Panash (已結業)

前言：睇完戲，來這兒吃下午茶。食物和評語：我和女友都不肚餓，只叫了一人份的High Tea Set（$68），另點一杯凍牛奶咖啡（$32）。 a. 鹹點：「煙三文魚法包」，煙三文魚新鮮企理，唯法包切片有點潮濕，不脆。「迷你炸春卷」炸得麻麻地，油油濕濕的！ b. 甜點：「迷你提拉米蘇」，乃海綿蛋糕和忌廉各兩層；忌廉味道唔掂，倒是蛋糕部份酒味香濃。迷你鮮忌廉撻，曲奇撻底濕濕淋淋的，相當差勁，撻裡的‘忌廉’大概從氣壓罐擠出來的那種，好快便融化為液體狀，好唔掂！其實店家放吉士奶皇醬會好少少。那片「杏仁曲奇」，有相當多杏仁，好香好足料。 c. 伴碟水果是柑、草莓各一件，唔酸。 d. 跟餐飲品：點了凍咖啡，要求少冰，果然味香濃，奶精亦較別家的香濃，飲後覺得「好滿足」。 e. 另點的凍牛奶咖啡，即是Iced Latte ，相對地較跟餐的那杯凍咖啡味淡，尚可而已。註： a. 仿皮沙發，裝修高雅，侍應有禮積極。食環境、食服務、食刀叉、氣氛！ b. 咖啡水準參差，强項的麵包（法包）處理得麻麻地，失望！

我都試過雙重芝士法包, 我都覺得個包唔夠軟, 車打芝士又係只得幾粒, 係放在包上面既, 而且個包底都幾油, 覺得一般!

芝士丹麥香脆($7.5) vs 雙重芝士法包($9)前者今日第一次試,後者之前起灣仔果間試過一次;兩者比較之下,當然就前者好食好多。先講後者,之前食已經覺得麻麻,但朋友想試,所以今日都食左. 不過,同比較,起海運依間更加唔好食,因為好硬,而且得好少車打芝士,只係得5粒一舊舊芝士,唔覺好味再講返前者,依個包就比較軟身,好"趙"d,而且入面係軟林林既忌廉芝士,有芝士味,亦都帶有少少酸味,個人就比較喜歡. 但係忌廉芝士唔係起晒成個包入面總結: 芝士丹麥香脆會再食

雙味即係只雲呢拿味同咖啡味, 個包有兩種顏色, 白色同咖啡色, 白色既麵包唔多覺有雲呢拿味, 反而覺得有d 奶粉味, 唔通奶粉味即係雲呢拿味? 咖啡色既麵包就有少少既咖啡味, 味道唔係好多唔係好濃, 幾啱我呢d唔太鍾意咖啡味既人, 整個包既配塔好似幾特別, 但個人覺得味道麻麻, 如果係雲呢拿配朱古力可能會好味d !

見到依間Panash 有廿幾個哈哈笑,今日出開TST,專誠黎依到買包包食夜晚8點幾先黎到,包已經得返好少,相信d包都唔會太新鮮,不過唔mind,試下姐試左個「芝士軟心包」,食落去同聞落去都好有cheese味,個人就好鐘意第二個係「一口芝士」,即係cheese ball,同Italian Tomato,Yamazaki....等等既果d cheese ball好唔同,Panash既依隻有herbs同bacon,所以特別香,味道當然ok啦,不過我睇左好多個食評都冇講佢有herbs同bacon,係咪我食錯呢?!最後係「提子scone」,我最鐘意依個,因為佢係甜既,好食過麥當當果個好多,同A-1既提子scone相比,Panash 既就比較鬆軟,真係好好食,我仲揀左個有好多提子既添,不過食完有d飽

我見到呢間Panash有三款scone,包括合桃芝士忌廉鬆餅($6)、提子鬆餅($4.5)、提子肉桂條($7.5)。三款都試過,但就發現質感有好大分別!提子鬆餅硬實實,簡直係提子餅乾!合桃芝士忌廉鬆餅又似番scone 喎,外脆內軟,質感唔錯,面頭有幾多糖,所以安甜味,但係忌廉芝士就好唔勻,雖然份量夠多,但係偏埋一邊,合桃好脆,都唔錯既!提子肉桂條上次都講過,似蛋糕多過scone囉!

今日係科學館睇完果個人體解構....見有D肚餓....走左黎醫肚....左揀右揀....揀左個high tea set...有一個迷你雜錦三文治(其實係一塊法包上面加D生菜&一塊煙三文魚)....一件果tart (五蚊銀咁大)....一件朱古力曲奇...一件咖喱角.....一件迷你得很既tiramisu....半個士多啤梨...一舊已去皮既橙....加一杯香桃茶...$68 for one....黎到後勁後悔....唔係後悔佢既份量& 價錢...而係醒唔起自己戒緊口....好多野都唔食得....我淨係食左塊煙三文魚...同半件tiramisu.....仲偷食左果tart上兩小舊peach....六十幾蚊只係食得咁多....激死....鬼叫自己咳到死下死下咩>.<...不過好彩杯香桃茶好好飲....

就一些牛奶提到既北海道包,我巿少少補充,因為我都岩岩食左。個包無錯真係幾軟同埋甜甜地,不過牛奶味唔係咁出,而包面的一層甜皮,的確係太黏,由於呢個大包係錫紙兜裝,個兜同層甜皮之間有一條邊,個條邊都係甜,不過就太油。一包$12.5, 好大個,一次食完都幾飽!不過各位食家要注意,北海道包同迷你北海道包($7.7)差好遠,前者無餡,後者有tiramisu 餡,個人覺得前者味道較佳!

北海道包!係袋裝既麵包, 一大個圓形既包, 有一個錫紙兜裝住, 係甜甜地既包, 而包面就再甜多少少, 有d奶味, 有d牛油味, 又有d蛋味, 個包好軟熟, 但包面比較濕, 如果用手”搣”黎食, 會黏住d手指, 不過就幾好味, 唔係好甜, 食得過! 紅豆小方包!一袋有八片, 個包好軟, 入面有d紅豆碎, 唔係原粒既紅豆, 而係已經整到好碎既紅豆, 所以口感上係唔會食到有一粒粒既豆, 我反而幾鍾意! 味道方面雖然唔多覺有紅豆味, 但勝在清清地, 又細細片咁,幾好味, 都食得過!

見到C_A話玉桂提子棒好食,我就專登買黎一試,真係誠如C_A所言,根本唔係scone,提子棒好重手,摸落好硬,我最初驚會好漏,不過好在個心唔硬,係軟軟地,又真係蛋糕多d,不過我覺得其實似muffins,玉桂味好重,好似果皮味咁,除左提子之外,好似仲有其他料,因為我見到一粒粒紅色既東西,但係食唔出係。個人覺得一般,唔算好好味, 但係都ok。

這間panash 好似係唯一一間分店不用蓋蓋住麵包。因為這一間分店人流不少，特別是星期六日及公眾假期。麵包雖然可能好快賣晒，門面上也高級了不少。但都係用個蓋蓋住好些，事關好多人對住d 包gossip下食邊個邊個咁。令到包面滿怖口水，好唔衛生。

我有少少唔同意雪儀既講法, panash 既一口芝士小食冇咁”un”, 同埋係有芝士味既, 但beckenheim 和A1既麻薯波波球, 就唔係芝士味, 又比較”un", 有芝麻和朱古力兩款, 但只不過係芝麻粒和朱古力粒, 我唔太鍾意食, 我鍾意panash 既多d, 至於聖雅多和山崎既葡式芝士球我就未食過!

分開幾次黎買,終於試晒呢度咁多款芝士包。(1) 芝士包($12)—係一袋既一條大包,切成十片方包面已經見到一粒粒既車打芝士同烘既芝士,非常吸引!方包非常軟,而且每片都內藏大大粒既車打芝士,好有芝士味,芝士份量比心既車打芝士包多好多,不過唔知係咁岩定係袋袋都係,我個袋包既車打芝士偏埋左去左邊,右邊就無乜芝士。鍾意食芝士既,會覺得好好好好味!(2) 芝士軟心包($7)—唔明點解個名叫「軟心」,因為其實個心係一條硬實實車打芝士,個包幾長條芝士就有幾長(個包係長條形),所以每一啖都食到芝士,而且芝士有一定厚度,包同芝士既比例近乎一半半,所以好有芝士味,真係好正!雖然條芝士同delifrance 忌廉芝士軟包既芝士差唔多,但係呢個既芝士中條d,芝士份量比例又高d,仲平$0.5添!不過,包面有d香草味既粉,有少少影響左味道,如果唔加呢d粉就perfect!(3) 隻重芝士法包($9)—圓形法中間包開左個窿窿,一望已經見到好多半溶既粒粒車打芝士,雖然個包靭靭地,但係混雜左黑芝麻,都幾香,裡面既芝士都唔少,又係好好味!(4) 芝士丹麥香脆($7.5)—呢個一定要熱食!因為熱食先食到外脆內軟既感覺。所謂

上星期日同個好耐冇見既朋友食tea,本來想去colorado點知大排長龍，記得呢度開左新店，就行過黎試試.地點真係幾僻，響玩具反斗城那邊，都要問下人先搵到. 一黎到就有卡位坐,幾舒服,不過由於地方唔大,所以都幾嘈下. 呢度入面係餐廰，出面賣麵包，經過時一定聞到麵包香，令人食慾大增. 眼見麵包款式比其他分店多，好吸引噃~ 同朋友叫左個club sandwich share,另外叫左cappuccino同一杯紅豆綠茶牛奶. 飲品先到, 我杯cap好細杯，面頭dfoam一攪就散，唔夠香又唔夠濃，同UCC一樣賣三十幾蚊,但質數實在差很遠. 杯綠茶牛奶好稀又唔夠綠茶味,唔掂. 等左好耐個三文治先到,又熱又脆既香草包夾住豐富餡料,有蛋、生菜、蕃茄、煙肉、雞扒等,雞扒同蛋都整得好好味,幾有水準.睇黎呢度都係麵包正d,可以推介比鍾意食包既朋友.但如果淨飲野,都係UCC或者colorado好d~

panash呢排好長進, 成日有好味o既新產品. 今次係穀麥丹麥條, 係一條好長o既丹麥條, 上面有icing sugar, 再加d cereal. 個丹麥條好脆但係唔油, 加埋d icing sugar, 甜度o岩o岩好. 由於長長一條, 當早餐夠晒飽!