影片
相关文章
依家不多buffet有生蚝食，仲要价钱折左后都系$3xx! 啱哂我同屋企人，一行10人黎庆祝食饭！餐厅只做一round, 所以享餐时间可以好长！又唔洗迫自己系2小时内狂食~可慢慢同屋企人倾下计，出去攞下野食～虽然食物选择不选多，但服务好，味道不错！生蚝每次每人攞2只，好公平，唔洗怕俾人攞哂！今次有一款美国，一款澳洲的，不错！长脚蟹就每次一出，就好快俾人攞哂haha甜品都好多选择，d甜品蛋糕仔又真系几好味添！其中一位屋企人仲连食左4杯hagen daz haha!熟食既味道都不错，如可多少少选择就更好了！唯一唔好既我觉得应该有咖啡茶普通果汁可以俾人免费添饮，因包一杯餐茶好似唔系好够。
继续阅读
旧时一向服务好好，生壕任啰，今日好失望，旧时即开任啰既生壕，今日每人只准啰二只每一次。重要生壕有沙，已经无左即开。又无左黑毛猪。。无得任啰～服务员又小左，后来我座座下，发现原来做紧团购，但个团购同无团购价钱一样。呢下先好野。
继续阅读
无意中上网见到呢间buffet有6折优惠，再上黎open rice度睇食评觉得可以一试所以早3日book左，好彩仲有位… 而听电话嘅staff亦都好有礼貌夜晚buffet 6点至到10:30，比其他酒店buffet嘅时间长… 果日6点几去到，都仲有好多吉位去到8点全场就full哂！食完之后总括黎讲食物款式唔算多，不过想食嘅野都有齐哂个人认为长脚蟹不错，但波士顿龙虾就略逊一筹… 毫无龙虾味，而生蚝质素参差…不过$360有得食波士顿龙虾、长脚蟹、生蚝，法式宝云酥烧羊架… 仲想点？另外睇到网友8月去果阵仲有加送一杯夏日特饮同埋佛跳墙或椰汁炖燕窝… 但我今次9月黎3样都已经无供应了而甜品方面最吸引都系Häagen-Dazs杯装雪糕… 其他甜品款式唔多… 9点果阵好多cake款已经无哂亦都无再refill...可能因为配合返PALETTE个名嘅关系，餐厅嘅灯都好cyber，系几特别… 不过影相出黎就唔多靓个人黎讲encore机会不大… 但都系果句，呢个价钱试到咁多野都算系抵，出面都无乜边间酒店buffet做得到可以都可以一试。
继续阅读
六折嘅吸引力确喺几大，虽然，知道都喺啲商业策略，但折咗计番实价，$350一个自助晚餐，仲要喺晌间4星酒店，依个时势真喺唔多，唯一喺位置被人感觉吊脚，其实识行，港铁红磡站行过嚟都只喺10-15分钟，迟啲有埋港铁黄埔站、土瓜湾站仲方便。讲咁耐，今晚就喺嚟到新开一年左右Hotel sav嘅Palette大叹自助晚餐。店名Palette意思就喺调色板，所以，整间店嘅装修都环绕番店名嘅主题，就好似餐厅中嘅店名，会不断转色；若再留意吓，周围嘅灯光亦同样会有所变化。唔知喺咪咁嘅缘故，座椅都用上透明胶椅，令整体有种通透感，只喺感觉无咁好坐。至于服务方面，整晚都几好，上特色食物、收碟、食物补充都好到位，啲侍应都好有礼貌。摆放食物嘅区域，其实一出一楼嘅酒店前堂，已经见到。甜品类嘅食物就放晌餐厅门口嘅长枱，似喺有目的咁以甜品嚟吸引酒店客人。而入到餐厅内，左边一字几十呎长枱就有海鲜、沙律、冷盘、汤品、面包、热盘……等等大部份食物。此外，近门口右边则有几款私房特色菜、即煮意粉档及香烤切肉。综合而言，可能基于场地问题，食物嘅选择唔算好多好多，但类别以言，可谓样样都有。故此，今晚都有啲信心可以试匀大部份食物。餐厅为想更提升自助餐嘅吸引度，所以，除每位客户可以拣选一款高档菜式外（佛跳墙或椰汁炖燕窝），更每位客人奉送一客海鲜炉端烧，并获赠一杯夏日特饮。另外，餐厅亦推出「无张添加饮品」推广（$40-$90），任饮汽水、果汁、啤酒及餐酒，不过，自助餐本身已另包一杯餐饮，再者，加送一杯夏日特饮，已经好够。沙律、冷盘又喺小弟惯常食自助餐嘅攻略，就喺先嚟一大份沙律夹少少冷盘。先介绍吓有咩选择先，沙律方面有4款沙律菜、6款配料、6款酱汁，足够简简单单砌份靓靓仔仔嘅沙律，不过，酱汁嘅摆位真喺有啲问题，晌两组食物箱嘅中间隙位，队只碟埋去时就好难「毕」啲汁，唔队埋去呢，啲汁好易泻去另外啲酱汁度，沟到杂晒就唔好啦。冷盘方面，有啲的骰嘅味付螺肉、玉子豆腐之类，此外，仲有烟三文、冻切肉肠。当然，小弟会加埋啲巴马火腿落我碟杂绵沙律度啦！睇见我份沙律喺咪几正呢，要齐4款沙律菜做底，淋上低脂意大利油醋及蜜糖芥末汁，再放上几款配料及多种冷盘食材，咁食法食自助餐先过瘾。沙律菜新鲜爽脆，但比较钟意佢啲烤灯笼椒及杂菌；而巴马火腿颇油润，但嫌佢片得细块及碎咗啲，反正自助餐都喺任人夹，片得靓仔啲会俾客人感觉好唔同。海鲜炉端烧食完我嘅「头盘」，侍应啱啱好送上海鲜炉端烧，初时出去影相见有炉端烧，一只大船模型摆放多种海鲜，非常吸引，已经喺今晚必食嘅菜式之一。烧海鲜包括有大虎虾、新鲜带子、鲜鲍鱼，烧好后再伴上茄子及秋葵，成道主菜咁。虎虾爽口弹牙，带子鲜甜爽嫩，鲍鱼烟韧咬口，食得出3款食材本身都有质素。佛跳墙食自助餐断估都唔会一个人架，所以，一人点一款，就可以试匀佛跳墙及椰汁炖燕窝。先试试个佛跳墙，有个一套装好似紫砂茶壶类嘅器皿，先倒点沙饮番啖，精华即喺精华，清润无比；内里嘅鲍鱼仔、瑶柱粒、冬菇都好好食。椰汁炖燕窝睇样就真喺平平无奇，就好似平常嘅椰汁西米露之类，就算呷一口个椰汁底，亦唔好有期望会有咩惊喜。不过，捞一羹燕窝真喺吓亲，啲燕窝多到呢……仲要唔喺碎燕㖞，真喺好坚，咁多燕窝梗喺留番俾老婆食啦。冻海鲜海鲜阵容相对弱啲，感觉无咁有睇头，但其实已经有波士顿龙虾、日本松叶蟹脚、加拿大翡翠螺、纽西兰蓝青口4款，都算喺精选嘢。其实，有时食物唔一定要好多，最紧要具质素，俾十几款海鲜你，你亦未必试得晒，但样样都普通货色，就更加无意思。一碟过海鲜拼盘执齐4款，龙虾虾肉好爽甜，松叶蟹脚带浓浓海水嘅咸鲜，翡翠螺喺呎码比较大嘅品种，而咬落爽口，蓝青口质素都唔差，唔好好似食擦纸胶咁，亦带少许鲜甜味。夏「逸」特色饮品喺时候清新吓喉头再继续，所以，此时先点指定嘅特饮。特饮共3款选择：夏树苍翠、一缕阳光及绯红夏日，都喺啲鸡尾酒式嘅饮品，但为方便大众，亦可以选择无酒精版本，而我哋都唔好酒，所以同样拣上非酒精版本。夏树苍翠，喺以荔枝及奇异果打成嘅半沙冰半果汁嘅饮品，入口非常爽甜，不过，老婆就话有少少偏甜；一缕阳光，喺芒果沟鲜奶嘅组合，啱晒我，因为沟入鲜奶，所以芒果味唔会浓得好夸，但阵阵芒果清香，又有种奶滑绵绵，唔错。芝士、干果依家好自助餐都有芝士供应，往往都有三几款，依度就共有4款选择，包括：巴马臣（Parmesan）、瑞士葛瑞尔（Gruyere）、布里（Brie）、伊丹（Edam），仲伴有啲合桃、杏脯同鲜提子。我同老婆都喜欢食芝士，所以，由佢操刀，砌份芝士碟，配点克力架、干果……等等。几款芝士都各有唔同，小弟就较喜欢布里芝士，软软嘅口感，配面包就最好。私房特色菜近门口位摆咗啲虾干粉丝煲、黑醋镇江骨、桂花茶熏鸭及杨州清炖狮子头，都喺啲唔同地方嘅特色菜，不过，用到「私房」一词感觉就有啲被夸大少少。当中，兴趣大啲喺个狮子头，因为可以当炖汤饮，亦无预期中咁肥咁油，颇清甜，个狮子头好松化。餐汤、面包篮汤品中汤代表喺沙参玉竹煲猪骨，西汤就喺忌廉蘑菇汤；而面包篮反而颇有睇头，百吉包外，仲有啲面包圈及德国Pretzel。因为睇啲忌廉蘑菇汤外观几对办，所以，配两小件百吉包试试，估唔到真喺几得㖞，质感厚身而滑溜，菌香十足。热盘就放晌食物枱近尾部份，凭相片纪录应该包括有清蒸海星斑、甫鱼姜汁炒芥兰、印度香辣烩鸡、咖喱杂菜（配白饭及油酥饼）、蜜烧猪仔骨、烧菠萝、烧青瓜、芝士焗海鲜、扒鸭胸配苹果莎莎、煎鱼柳配普罗斯旺菜、意式犹太烩牛肉、炒时蔬、烧薯仔，印象中好似无转过款。因为选择的确唔多，所以，就一碟过已经差唔多试得匀。样样少少，志在试吓味道，整体而言，热盘做得唔错，最钟意喺扒鸭胸及烩牛肉，前者配上苹果莎莎令鸭胸带点甜酸，好平衡；后者则味道香浓，口感柔嫩。较做得麻麻喺啲香辣烩鸡，咖喱香得未够层次，鸡肉稍稍嚡。即煮意粉、羊架上文都有讲过有即煮意粉档，行过时见即煮得香气四溢，所以，都贪过瘾点一碟试试。意粉有原味、香辣及香草味，酱汁可选蕃茄汁或忌廉汁，而配料共有10款，例如：火腿、烟肉、蘑菇、洋葱、灯笼椒……等等，而即煮意粉档隔离就喺烧羊架。老婆少肉多菜，所以，除咗火腿、烟肉，咩配料都要，意粉要香辣味，再配蕃茄汁，加多一支羊架，就做成小弟依一碟羊架蕃茄香辣意粉。意粉煮得好有咬口，食落真喺有啲辣辣哋，个蕃茄汁底亦好酸香。至于条羊架，入口好嫩，羊味唔算膻，搽上芥辣就更滋味。餐饮去到近尾声，又喺甜品时间，所以，嗌杯热咖啡衬一衬，老婆则要红茶，帮帮手消吓滞，红茶则以整壶咁上。甜品先一次过介绍吓有咩选择，就喺绿茶味朱古力喷泉、葡挞、黑松露朱古力慕丝、柠檬蛋白挞、青柠啫喱、意大利芝士蛋糕、绿茶豆奶布甸、西瓜蛋糕、木糠布甸、朱古力香蕉蛋糕、芒果慕丝奶冻、法式蓝莓布甸、窝夫、Haagen Dazs雪糕，阵容不俗。而甜品长枱下面仲有生果拼盘，分别喺西瓜、哈蜜瓜及鲜菠萝。虽然样样都想试，但都明白量力而为嘅重要性，任食啫，唔使搏命嘅，故此拣咗当中最心水嘅8款作为我嘅甜品拼盘。试过之后，确喺有水准，黑松露朱古力慕丝最有惊喜，入口松露味真喺涌出嚟，慕丝好柔滑；其次，属上佳之作仲有柠檬蛋白挞、青柠啫喱，因为前者味道轻盈，柠味清新，挞壳脆口，而后者青柠啫喱酸香醒神，最有心思喺啲分子珠珠，咬爆之后喺蜜糖浆嚟，平衡番青柠嘅酸度。此外，绿茶豆奶布甸、西瓜蛋糕、朱古力香蕉蛋糕几款都喺出色嘅出品。Haagen Dazs雪糕作为最后冲刺，就以HD雪糕作结，雪糕共有4款口味：云呢嗱、朱古力、士多啤梨及夏日杂莓，全部喺细杯装。要咗其中3款口味，而HD雪糕唔使多介绍，总之最后叹杯雪糕真喺好爽。如果你个预算好有限，唔理好丑，但求有大堆头过百款嘢食，咁Palette唔喺你杯茶；相反，贵精不贵多，几百蚊位同屋企人或朋友食餐自助晚餐高兴吓，Palette值得考虑！
继续阅读
见到团购 buffet 黎试下~ 七点到场都几 full~ 但食物款式都几少~ 最吸引有龙虾同 ham~ 同埋羊架同龙虾汤都唔错~ 其他热盘就麻麻地~~ 甜品反而几有惊喜~ 呢个西瓜蛋糕好得意~ 不过太甜~ 木槺布甸好好味~ 仲有绿茶喷泉添~ 每位送一份炉端烧~ 有大虾带子同鲍鱼👍🏻 全部都几新鲜😁另外每位可选择佛跳墙 or 炖燕窝~ 都几足料~ 每位除左餐茶外仲有杯特饮送🍸但味道麻麻~服务都几好~ 员工有礼亲切👍🏻但地点太唔就脚~ 试下都可以的~~
继续阅读