一開始比佢個名吸引左 好好奇草莓沙沙係咩呢？原來係草莓粒粒加左d 香草煮成的 味道好特別好開胃 酸酸甜甜有一陣草莓香 。豬扒都係煎得好好味 一d 都無韌同“鞋”的感覺。。我覺得絕對唔輸比牛扒呀！招牌蒜片羅勒蜆肉意粉經過一輪狼吞虎嚥碟碟清之後 其實我地都以為已經上哂菜 點知主廚再送上一碟碟大大的意粉 可惜漏左影相 一睇就知足料 好多原隻蜆蜆。雖然已經開始飽飽地 我地每人都分左d 食 同樣係具有水準的 意粉個汁好味好香口 蜆肉夠新鮮 主廚好細心見到地幾個女仔食唔哂又唔想哂野 仲專特搵個外賣盒幫我地打包真係有d 唔好意思。。最後 甜品係朱古力心太軟 或者係焦糖布丁甜品方面心太軟 唔萛太甜 味道可以 反而焦糖布丁 外表平平無奇 但原來入面加左爆炸糖 食落口的感覺好得意 走的時候朋友仔已經急不及待 要book 定兩星期之後包場為老公慶祝生日 總捨而論:大眾化的價錢 有咁樣的食物水準 環境坐得舒服 又唔駛等位 又唔駛趕交枱 簡直超值喇。值得一去再去…查看更多

舊同事相約食飯，由我負責搵食。之前幾次均是吃中菜，近來因餐廳週的關係，我的潮流走到了西菜、日菜系列。想一班人盡情喧嘩囂鬧，於是著力找樓上僻靜私房菜。星期日接近半夜找到這裡，主理人李先生非常快就回覆了餐牌，大夥沒有異議，於是就拍板去了大家都就近位於銅鑼灣一棟唐樓內的Secrettaste。雖然各散東西於不同工作地點前往，但大家都差不多時間去到地面附近。由於一早知道入口有詭異之處，於打電話問清楚入口後，大家相約一起撐樓梯上3樓，輕易就摸到了沒有門牌的509號室。當晚我們被安排坐於玻璃門房內，原來我們不經意包了全場！店方先替我們以冰桶冷著自攜的汽酒，並送上小食蝴蝶碎餅／胡椒卷餅。由於胡椒卷餅鬆脆又鹹香送酒一流，我搶了友人A君的份吃光了😁邊談邊喝酒，首先上的是前菜“泰皇汁北海道帶子刺身”。以泰式酸辣醬汁薄薄塗抹上帶子刺身，味道恰到好處，提鮮之餘未有蓋過帶子的甜味。事前知會大廚同行友人J不吃生食，改以奉上金沙鹹蛋黃帶子，外型金黃色非常美觀。另一位友人E原來也不吃生，送上菜式時才告知店方亦即時妥貼安排了熟食，服務貼心抵讚。第二道前菜“蒜蓉牛油焗翡翠螺佐松露薯蓉”，螺頭非常大隻，原擔心會過韌或硬，但出來的效果是肉質軟腍帶甜，配以淡淡的松露薯蓉，需未夠幼滑但味道討好。第三道“巴馬火腿黑松露沙律”，外型似一隻肥嘟嘟的蘿蔔，黑醋汁、橄欖油份量剛好，松露香氣略淡，蔬菜新鮮爽口。“野菌忌廉濃湯”走的並非濃厚湯底，而是帶豐富的幼菌粒粒口感，配以香脆的煙肉碎，以及鬆脆的麵包粒，效果不俗。主菜我選了“黑毛豬扒伴草莓沙沙”，約一吋厚的連骨黑毛豬扒，肉實結實容易咬開，滿有肉香帶豐盈肉汁，襯以味道清新的沙沙醬，沒有了油膩感，兩者很匹配。不知為何，此款北美墨西哥式醬料，令我想起中環Gaucho的南美阿根廷風格sirloin served with tomato salad，但後者味道是太清新了點，沒有了沙沙醬點點帶微辛的刺激著味蕾，Secrettaste的於我更對胃口。試了點同行友人S的medium香煎澳洲肉眼扒，看樣子好像熟了點，但無礙它的軟腍有肉味。隨後的“招牌蒜片羅勒蜆肉意粉”份量十足，雖是一碟作分享，但其實此時大家吃吃喝喝已大半飽。但炸過的蒜片香甜惹味，意粉非常彈牙帶輕輕的羅勒香氣，蜆肉剛熟嫩滑鮮甜，整體味道偏濃味，卻令我欲罷不能，不自覺的吃不停口！後來詢問大廚，原來因預計客人此時胃納接近滿，刻意安排濃味菜式，為的是再次刺激大家盡情進食！最後的“朱古力心太軟”呈流心狀，試了點味道幾好。我要的“咖啡焦糖燉蛋”，充滿咖啡味道，惟因冷藏過後有點倒汗水出現。雖然全晚只有店主李先生身兼大廚及侍應照顧我們，但頭4道菜相隔約15分鐘、2道主菜及甜品相隔約25分鐘送上，時間拿捏不錯，而且餐廳佈置簡單舒適，非常適合hea住食飯傾偈自斟自飲的客人。結果店主無催的情況下，我們不知不覺興高采烈的坐到11點幾先散水。Secrettaste每道菜烹調水準平均地比一般食店高，食材質素高味道濃但無下味精(本人已試過不論貴/平西餐亦可引致味精不耐症輕微至嚴重發作)。7道菜收費每人$350、開瓶費只$30更是無敵價！換成是稍有名氣或於中上環地段的食店，就算質素相若收費亦一定以幾何級倍上。從Whatsapp交談中得知，店主李先生的廚藝主要靠自學鑽研及請教朋友有所增長，而且他非常熱愛煮食，力求進步，希望客人開懷暢而食。畢竟一人包辦買手、廚師、樓面、清潔，少點熱誠也捱不住。其實廚師是否用心製作，吃的人客絕對感受到的！期望Secrettaste私房菜長做長有，我與好友多個好地方食飯嘻哈﹏…查看更多

今次係小弟第一次寫食評，開始寫食評的原因係同老婆結婚一周年紀念日，想記低去，亦希望記錄低之後每一個周年紀念日。下午同老婆行我地的拍拖勝地維園散步，行到日落就帶老婆去呢間試下今次揀哩間餐廳其實自己未去過，但有同事去過食晚餐話好食，上網睇食評亦很好，所以就試試。APPETIZER 有幾款:芝士焗小蟹蓋 配 泰汁生蝦刺身芝士濃郁，生蝦鮮甜，泰汁微辣惹味及開胃麻醬煙三文魚沙律出面試過麻醬沙律，但往往醬汁掩蓋了所有味道，但今次這個醬淡少少，唔會蓋過煙三文魚的煙燻味parma ham黑松露沙律黑松露果然係餐桌上的黑鑽石，令這道本身平凡的菜餚變得特別，廚師的plating亦做得很出色意式流心番茄湯哩個湯好特別，個湯係將番茄濃湯(有羅勒碎)放入一個空心的去皮番茄，所以一切開便會有熱湯流出！我同老婆都嘩左一聲，好SURPRISE!去到MAIN COURSE，我同老婆一個要黑毛豬一個要肉眼扒香煎鵝肝配黑毛豬扒草莓沙沙之前同老婆去法國HONEYMOON時喺LYON嘅餐廳食過鵝肝，老婆一試難忘，番到黎香港一直再食唔到個種味道，所以我胆粗粗事前同餐廳REQUEST要有鵝肝做MAIN COURSE 的一部份。效果無令我地失望，鵝肝可口，有口感，食落無根，不肥膩，同埋比我相像中大份。而黑毛豬肉質結實，豬味濃郁，唔乾身。香煎澳洲牛肉眼扒肉眼扒老婆鍾情 MEDIUM WELL，因為怕有血水流出，但通常出面叫個D都會 OVERCOOK 變咗WELL DONE。但哩到 廚師HANDLE得到，切開只有少少粉紅色，無血水。蒜片羅勒大蝦意粉自己唔太BUY用蒜片整意粉，因為有少少喧賓奪主的感覺。但今次份量剛好DESSERT心太軟及咖啡焦糖燉蛋雖然老婆話已經飽飽地，但我知女人總有另一個胃食甜品，而我老婆亦無例外。佢話特別鍾意心太軟，因為無出面果啲咁甜，而朱古力亦好滑好香淳我地最後兩個食完都好滿足，有個STAFF 仲就過黎祝福我哋。我亦好希望以後每一年都可以同老婆食盡全世界…查看更多

暑假就嚟完，今日約埋成班 miss 阿 sir一齊出嚟食番餐勁嘅好彩入到一間好嘅中學到教書，難得大部份同學都係後生仔女無隔幕，玩得埋，所以間中都會約出嚟gathering 我地之前去嘅都係食buffet呀，唱k ，今次攪手話想同我地試私房菜，就去左銅鑼灣呢一間上樓嘅試下。因為攪手話食過ok好味，所以我地都唔擔心，只係怕食唔飽前菜方面有羅宋湯，沙律同煙三文魚春卷湯有真材實料，啖淡都有菜同肉，沙律口感清新，春卷脆口又唔熱氣，估唔到前菜已經幾有份量接住落嚟係主菜啦，有三款可以揀嘅，包括有燒鯖魚、鵝肝醬雞卷、黑毛豬扒(正呀)我自己就揀左黑毛豬，因為之前係日本食過真係一試難忘，出面嘅餐廳又唔常見點知我真係無揀錯，黑毛豬種豬味完全keep住無流失到，而且硬度亦適中，唔似出面嗰啲係醃咗啲古獲怪嘅粉的感覺，另外幾片士多啤李有少少酸味令人更開胃我左邊凌sir揀左燒鯖魚，開頭我以為係日式所以覺得無乜分別，之後先發現原來係西式煮法，賣相仲要好靚第二道主菜cabonara煙鴨胸意粉係指定的，中間有隻流心蛋可以撈埋意粉同鴨胸一齊食，鴨胸頗入味 其實食到呢一刻有少少飽感，因為估唔到前菜同正餐的份量有番咁上下，但一餐full set dinner 點可以無甜品呢，我揀左香蕉乳酪杯，甜而不膩的感覺，個底仲有少少脆片，大滿足。…查看更多

我嘅生日月開始啦!小學同學們話book左銅鑼灣一間私房菜攪party，我地10幾個人就包左個場黎玩。入到去無其他人的感覺真係好，最緊要係唔洗同人迫又唔洗再等位唔使煩!!!!!!前菜有 蘑菇忌廉湯&芝士焗小蟹蓋配泰式生蝦刺身&巴馬火腿黑松露沙律&煙三文魚沙律我自己最深刻係忌廉湯，自己咀刁，逢係開粉的忌廉湯都好唔鐘意，今次個湯用足料，食到好多菇好濃味本來以為前菜有咁多野，個煙三文魚沙律會好細份，誰知好足料好大份!!其實我自己食量唔算多，坦白講食到哩到都有少少飽，但未到主菜當然不能停落黎!!!主菜(1): 鵝肝醬雞卷//黑毛豬扒伴草莓沙沙//香煎肉眼牛扒牛扒我就食7成熟，個廚師都做得到，但就有少少燶，不過我自己都可以接受。黑毛朱我自己就無食但同學仔話個好多汁唔乾身，雞卷份量細少少，但因為我地share黎食所以都好夠飽主菜(2):蒜片羅勒青口意粉我唔鍾意林的意粉，哩個就做到唔林，個青口都幾大粒同新鮮。蒜片份量唔多，無蓋過羅勒的味道。食到呢到已經飽左9成 ，哈哈!!但戰鬥力當然未減弱啦，因為要食甜品同埋同學仔為我準備的生日蛋糕。甜品有焦糖燉蛋朱古力慕絲。另外我個蛋糕唔大(d相有人樣唔share啦)，大家都係象徵式切下蛋糕因為知道呢到會食得好飽 哈哈 但真係好開心，因為大大話話同同學仔都識左20年都keep 到，希望下次有人生日再黎呢到食!!…查看更多

我地一行十四人，想找一間可以坐耐D~傾偈又可以好嘈都唔會俾人投訴~去又方便~返屋企又方便~價錢又合理既餐廳慶祝睇左好多OPENRICE的COMMENT~最後被 $350無加一收費的私房菜~睇地圖又好近cwb地鐵站吸引了便興致勃勃打去book位~第一道~香草芝士焗小蟹蓋 配 泰汁生蝦刺身生蝦好味~夠辣~小蟹蓋很香口~第二味~巴馬火腿黑松露沙律份量很足~味道很夾~第三味~我最鍾意~香濃野菌忌廉湯上面有d脆脆麵包~口感一流~( 以下請三選一 )因為我們大伙人~每人都將大家都食物分些給朋友(a)鵝肝醬香草雞卷很夠份量~雞肉很嫩(b)煎黑毛豬扒伴草莓沙沙剛剛好熟~味道也精準~(c)香煎澳洲肉眼牛扒忘記影相~超鍾意伴碟的薯仔~煮個時間岩岩好！個薯皮很香~舊肉細舊d~菜多d我覺得會開心d我們都把碟內的食物清了~~當大家都飲飽食醉~再來了~蒜片羅勒青口意粉我們十多人有3碟意粉~大家當時已經飽得8899~本身個個都話要小小夠喇小小夠喇~但因為個意粉好彈牙~青口很多很多~好好味~所有意粉被清碟~甜品是(二選一)(x)特濃朱古力慕絲(y)法式焦糖燉蛋我們大部份人都選了燉蛋~燉蛋很香滑~焦糖有個很特別的口感~很讚…查看更多

上個禮拜參加同事嘅farewell party，同事book左間私房菜，去到先知原來直頭包晒成個場，好熱鬧好勁@@私房菜自己聽就聽得多，食就真係未試過。哩間私房菜主要係食西餐，雖然成班人去，我地都可以各自叫set食前菜: 燒蠔配蝦刺身本身自己都唔係好食蠔，但嗰日隻蠔都幾肥美，試左少少之後又幾ok，隻蝦都算爽口沙律:黑松露parma ham沙律Parma ham 就食得多，配黑松露就真係第一次，但估唔到隻味又幾match!!Main course可以三揀一 ，我自己就叫咗黑毛豬扒，塊扒煎得幾香口，上面仲有ｄ一粒粒嘅野，同事話係草莓沙沙，甜甜地咁另外仲有個青口意粉，個意粉都幾足料，自己鍾意食少少唔淋但又有少少硬嘅口感，哩度都做得到甜品我就食咗chocolate mousse同事三分親，哩位同事喺公司做左十幾年，自己雖然只係識咗佢年幾，但都真係好唔捨得佢 >_<可能係間餐廳氣氛都唔錯，我地又book晒場夠晒privacy，就可以任傾唔嬲又唔擔心比人催趕人走，講到口水都乾埋!!!成個SET DINNER本身每人$350(不收加一)，請埋同事都唔洗淨$400…查看更多

今次第二次，上次同女友，今次係同菜個朋！今次一樣食350menu，同上次有啲菜式唔同！前菜～燒半蠔配生蝦刺身～蠔係即焗既，熱辣辣上枱，好香蒜蓉青紅椒味，個生蝦係配上大廚自制泰式汁，好醒胃，我同朋友連伴碟菜都食埋，因為個汁都有啲辣，蝦都爽口！巴馬Ham沙律～應該係呢度主打吧，水準OK，配上黑醋同松露既沙律汁，口感唔錯！今次係南瓜湯～味道Ok，略為單調啲啫！主菜都係3揀1，我今次揀～黑毛豬扒伴草莓沙沙～豬扒同我朋友塊牛扒一樣大，仲係厚厚既，以為咁厚要煎好耐，所以怕有啲乾，好彩，食落又幾好食，配埋草莓洋蔥香草整既沙沙，所以唔太感覺肥膩，我朋友都話下次食呢個今晚個蒜片意粉真係好正，好惹味，好過食忌廉果啲好多大厨話下次有個290菜單（泰式），8到9道菜式，好抵呀下次食呢個先得呀…查看更多

爸爸生日 但不想出外吃飯 食黎食去都係個D野搵左呢間私房菜 近近地 試下啦 之前都食過一次私房菜(唔係呢間)印象幾好既290$ 都算平 最緊要D野岩食 同埋唔洗自己諗 好怕自己選野食成日眼闊肚窄  因為想俾個小驚喜爸爸 所以一早擺定個蛋糕係佢地雪櫃野食都係離不開湯,前菜,頭盤,甜品.印想最深刻應該係 西班牙風乾火腿沙律好FRESH 好好味 唔會好重味 岩岩好整體黎講290/PER我覺得係超值 有九道菜不在話下最緊要環境好靚! 好高貴浪漫既紫色!!!!如果下次轉菜單 一定會同男朋友再食過…查看更多

感謝Secrettaste的試食邀請，讓我有機會跟朋友吃一頓豐富的私房菜。 Secrettaste不易找，509號的四樓，沒有標誌也沒有招牌，門口如一般的住宅沒兩樣，很神秘，如果不是聽到刀叉碰撞發出的聲音，我還以為找錯了地方。應門的是Tak，他是這晚的主廚，也是餐廳的負責人。前菜來之前，Tak送上了番薯片。我剛好有些餓，真開心！喜歡不是bread basket，不會因為塞飽了吃不下其他菜式！過了一會兒，頭盤就來了。凍番茄皮蛋 配 泰汁北寄貝刺身北寄貝爽口鮮甜，配上辣味泰式醬汁，非常醒胃。皮蛋粒和洋蔥粒撈成的沙津鋪在酸甜的番茄片上,是我們前所未有想過的配搭，吃過才驚覺原來它們無論口感與味道都挺合拍的！第二個頭盤是巴馬火腿黑松露沙律,用 parma ham捲著沙津菜，而不是只鋪在菜面，吃的時候不會要兩樣分開吃，一次過便能把它們放進口中，十分有心思。Parma ham肥瘦比例恰當，加上黑松露油很香口，而沙津菜就能爲濃味作出平衡。番茄洋蔥鮮蜆湯湯非常足料，碗裡差不多一半是新鮮的蜆肉、番茄和洋蔥；加了白酒味道香甜，比起一般 dairy based的餐湯，我更喜歡這個！當晚的主菜有三個選擇，我和朋友分別選了不同的主菜。鵝肝醬香草露筍雞卷雞肉卷著鵝肝醬,雞肉肉質嫩滑，混着鵝肝醬惹味可口，中間的爽口的蘆筍粒增加層次感，美中不足的是放涼了一點。香煎美國安格斯肉眼朋友的肉眼扒要了五成，生熟程度很剛好，不會太多血水。牛扒內里色澤粉嫩，肉味濃郁，脂肪分佈均勻，可惜比較多筋位，影響食感。胡麻蛋奶腸粉已經吃撐撐的，差點忘了還有carbonara腸粉！這個中義日的混血兒有趣新奇;Carbonara 汁濃稠, 加了日式胡麻醬就變得特別美味了。把軟滑腸粉代替意粉原來也不錯，不過對於已吃到八成飽的我們份量有點兒太大了。這晚的甜品是法式焦糖燉蛋和玫瑰牛乳奶凍。玫瑰花牛乳奶凍玫瑰花香恰到好處，牛奶味香醇濃厚，奶凍柔軟綿滑，讓人停不了口。法式焦糖燉蛋焦糖用匙羮一敲即碎；燉蛋幼滑，不會太濃厚或creamy，是一個light版的creme brulee，我就覺得其實可以加重忌廉的份量，始終吃甜品是另一個肚子嘛，再膩再邪惡一點也無妨！還有，如果焦糖更大塊就更好了！再一次感謝 Secrettaste的邀請，這晚真的非常愉快。整個 6-course set的價錢是$350一位，食物質素不錯，店主有心思，價格合理，值得一試。Menu會不定期更換，保證有surprise！這裡還有vip room，大家可以book場開party呢！…查看更多

有時候，心裡隱藏咗啲秘密，好想跟人分享，但唔可以講出口，實在喺件幾痛苦嘅事。不過，今次要分享嘅「秘密」，就絕對唔使就住就住，早前，掹住食友車邊，一同嚟到「Secrettaste」試菜 ，喺一間身處銅鑼灣舊唐樓內嘅私房菜，主打唔同歐陸菜式，原來仲喺晌5月啱啱開業無耐。叫得「秘密」，佢個「竇」又真喺好秘密，首先，地下街號門牌只有507，再跳就511，咁509呢 ？好彩小弟都有朋友住緊唐樓，知道好多舊唐樓都喺一梯兩伙，每邊用一個街號，當然如果樓下加番個門牌509-511就更好啦；此外，上到3字樓（四樓），真喺唔話佢神神秘秘都唔得，完全無招牌、無標記，跟住宅無分別，幸好無嚟錯！應門就喺店主阿Tak，其實侍應又喺佢，大廚亦都喺佢！入到店內簡直兩個世界 ，估不到嘅一室沉實嘅棗紅，紅牆木地板、紅枱布、絲絨窗簾……等等，跟出面形成好大對比。仲有，內設一間貴賓房，玻璃間隔，私隱度更高，更適合搞吓小型飯局。最正就喺唔收切餅費，又唔收開瓶費 ，6道菜晚市套餐，都喺收$350 / 位，仲唔設加一添。溫馨提示，由於好多材料都喺即日新鮮購買，正所謂唔靚唔要，故此有可能跟事前所收到嘅菜單有些少差別。店內播放著輕柔音樂，「神秘美味」隨即啟動。 香煎西瓜配海鮮慕絲春卷 原先個菜單嘅第一道前菜喺香煎西瓜配魚子醬芥末蕃茄，雖然改咗配海膽慕絲春卷，小弟都同樣啱食。最驚喜莫過於3粒香煎西瓜，入口暖粒粒，但又感覺到幾香口，加埋啲蔥花、洋蔥粒、蒜粒吊吊味，頗有趣嘅口感，西瓜一樣可以熱食；而另一半嘅慕絲春卷，據知當中嘅海鮮慕絲有可能次次唔同，有時三文魚，有時海膽，加入少許芝士，以「飛佬皮」（紙酥皮）做春卷皮，外層脆脆，內裡軟綿。好欣賞依道咁有創意同心思嘅前菜，幾有種先聲奪人嘅感覺 ！ 巴馬火腿黑松露沙律 第二道前菜嘅亮點就喺啲巴馬火腿，24個月熟成嘅火腿，既軟熟，又鹹香，油潤恰到好處，3大片已叫人食得好回味；至於個沙律，簡簡單單晌沙律菜添上黑松露醬及黑醋，「芳香、醇和」就喺我俾佢嘅評價 。 松露野菌奶油濃湯 第三道菜嚟個湯，等大家潤一潤。濃湯果然無改錯名，果然濃郁，菌味十足，喺非常之香嘅野菌味，而且個湯身打得挺柔滑，但大廚又該意保留少少野菌粒。面面嘅泡沫及黑魚子，個人感覺就裝飾大於實際。每晚主菜3揀1選擇，是晚就分別有雞肉、魚類及牛肉作為主菜，幸好我哋勝在人齊，可以試齊3款。 鵝肝醬香草露筍雞卷賣相算精緻，以雞胸肉捲住鵝肝醬及露筍煎烤，切件後再伴上油醋汁及茄子、蜜糖豆。雞卷其實有啲嚡 ，不過，爽嫩嘅露筍同粉香嘅鵝肝醬晌口感上搭夠 ，再加上重重露絲瑪莉香，算喺唔錯。 芝士鮮蕃茄烤鮭魚 以芝士及鮮蕃茄鋪晌三文魚扒上烤爐，入口味道帶少許辣，但芝士很濃香，蕃茄亦好鮮活，最緊要喺魚扒依然嫩滑，油脂甘香 。如果晌配菜上能多點變化，唔好只喺茄子拼蜜糖豆，相信觀感更好。 香煎美國安格斯肉眼小弟都喺喜歡大啖肉，所以主菜揀嚟香煎美國安格斯肉眼，依份肉眼扒絕對稱得上夠晒份量，大大件鋪晌碟上，好有睇頭。安格斯肉眼扒簡單香煎，加上一撮香草牛油，小弟要咗5分熟，將肉眼扒一刀橫切開，睇落色澤幾對辦，可惜食落有啲落差，夠晒油香，但肉質有啲韌，而且有少少筋 。此外，賣相都明顯比較單調，仲要塊扒冚實啲烤新薯，改善空間很大嘅一道主菜！ 胡麻帆立貝蛋奶意大利麵 食完兩道前菜，一份餐湯，以及主菜，其實都飽到7分（同行嘅姊妹可能上到9分），跟住再嚟一客意粉，心想應該會是「輕量級」，點知猶如一份主菜咁重手，難道想挑戰小弟嘅食量，哈哈！但個意大利麵真喺全晚至愛，首先麵條做到應有嘅煙韌咬口，加上每條都沾滿芝麻雞蛋忌廉汁，既香滑，又滲出點點芝麻香 。麵條中又加入煙肉，多份鹹香之餘，味道更有層次，唔少得要提就喺意粉面上嘅巨型鮮帶子，又鮮，又大，如果依個喺散點菜式，就喺店中必食推介 。完美嘅晚餐，甜品作結又點走得甩吖！今晚嘅甜品選擇有兩款（2揀1），分別喺法式焦糖燉蛋或香濃朱古力慕絲，當然，兩款試勻喺我哋嘅必然選擇。 法式焦糖燉蛋配朱古力雪糕 個燉蛋做到蛋香、嫩滑、焦脆已經足夠收貨，加埋少少士多啤梨同藍莓做裝飾，要挑剔就梗喺個朱古力雪糕球整得「肉酸」咗啲啦，感覺有啲「求其」。 香濃朱古力慕絲配朱古力雪糕慕絲嘅朱古力味濃度不俗，但幼滑度就有點不足。側旁嘅朱古力雪糕球溶得異常之快，一上枱已經溶緊，我哋都要趕快咁食，其實球雪糕都唔錯，內裡仲有啲朱古力粒添。整體上，環境、菜式、份量都可算喺超值，尤其份量上，真喺超越所想，不過，小弟覺得賣相方面都仲要加把勁，下多啲功夫 ，始終色香味俱全，客人自不然食得更稱心！再次多謝店家嘅款待，以及食友嘅引薦，讓我跟大家享受咗一頓華麗私房宴！…查看更多

上個月收到呢間私房菜負責人o既免費試食邀請,同樣,我要求事前將身份保密預約,我book o左(27-7-2013 Sat)晚同男友o黎試食,行完街後,都差唔多時間o黎搵呢間私房西餐.首先,我o地行到駱克道搵到511號o既唐樓,繼續向西行搵509號,但搵o既係505-507號,咁509號去o左邊?正當我想行去對面馬路望返過o黎睇三樓有冇寫住Secrettaste o既時候,男友就大大聲叫我,而o係511號樓梯底派o緊另一家食肆單張o既女仔同我男友講,509號同511號係用同一條樓梯,不過右邊o既係511號,左邊係509號.啊,謝謝幫忙.我o地行上3樓,兩個單位都冇寫Secrettaste,我o地打算行返落去,o係樓梯又遇返個女仔,佢問我o地搵唔搵到?我答搵唔到,佢又問我o地搵邊間?話o左畀佢知後,佢叫我o地多上一層試吓.好o既,謝謝!上到四樓係一道白色木門,同樣係冇寫Secrettaste o既,我忍唔住要打電話問係味白色門?接聽o既答係.啊,果然係呢間,正當我想影低門面時,就有人開門,我o地就入去喇.呢個時候,就只有房內一枱客,由於我事前已經講好要咩o野菜色,所以我o地全程唔使再講,佢o地自動拎上.頭盤~香煎西瓜配海膽慕絲春卷由於男友唔係太清楚菜色,所以佢聽見香煎西瓜就唔多相信.西瓜上有一撮魚子醬,好surprise,我先食煎西瓜,西瓜只係輕輕咁煎吓,食暖暖地o既西瓜感覺已經特別同甜,加上上面o既生洋蔥粒, 魚子醬同花生碎,鹹鹹地辣辣地又香香地,都幾複雜.而海膽慕絲春卷呢,第一次熱食海膽,除o左海鮮味之外就食唔到其他味,而男友就形容係吞拿魚軟芝士.巴馬火腿黑松露沙律男友好鍾意巴馬火腿o既鹹度,而我就依然覺得配蜜瓜最好食,而個人覺得黑松露黑醋汁太鹹.不過上述兩款o既菜都好新鮮.松露野菌奶油濃湯影好相先嗅一嗅,好香菌味,面上o既泡好輕盈同入口即化,湯好熬熱,菌味濃郁同仍食到粒粒o既菌蓉,而湯o既稠密度控制得o岩o岩好,唔會太’水’,又唔會係落o左生粉咁o既杰.4.-5. 主菜~鵝肝醬香草露筍雞卷,芝士鮮番茄烤三文魚各一放低時,應該係負責人話個雞卷遲o左一分鐘怕凍o左,因為想等埋三文魚一齊上.先講雞卷,頭尾兩件都散開o左,我就食到雞味,露筍嫩口;男友大讚雞肉o既彈實口感+鵝肝醬腍,好過配多士,而且味道都匹配.而芝士鮮番茄烤三文魚呢,呢個亦都係特別o既配搭,番茄配紅衫魚就食得多,但原來配三文魚都幾好食,不過番茄仔內落o左Tabasco,加番茄o既酸又係特別之作,不過,我o地諗唔明芝士o係呢o度o既作用係咩o野.6. 胡麻帆立貝蛋奶意大利麵其實我以為係冇呢個,因為我o地都飽飽地,而負責人端上o黎時話呢個只得一份係share食.呢個睇到都知creamy,我o地又開動喇,呢個係熱騰騰o既,我係咁食,但見唔到帆立貝,只有煙肉同雞絲,芝麻味濃郁,但我o地真係食唔到帆立貝,點解呢?7.-8. 甜品~法式焦糖燉蛋,香濃朱古力慕絲各一我先試朱古力慕絲,呢個唔甜重苦苦地,男友愛佢夠原味,可可味重.而我鐘意佢得夠’挺’身亦都幾滑.不過我要連雲呢拿雪糕一齊食至夠甜.而法式焦糖燉蛋呢,凍o左o既焦糖自然脆口,燉蛋滑同唔太甜,但蛋味好似冇乜.環境:好舒適,燈光雖然暗啲,但我鍾意;只係因只開一部冷氣,我個位有啲熱,問題唔大.服務:好有禮貌,時時留意住同密密斟水,重因為開o左啲音樂,問我o地覺唔覺太大聲.而每上一道菜都會講一講個名.衛生:雖然燈光昏暗,但都覺得幾乾淨.其他:我o地全程用餐時,完全冇上網睇呢間o野,但o衣o家寫食評時,睇到其他會員有試同我o地一樣o既菜色(真好,唔使我o係o度罸打菜名,copy就得. ),至確定原來個胡麻帆立貝蛋奶意大利麵真係冇畀帆立貝我o地,不過我o地o既頭盤就畀多o左一撮魚子醬.最後覺得,以$350.00一位食到咁特別又飽肚,又坐得耐o既私房菜,都覺得值o既,只係真係覺得佢o地要加返招牌o係地下同門口.同樣地,我都係手持電郵畀負責人睇,點知佢第一個反應係話一早知係我. 唔通佢特登冇畀帆立具呢招試我係咪就係愛食?因為我係免費試食,所以冇畀都所謂.如果係,我諗呢招用得唔係咁好,因為如果我真係walk in客,對呢間私房菜o既印象會差o左.…查看更多

 在多次試食活動，印象中這是初次被邀請到試食私房菜！ 今次要先多謝西式私房菜餐廳 Secrettaste 及食友糖小妹的邀請，讓我有機會跟好幾位食友，走上銅鑼灣駱克道的樓上餐廳 Secrettaste 品嚐西式私房菜晚餐！ 位於銅鑼灣駱克道一座唐樓 3 樓的 Secrettaste ，門口跟一般住宅沒有分別！加上門外又無店名或招牌！實在很 Secret 呢！ 當大家走入去，完全是一間簡約西餐廳格局！寧靜又舒適！播放著英文歌！紅色窗簾配合紅色桌布，倍添浪漫氣氛！  同時，私隱度高！另設有 VIP 房！  有位男店員招呼我們，期間，不見他在樓面，相信他也是餐廳廚師！ 晚市套餐，共有六道菜式， $350/位 (不設加一)另外，不收切餅費及開瓶費！   頭盤：香煎西瓜配海膽慕絲春卷夏日炎炎！如果食水果消暑的話，大家必定想到西瓜！ 師傅把西瓜輕輕煎過！外暖內清甜！伴上蔥及炸蒜，初次嚐到西瓜新奇的口感！ 配搭有心思又有創意！ 至於海膽慕絲春卷，外層香脆！內裡的海膽軟滑 creamy！  巴馬火腿黑松露沙律巴馬火腿鹹度恰到好處！鹹香油潤！  新鮮爽脆的沙律菜包括：羅馬生菜、火箭菜、九芽菜、...伴以黑松露加黑醋汁的沙律汁，激酸富菌香！ 松露野菌奶油濃湯把雜菌打得細滑！充滿菌香！  夾雜清爽的洋蔥，味道濃郁！混合湯面的橄欖油，質感濃稠！  而且溫度理想，表面的泡泡入口即溶！  主菜：芝士鮮蕃茄烤鮭魚鮭魚即是三文魚，色澤鮮明證明用料夠新鮮！魚質嫩滑肥美！魚皮香口！  配以蕃茄碎及芝士，十分惹味！ 胡麻帆立貝蛋奶意大利麵口味帶有 carbonara style!  意粉軟硬適中帶煙韌！每條意粉也沾上胡麻醬，酸甜得來富芝麻香！令人開胃！  主角那隻巨形的帆立貝，鮮甜味美！滋味無比！  食完成碟意粉，認真超飽！  甜品：法式焦糖燉蛋 配朱古力雪糕糖漿表層燒至金黃薄脆又晶瑩剔透！燉蛋質感軟滑！甜度剛好！ 朱古力雪糕味道濃郁！混合朱古力碎，增添口感！  可是很快溶！ 為這頓試食飯局劃上完美句號！ 總括來說，食物用料新鮮！份量豐足！絕對超過預期的份量！  加上廚師花了無限心思在賣相方面！整體水準不錯！ …查看更多

若不在家做飯，一般的飲食體驗都是上館子，但若干年前，興起了新的玩意，就是私房菜。我也曾應朋友之約到過這類隱蔽而神秘的場所進食，好處是寧靜，私隱度高，還有做私房菜，廚師對自己有一定的自信，菜式較特別。收到公關之邀請可與太座到銅鑼灣試私房菜，由於要預先準備材料，所以菜單在早兩天已送上讓我們選擇，通知廚師後，到時便可開餐。地點是在銅鑼灣鬧市裏的唐樓，原來同一樓宇內也有數間食肆，見到三五知己相聚，樂在其中。來到三樓按鐘後，一位型男開門，原來他是廚師，這晚的招呼和烹調都由他負責。單位內有數張檯，又分隔出一間貴賓房，而窗簾檯布都是棗紅色，播著柔揚的音樂，來到時有一檯兩位人客在進餐，環境寧靜舒適。是晚餐單如下：香煎西瓜配海膽慕絲春卷，西瓜切成方形，三件並排，在鍋中輕煎，令甜份增加，微暖的西瓜很有趣，上面加了些花生碎，幾特別，但西瓜本身不夠甜，所以效果稍為打折扣，意念則佳。春卷是用薄餅包裹著蝦蓉、魚蓉、海膽等物，外面微焗過，暖身的慕絲更添海鮮的鮮甜，但稍為大件，吃罷已半飽。　 巴馬火腿黑松露沙律，鹹香的煙火腿堆滿沙律上，灑了油醋，沙律清新爽翠，令人胃口大開。 最喜歡喝夠熱的湯，蘑菇奶油濃湯，非常熱，合我心意，蘑菇打爛加入奶油，奶油份量不多，沒有蓋過蘑菇味，啖啖都嚐真才下嚥，很好味。連湯同上一隻牛角包，幾鬆脆，送湯亦見佳妙。    主菜點了芝士鮮番茄烤鮭魚給太座，偌大件的三文魚，用新鮮番茄蓉放面加芝士焗，芝士已溶，增加口感，茄蓉微辣把魚味提昇，兼減低油膩感。我是食肉獸，點了香煎美國安格斯肉眼，牛扒質素本不錯，唯廚師身兼烹調和招呼，稍看少眼，牛扒的生熟稍嫌過了些火，是美中不足，配菜有秋葵令我感動。滿以為吃過主菜便到甜品，端來一碟胡麻帆立貝蛋奶義大利麵，是矜貴版的Carbonara，上面加了兩隻帆立貝，煎得肉汁滿盈，義大利麵煮得很有水準，al dente，加了胡麻汁醬做得很香，真想買一個外賣回家給兒子，因是真心讚好！ 香濃朱古力慕絲，超重量級，比較稠身，較甜，配了新鮮水果，減輕罪惡感。法式焦糖燉蛋，忌廉成份不重，質感和口味較清淡，配雲呢拿雪糕，也是不錯。整個套餐，差不多兩小時才吃完，環境寧靜，若是想不受騷擾，又所費不多，是不錯的選擇。…查看更多