通達食店

营业中

休息中

遠近馳名粢飯 ❤️ ($18)評分：7/10.終於有機會試下佢地好出名嘅粢飯，入面有肉鬆同油條，油條都幾大條但係唔脆 😐 如果可以加番啲脆片或者炸蒜片落個餡到應該會更出眾。其實飯嘅份量都幾多，食吓食吓會悶 😛 不過香港地出名粢飯嘅地方好似冇幾多間 😶 佢係正地鐵出口嘅隔離所以行開油麻地過嚟食吓都幾方便香茅雞翼 ❤️ ($19/3隻)評分：8.5/10.因為口痕嘅關係叫多咗客雞翼嚟食。香茅味好出而且煎到邊邊位啱啱好係脆口嘅 😍 可以隊多幾隻都完全冇問題

早餐要食呢度pack好嘅三文治 11蚊 (我估都大量出面買）， 有麥包款 / 白麵包款揀，餡就有碎蛋 ，青瓜蕃茄絲，吞拿魚等等。不過我鍾意碎蛋多啲，加野飲就加12蚊左右。凍奶茶少甜，滑有茶味👍另一樣要食:蠔油魚蛋，真係有魚味，而唔會得堆粉。加少少甜醬更好味，撈埋淡淡蠔油味，十蚊六粒貴左少少但值啲人話辣魚蛋都好食，不過我唔食辣

突然間好想食粢飯豆漿，走左去油麻地通達，呢間舖一向幫襯開，有時去花園街嗰間，但想坐得舒服就要黎油麻地呢間舖。兩個人，二話不說整個粢飯、油渣麵、四條腸粉加串辣魚蛋。粢飯雖然唔係心中最好食嗰間，但解解饞黎講都收貨，即叫即整、油炸鬼雖然唔夠脆，但飯唔太淋又夠多肉鬆，都叫唔錯。至於油渣麵，唔知點解今日湯唔夠熱，料包括火腿絲、冬菇絲、豬油渣、辣菜甫同蔥花，好惹味。腸粉$14四條，不過不失。呢餐埋單唔駛一百。

$18原本想食桃園眷村嘅但係見到太多負評搞到唔太想去🤣因為好想食飯糰所以最後決定去通達食粢飯😙雖然油炸鬼已經唔脆但係成個飯起碼係熱辣辣嘅☺️好想知最港最好食嘅粢飯喺邊到事關我真係好鍾意食粢飯🤤

好耐之前食過呢間，覺得唔錯就帶台灣朋友黎食下。坐低咁啱我朋友想食粥，但阿姐話過左3點無粥食，坐左陣又睇唔啱其他想食嘅野，唔好意思就咁走左去，就起身外賣左串魚蛋。點知另外個阿嬋串串貢，眼超超咁話：下乜你地未嗌野㗎？坐咁耐（坐左5分鐘都唔知有無，仲要間舖入面d位吉左8成）淨係嗌串魚蛋？坐喺度傾計阿？ 姐係我都知就咁坐左陣唔幫襯唔係幾好，咪買左串魚蛋囉==，仲想點，洗唔洗買起埋你間鋪先走得啊？串魚蛋仲有d腥tim⋯咁做生意賺多左嗰百幾蚊會發達咩🙉呢間請我都唔會再食！

凍凍地，想食少少嘢取暖一下，今日搭巴士去旺角在碧街落，行經通達，便諗住試下生菜魚肉……同姪女一人一碗，我姪女話佢只鍾意食呢度嘅生菜魚肉，啲魚肉係切粒粒，同食開果啲一條條吾同，生菜也是切細上，姪女話呢度一向都是這樣的，我覺得雖然怪怪，但形狀不是最重要，最緊要係味道，飲了啖湯都幾好，我加咗啲麻油及胡椒粉，湯夠熱辣辣，魚肉也煙靭，份量ok，咁經典嘅兒時街頭小吃，值得一試，比起我上次嚟食嘅咖哩魚蛋、魚蛋好食……

趕住返學又吾知食咩，出地鐵站見到呢間於是就食呢間。見油渣麵好似幾出名，但都係想食車仔麵，可以自己揀咩餸。車仔麵$36--要左爽口魚肉、雞翼、豬紅、油麵、牛腩汁。都唔錯，雞翼係滷水雞翼，好入味。魚肉真係爽口彈牙，一粒粒份量又多，好耐未食過咁好食既魚肉。整體上都吾錯。

今日夜晚要去油麻地上堂，上堂前食小小野頂肚，本身想食下腸粉、魚蛋、燒賣果啲，但得一個人，免得眼闊肚窄，都係叫碗油渣麵算。入到鋪頭，環境都算乾淨企利嘅，一坐底啊姐就問你食咩，好彩一早諗定姐，叫完唔洗1分鐘，碗油渣麵就出現左係你面前，快到呢賣相唔錯啊，我揀左要辣，原來辣同唔辣嘅分別，係在於個菜甫，其餘湯底、配料係一樣嘅，啲麵軟硬適中，食得慢都唔會索哂湯，不過油渣得幾塊，姑寒左啲喎，話哂以$30黎講，都偏貴，應該大方啲囉，不過其他配料:冬菇、蔥果啲就好香嘅，湯底偏淡，配埋菜普就啱啱好，食完唔會話好口渴，整體黎講都ok嘅

早2日喺油麻地出job，咁岩喺呢間舖附近，其實每次經過都好想試下佢嘅油渣麵，咁岩今次有機會就入左去食。首先黎左份魚蛋，$10/6粒唔算平，但真係好好食！唔會好似出面果啲咁冇味。第一次食油渣麵，$30碗，原來碗麵係完全唔油！啲豬油好爽口，湯底麵好好飲，有少少炸蒜，最估唔到係個麵底，我以為係烏冬，食落原來係一種好爽口嘅麵底！真係好特別，真心推薦！由於太好食，我第二日都係黎多次食油渣麵😂 平時好少可同一樣野食2日，但呢個堅好食冇後悔。

呢排自己無故追捧油渣面，春潤堂都食左三次。今朝去左呢間通達食店試左招牌油渣麵。生意唔錯，星期天上午都好多人外賣。拿拿聲左油渣麵要辣嘅，辣菜圃係店家分配，無得自己加(呢樣巳扣分)。麵上枱時面頭係辣菜圃，下面無啦啦有大堆火腿！之後係薄薄菇片，最後只得三幾塊油渣。湯頭唔算好喝，辣菜圃夠咸香，油渣較淋無乜咬口，D火腿太多太多，格格不入，唔知想點！成個感覺係去錯地方食錯野，唔想浪費時間，、食剩半碗走人………………

外地朋友來香港, 好想食香港地道的食物, 但係在旺角真係人多車多, 天氣又熱, 好難有心情係街上掃街.咁就帶佢地黎呢間人流多, 效率快的鋪頭.大家又唔想食得太飽, 就決定只叫餸唔叫麵啦.腸粉好滑....配豉油麻醬甜醬好好食咖哩魚旦佢地話好彈牙, D 汁可以再辣D 就好(我都唔食得辣, 好, 即刻叫一個辣的比佢地試, 佢地話真係辣, 不過真係好好食)東菇豬皮好入味, 又"淋". 豆漿好濃味, 本身諗住食吓野醫吓肚, 點知太好食再追加, 最後食到大家飽晒, 

今晚要上瑜珈堂，因為唔可以空肚上堂，所以要食啲嘢，行開油麻地，好耐冇食過通達豬油渣麵，就過去食一食我叫咗辣味魚肉豬油渣麵，有辣菜甫，魚肉，豬油渣，火腿絲，冬菇絲，湯底好鮮甜，麵條好有口感，魚肉好彈牙，豬油渣好煙un，辣菜甫好爽口，整體上都好食，32元都算抵食。

星期日係附近開工，買早餐，又唔想食快餐，好彩呢間老字號有開(^_^)v。每次經過呢度，係返學嘅味，會係度食個下午茶，飲杯豆漿。（＾◇＾）真心早，7點半就到，好彩有開門，都有附近嘅遊客嚟買早餐。對上一次食已經係幾年前食魚蛋。炒麵$17，仍然都係呢個味道，蔥同芽菜分開上。不過略微油得濟。。。腸粉（4條$14）真心一般，皮略薄，甜醬唔夠甜，份量算少。。。魚蛋燒賣各一串（一串10元5粒），辣味都ok，正常，唔特別，不過確實貴左啲。整體只能說食回憶，不過可能幾年後先再光顧(^^;;

每次經過往油麻地地鐵站，無論小小餓或多多餓，也會很自然幫襯吓！小小餓我喜歡吃魚蛋燒賣，餓餓哋就會吃腸粉！這裡的腸粉夠熱夠滑！當然要加甜醬麻醬，味道一流，相比旺角的小食店，這裡較整潔衛生，店外常常有大堆客人，但怕熱又有時間可以坐店內加杯飲品慢慢吃。另外，這店的豬扒味道很好，我老公每次必吃！話醃得好好吃不仿一試！街邊小吃消費有限，如果遊客當試試香港特色小食也很適合（有得堂食嗎！），所以我有朋友也會帶他們試試！

呢間通達食店位於油麻地A2出口門口位置便利，而且主打速食小食，經常經過都會見到好多人聚集篤串魚蛋燒賣今日經過附近見有啲肚餓，好想速食一個下午茶，便入店內坐下店內只有簡陋裝潢，餐桌同餐牌都係油油的，充滿道地小店特色諗緊食咩好，發現佢啲小食都幾貴，$10/5粒魚蛋，但佢既咖哩魚蛋入味彈牙，值得一試最後決定叫一個性價比算高既車仔麵有多款餸菜可選，選擇魚蛋比單叫平$1最少要叫兩菜一麵，最低消費$27仲可以加咖哩/沙嗲或牛腩汁揀左加沙嗲汁，叫左魚蛋木耳河粉魚蛋一貫入味又彈牙，必食！木耳切絲，非常爽口，不錯加埋沙嗲汁成碗車仔麵濃郁惹味，係一個令人滿足既下午茶