花果園餐廳 (已結業)

最近幫襯左幾次黃店【花果園餐廳】，食物外表看似平平無奇，但食得出其心思同真係好健康！早午餐選擇超級多，奄列/常餐/歐陸早餐應有盡有，Lunch仲多選擇，是日精選/皇牌沙律組合/番茄湯/魚湯米線，真係要睇一陣先決定到食咩。鮮竹墨魚卷番茄濃湯米線 $46番茄湯底清甜健康，米線較硬身，係我中意的口感。鮮竹、墨魚卷亦非常足料，墨魚卷大概有6件，質感又香又彈牙，食出淡淡的鮮味，鮮竹超多片，浸到軟身但唔會過爛，整體覺得好好食而且無味精。日式餃子魚湯米線 $44用魚湯熬制，特別鮮甜美味，配搭超多的酸菜、芫荽，加添食材香味，亦有助解膩消化。餃子有4隻，煎得熱辣辣但未夠香脆，豬肉餡料幾好味。

天氣炎熱，lunch想食d清新食物，於是去左花果園，門口好多人等位，但入坐都算快，餐廳坐位比較窄，亦預左要搭枱。沙律餐感覺比較健康，而且係穩陣之選，叫左白汁吞拿魚牛角包，個包夾住好多生菜吞拿魚，醬汁都幾多，揀配雜果沙律＋吞拿魚沙律，雜果沙律竟然有椰果，整體份量大，材料豐富，真係鋪滿哂成隻碟，而且都幾好味，價錢＄56，跟餐配飲品，精選熱飲加＄4，試左熱黑糖薑茶，好重薑味，都幾辣，另可選配新鮮果汁加＄10。偶然唔想食咁漏既野，呢間係唔錯既選擇。

我好鍾意食生果，直頭可以當正餐食，不過主打生果嘅餐廳唔易搵，好彩最近喺屋企附近發現咗一間，仲要質優價錢平🤤。花果園餐廳位於九龍灣工業區，剩係做早午市。叫咗個皇牌經典套餐，包括一份三文治，兩份沙律同飲品，三文治嘅麵包有五個選擇，餡料則有八個選擇，我揀咗黑椒牛肉香草包。一啖入口，只覺麵包充滿番茄嘅香味，入面嘅餡料除咗黑椒牛肉之外仲有青瓜片，兩者一葷一素，味道搭配非常得宜，好食👍。沙律方面，我揀咗花果園沙律同埋吞拿魚沙律，前者全部都係時令生果，我幫襯嗰日就有奇異果，菠蘿，蘋果，哈密瓜，火龍果同士多啤梨，全部鮮甜多汁，食到我欲罷不能😂；後者用沙律醬撈勻吞拿魚，粟米，火腿同生菜絲，好似細個讀書時聖誕聯歡會同學仔整嗰啲沙律，雖然簡單，但係既飽肚又滋味，仲有點點懷舊嘅感覺......

每次經過都見到有好多人排隊，見到佢有鮮榨果汁都幾吸引第一次試咗佢嘅番茄湯底米線個湯好清無油花，如果你係莞茜怪，真係好啱食成碗有好多鮮切嘅莞茜勁香😂咁當然你可以走青啦😆嗌咗杯鮮榨密瓜汁，非常真材實料好好飲個餐本身唔貴，加鮮榨果汁都係加$10，價錢好ok佢仲有個水果加包嘅餐，食過一次但唔記得影相係超級飽，同埋啲生果係好新鮮好甜，份量又好多如果夏天到我應該會成日食🥰最緊要係啲員工好好人，放心傾計🥰

人人黎到都會食沙律餐，但我偏偏唔鍾意食沙律，所以每次嚟到都會點墨魚丸米線。今次第一次叫蕃茄濃湯墨魚丸米線。湯底，很清甜，坊間的番茄湯飲落好多時好味精同加左茄膏，但呢度既相對健康，墨魚丸，係我大愛，一碗有六粒，又好食米線，正正常常，而份量相對比較多，食完必定飽加埋熱檸茶，合共46蚊

又係到九龍灣搵食嘅時候，天氣開始涼，終於可以行去離公司遠d嘅地方搵食，呢間花果園lunch time次次都企滿人，我當然唔會錯過啦！今日去食佢嘅特色沙律餐，可以揀一款包連一款美食，再揀兩款沙律，份量充足，水果沙律新鮮好味，食到飽飽! 推介! 我選咗香芒雞肉配牛角酥，再配花果園沙律同雜果沙律，真係超滿足! 仲有飲品奉送! 抵食之選，唔怪得日日都咁多人排隊!

經過見裝修幾新幾乾淨就走左入黎食早餐.叫左個百搭早餐!都幾豐富.兩餸(炒蛋加漢堡扒配麥包)加個麵(粟米米線),再加杯飲品都係29蚊.食到我飽飽!好健康.比我搵到間食得咁健康既餐廳好難得!

午餐時間都比較多人有次黎到等左半個鐘都未入到不過唔緊要，再接再厲再去食都終於比我等到了當然食皇牌經典套餐煙三文魚配牛角酥，配花果園沙律同田園沙律因為粟米蛋沙律已經賣完唯有要田園沙律煙三文魚略嫌較少，牛角包都脆身酥軟，花果園沙律用新鮮生果，非常健康，唔似一般餐廳用罐頭沙律，田園沙律粟米好多食完都好飽，女士可能會食唔哂，男士就一定夠食朋友就叫左蜜桃火雞配法包，配花果園沙律同煙肉西芹薯仔沙律試左個煙肉西芹薯仔沙律，都好好食，西芹融入係沙律入面提供左爽脆既口感，煙肉亦豐富左味道，不單止得薯仔味如果較大食既朋友可以叫薯仔沙律，非常之飽總括而言，鍾意食沙律既朋友可以黎試下，非常抵食，但唔好以為係輕份量，係會飽到食唔哂

Weekend finally here, and we decided to vegan fresh. We came to Kowloon bay today to try out this new fruit/salad/healthy based restaurant. we ordered two afternoon set, fruit salad mixed with fresh ingredients. The fruits are sweet and portion was big. Definitely satisfying as a fruit lover. quite full too after finishing the whole plate. he ordered a 🥐 with peanut 🥜butter and sweet cream inside. Bread was served hot and with a large amount of sauce inside the bread. Again, satisfying for sweet

今日行開九龍灣，本來諗住順便過megabox食嘢，但經過呢間野見d嘢食幾吸引，下午茶set又幾抵就入左嚟我就叫咗碟咸牛肉蛋牛角包，同平時食開嘅三文治版唔同，佢係啲咸牛肉係包咗係蛋入面煎，呢種煎法唔會令到咸牛肉個種咸香味蓋過雞蛋本身嘅味道，同牛角包嘅香脆口感好夾，好值得食朋友就叫咗炸雞髀配薯仔沙律，呢到啲炸雞髀食落比出面食開嘅嫩口d, 而且好多汁 皮亦煎到好香脆呢到啲沙津食落特別足料同fresh, 而且用既都係新鮮材料，好值得食呢到啲嘢飲都好正，果汁標榜新鮮製作，我叫呢杯蜜瓜雪香好香蜜瓜味，有天然果香味，味道亦唔太甜， 好好飲個人覺得必飲

同兩個朋友去睇完吉卜力展，在附近找個地方食個下午茶，途經此店，就入去試試!佢嘅沙律都分好多種香炸雞髀拼雜果沙律 - 雞髀外皮很脆，肉質鮮嫩；雜果沙律有蘋果、椰果、粟米、蜜桃，口感豐富滷水雞翼拼菠蘿粟米 - 滷水雞翼很入味，很冧，而且配我最愛嘅菠蘿主題沙律，菠蘿很清甜是天然的甜唔似有加糖另外夾雜粟米一齊食，好有口感飲品加$8轉大杯，真係頗大杯椰香雪香-椰香味同有很重，好椰，重有很濃烈嘅奶香芒果乳酸-清甜而芒果味很重，帶有少少的乳酸味，味道很好，有雙重感覺

九龍灣 花果園估唔到一間餐廳係以生果為主打，價錢超值值得一試今日行開九龍灣見到間新餐廳開，仲要個名都幾搞笑。生果做主題既餐廳真係好少見，平時吾容易揾到有生果食既餐廳，仲要係工廠區。牛角包牛角酥，好香牛油味，包好鬆軟，沙律就非常豐富鬆化又暖既，配雞胸好好食，好足料加雜果沙律，吞拿魚沙律。成個套餐份量好多，一咸一甜的味道，好正朱古力珍珠奶茶好少搵到甘有朱古力味既，珍珠都好鬆化同QQ有機會一定會再食推介⭐️⭐⭐️⭐⭐ ——

今日約左個好耐冇見嘅舊同事食飯，緊係要帶佢去九龍灣工廠區嘅花果園食沙律啦😋呢度嘅沙律🥗餐大件夾抵食😋一定要捉佢黎試下😋我地本想試下花果園沙律，可惜已經售馨，唯有試試什果同吞拿魚火腿沙律雙併，加三文魚牛角酥，連一杯凍飲都係$54。雙併沙律 🥗 - 什果係用新鮮蘋果加d罐頭椰纖果、蜜桃、粟米等等；火腿同吞拿魚比例都差不多一半一半，一半咸一半甜都幾過引，而且大大碟好抵食😋鮮竹墨魚卷蕃茄濃湯拉麵🍜蕃茄湯底唔算好濃郁，墨魚卷冇嘜墨魚味，不過佢加左勁多嘅韭菜、芽菜同埋榨菜，呢度加左好多分，拉麵都算彈牙爽身，整體都ok嘅

今日係九龍灣同同事食飯，見到呢間餐廳好似好多人系出邊排隊，應該唔錯所以去咗排隊試試佢。入面餐廳嘅設計都好簡單，枱同枱之間都有一定嘅距離，同埋佢嘅枱都好闊，坐得好舒服。等我俾你睇吓佢嘅Menu先，價錢都好合理，可以稱得上係好平。😍可以話係打工仔嘅恩物。我同同事都係嗌咗一個雞排意粉，我哋都覺得佢嘅醬汁有啲多，但係相反佢嘅意粉煮得幾好食，同埋唔會好似就咁用水煮咁無味。我覺得佢雞排可以煎得脆少少，咁就會更加完美。我哋帶咗一個芋頭珍珠奶茶同埋加咗燕麥喺上邊嘅珍珠奶茶。味道都幾唔錯，同埋可以自己揀甜度仲有冰，所以唔使驚話會好甜👍🏻👍🏻珍珠都煮得幾好食，幾彈牙，唔會話黐埋晒一嚿嚿好難食咁樣。一路食出邊都好多人排隊，所以我哋食完都係快啲樣個座位出嚟比其他人食。😂睇嚟呢間新開嘅鋪頭都好多人鍾意🧐，如果喺附近返工嘅人經過都可以試吓佢嘅lunch~我哋諗住下次去試埋佢嘅早餐，睇吓佢嘅質素係點樣🤩🤩

係九龍灣收工同同事醫下肚，發現依間都唔錯。望一望個餐牌話真係花多眼亂嗌左個王牌經典套餐(HK$52) ，好高質，蜜桃火雞牛角酥 + 菠蘿粟米蛋沙律🥗 水果🥭係大大塊，不是罐頭🥫沙律，依度十分加分！👍🏻👍🏻👍🏻 超值！又建康配鮮榨哈密瓜汁🍈(新鮮，清甜，少量泡泡，真係鮮榨既味道🍹。 因為我係好驚d香精加糖水嘅飲料。)仲有個特濃蕃茄湯拉麵🍜 我就揀鮮竹墨魚卷蕃茄濃湯🍲，墨魚卷彈牙實淨，湯好入味，麵身軟到適中。仲要份量好多! 另外杯青蘋果乳酸，同事就話覺得我杯哈密瓜比較好飲埋單都係一人幾十超值