船仔 (京瑞廣場) (已結業)

聽說有任食時段$98任食船粉，不過細碗D。我地就在普通時間點了三碗粉同串燒。檬粉好好味，上面有好多一粒粒的炸豬皮，好香口又脆卜卜，另外點了泰式蘭香子飲品，串燒就細串左D。成日隔離飯香，似乎炸泰式硑盤好吸引，有炸香卷魚餅，環境幾舒服，閒日去high tea傾偈是不錯選擇

之前見多人食，諗住試下，食落一般咋。我叫咗豬頸肉牛丸河，我自己冇加調味，味道偏淡，特別在有D炸豬皮，脆脆地冇乜味都幾得意，再加罐汽水，共收＄42，價錢算合理。座位幾迫，筷子木製，未乾透便放岀來供客人用，有點不太衞生。總括來說，普通食碗麵，冇乜期望，咁會覺得ok嘅，唔好以為多人排隊就對佢期望高。我衰在入到去先至開OpenRice睇食評，然後又諗各人口味唔同，反正入到黎都試吓，先至發覺原來openRice食評都幾可信

服務惡劣到一個點🤮入到去坐低，原來計人頭收費，就算自己冇點野食都要收錢，所以一野就被charge左人頭費。咁怪自己冇留意清楚就坐低左，其實本來同個朋友打個招呼就走，咁我仲特登同個侍應講聲話轉頭走，真係轉個頭就走，問可唔可以唔收我個人頭費。態度差既她們當然話唔得，一但坐低坐就會計人頭費（FYI其實這間不是放題/自助餐😓/沒有限時，是可以散叫的普通餐廳) 咁唔緊要啦，我同佢講一係我照坐第2張枱自己散叫d小食/飲品啦，仲問埋有冇最低消費。佢話咁又冇最低消費，然後我就特登坐去d面壁既單人位，準備散叫d野，都真係希望打個招呼就走，佢就行埋黎同我講話我唔可以坐呢度😱我問，下？連單人位都唔坐得？！佢點我去坐門口一入黎嗰個位，而我d朋友就係坐最入最唔近門口既位。我即時嚇呆左，玩野咩，想我走都唔洗咁呀嘛，又唔係唔叫野食🥺成間餐廳計埋我地10個人都冇勁多空位既情況下，佢竟然講因為我呢個單人位要預俾d可能有3個人一齊坐既人坐😱😱😱😱😱難道我而家唔係一個客人？！講真，到時佢真係坐滿，再要有3個人先算啦，洗乜我即時調呀大佬.....到時咪趕我走讓座囉😑成間餐廳有n咁多個位，外面冇人排隊，所有面壁位只有1個客人坐

落order好亂，個女侍應連續2次俾錯order, 再加一次俾漏小食。 而且服務態度好差！以後唔會再親襯lor~ 比錢買難受！食身方面，湯粉完全唔係越南河既質地，湯底得雞粉味，同我普通買即食越南河冇分別。講到特色野飲，以為係水吧整。炸蝦餅係急凍野。無骨鳳爪酸到癲左，同埋質地好麻麻，無乜口感。Aiiiiiiiiiiiiiiiiiiiiiiiiiiiiii😤

之前睇Facebook已經見到有唔同媒體報道呢間船麵店，身為泰菜粉絲嘅我一早就想嚟食，不過因為地點問題，所以一直未有機會嚟試，今日機緣巧合下第一次嚟到石門，咁就嚟試吓啦！今日我哋食左雙拼檬粉 - 札肉+魚蛋，另一碗係泰式牛丸，先飲一啖湯，味道過得去，可能我食慣自己用船麵醬嘅湯底，所以個人認為未夠濃厚，魚蛋都幾彈牙，而牛丸亦好夠牛肉味，最突出嘅我覺得反而係炸豬皮，脆卜卜，浸湯食更加香口。一碗船麵係$30，雙拼$37，價錢都幾抵食，可以一試！

做生意，尤其係做食市，客人應該係最重要。7點45到，90分鐘任食 (星期二)，叫咩冇咩，我話咩都冇任食？沒有被理會，運作方式亂，入的 order 單唔見了好幾次！味道同個 title 一樣咸到 no friend, 八點九同我講 last order, 數分鐘後入了一枱新客！怎可以，工作的人員好新，好不專業，但若果係自己生意，不是要多加心思和心機咩？佢叫完 last order 我再無心情，反正咩都冇，又唔跟單。討厭。 放工由機場 到石門，看看附近的餐廳對比吓，真係最失敗的選擇，唉！極失望。

自從嚟咗石門翻工，都試咗京瑞嘅好多食肆，不過一班同事最愛嘅都係船仔無他，只係因為佢係我哋糧尾既精選。30蚊就有一餸麵，仲平過tam jai 宜家佢仲做緊優惠，指定時段人均食夠$45送豬肉串燒，所以我哋都另外加$8 叫埋龍眼冰佢哋叫咗豬頸肉 豬骨湯底 金邊粉唔知係咪一次叫3個，佢哋個幾碗份量好似特別多豬頸肉幾大塊，湯底好濃味，同顏色比較深。上面有炸嘅辣豬皮好香口，我自己覺得要快手食呀，浸淋咗就好似冇咁正。而且仲可以自己再加魚露、辣粉、炸蒜。而我就直接叫咗個泰北求財黎食係咖哩麵配雞翼，咖哩好香，但係唔算辣，有少少失望係送嘅豬肉串，份量都適中，唔會話太細舊，個醬有好香嘅花生味，而且唔辣但係一般都姍姍來遲如果你食曬麵都未有，而單又冇出話送豬肉串，可能就要追下啦我哋仲幫同事做埋外賣仔，叫咗個豬頸肉青咖哩飯青咖哩就比黃咖哩辣啲 題外話，但係每次等位都係一個挑戰，最好就主動拎張點餐紙剔定先，再企係門口附近等。因為佢地lunchtime 實在太多客，人手又唔夠，好易就唔記得咗你

同事suggest lunch去試下 又再次証明新X期介紹得都伏味濃！12點鬆少少 行過見到都有幾枱客 咁就即管試下 坐低畫野食 交單！ 過左陣 個waitress放低張單 睇下 點解咁平⋯ 無理由喎 細心d睇 除左真係打左4個麵呢個數係啱之外 全部都錯⋯ 餸錯 麵錯 湯錯 小食完全被ignore.... 幾經辛苦先叫做叫番啱⋯ 補單又唔問你要咩湯同麵 奇怪！講番個麵 我食四寶丸加雞翼 豬骨湯 金邊粉⋯ 份量相對細份 無認真數過果4粒丸 淨係記得好細粒 魚片 好薄 廚房師父好刀功片到咁薄 （曲）雞翼普通算合格 但係個麵相當難食又細⋯⋯ 小食 叫左串燒 居然⋯ 凍嘅 連叮熱都懶？食完都驚肚痛⋯ 垃圾級⋯最唔得係 一張4人枱 要我地4個再坐埋一邊 坐足6個⋯ 野已經難食 仲要迫⋯ 最怕⋯係石門 呢兩個商場咁多野食 你地可以做到咁⋯ 睇下你幾時執⋯

第一次有店鋪激起我去openrice寫食評！講真，石門開的不知道是做熟客生意還是遊客呢？你激走一個一個熟客，何必呢？我不明白為何今晚(2019年3月23日)這位四眼妹妹待應，為何要在自己落錯單後向客人發脾氣？你忙我們沒要求你有好好的態度，但至少不要在自己犯錯下向客人發脾氣吧。順帶一提，旁邊另一枱客人也可能受同樣對待，人家明顯是第一次吃，你沒講解下，客人填錯表也是沒有必要向人發脾氣掛？人家也不一定知道要自己寫枱號吧(如是，你便提醒客人下次記得寫便可)？不用啤人和"唧"一聲掛！？好像大家來食飯是在麻煩你一樣！希望食店會改善啦！平時的服務合格的！

周末八點幾來到石門，估唔到都幾多人，商場好多餐廳門口都有人龍。都想試下唔同的小店，所以就入左去2樓既船仔。見到唔駛等位，但入面都都有好多人食緊，所以就安心入去試下。在門口見到雜誌介紹，原來老闆是前電視台的工作人員，中途去左泰國學廚，回來再開店，我,一直都好欣賞小店老闆的拼搏精神，今次在店內都見到老闆事事都親力親為，所以用行動來支持一下，入來食一次先~~  $30清湯泰式牛肉丸檬粉，湯好清，粉既份量都好多，配上特有既炸豬皮都好好味，第一次食呢D配料。$48泰式小食拼盤，有春卷、魚餅、蝦餅、雞翼，每款兩件。好味，雞翼都大隻，魚餅、蝦餅既味道就差唔多。加8元可以有泰式枝裝飲料，百香果蘭花籽，第一次飲，試下新野都幾好。$30豬骨湯底泰式肉丸湯河，呢個湯就咸左DD，而且比較肥，個人較喜歡清雞湯。豬頸肉沙律，好大碟，不過甜酸醬太多，可以叫店員唔加咁多，應該會好食D。有一些任食套餐，包一個湯粉及串燒任食，喜歡食肉的朋友可以試下，我就麻麻地了。是次感覺好抵食，而且好飽足，不過晚上就覺得有D口干，可能都是有味精。

話說平日好少唻石門，今次同朋友上堂經過，發現原來呢度有好多餐廳，有啲仲平到得人驚！千揀萬揀下，揀咗呢間裝修特別，貼咗唔少雜誌訪問(我認我膚淺)既泰式餐廳-船仔。呢間餐廳係主打船麵，至於咩係船麵？sorry我都係未聽講，不過佢好似車仔麵咁，餸，麵，湯底都有得揀，一個餸既麵都只係三十蚊，抵到爛！我地一行五人，叫咗四個船麵同一個新出既泰北咖喱麵，再加幾款小食，每人仲叫咗啲特飲，我叫咗熱情果蘭花籽。老實講，在下孤陋寡聞，從來冇係其他地方飲過呢款飲品，一飲之下覺得味道清甜，啲蘭花籽口感特別，非常唔錯！主菜唻到！原來船麵就係有個好濃既湯底，上面加啲配菜，當中最特別就係佢個辣豬皮，辣得好有層次，炸得酥脆，如果大家想試真呢啲豬皮，可以要求另上，咁就可以保留脆既口感。同埋我懷疑呢款豬皮應該係店中名物，因為佢係提供一包包豬皮另買的。講返碗麵，金邊粉軟硬適中，十分彈牙，量亦足夠，餸方面亦絕不欺場，啲豬肉丸同樣彈牙，有肉味，以咁既價錢有呢種質素，性價比真係強大到大殺四方啦！至於新出既咖喱麵我都試咗幾啖，湯底咖喱味香濃，椰味十分，睇得出個湯用足料淆，重要係唔算太辣，對於喜歡咖喱但唔食得太辣既我唻講，算係好對味！

見到門口話泰國船麵，以為可以重拾下上年係曼谷食船麵既回憶同味道叫左個最common 既豬肉丸麵。。點知。。有食過壽担担麵既就明我講咩我叫金邊粉，同担担麵一摸一樣湯底味道一樣，我比左幾個同事試，個個都話同壽桃牌一摸一樣我真係覺得我食緊自己煮既坦坦麵我希望老闆有心做既，親身飛去泰國一次試下咩叫船麵。有時客人黎食野，就係食份回憶。你招牌標榜係果樣野，未必要似到十足十，但起碼唔好咁離題吧。。。而家根本係兩樣野

年三十晚一早先去收修甲，之後見差不多午飯時間，便早少少吃午飯。一個人只想食點快餐，見到竟然有間泰國船麵三十元碗，非常便宜，便點了一碗肥牛金邊粉。分量對我來說絕對足夠，肥牛也不會太少，三十元真的物超所值！雖然我不知如何才是正宗船麵湯底，但叫做十分濃郁。而配上炸蒜炸豬皮粒也加添口感，枱上還有魚露辣椒粉配料可加，適合我這個愛好濃味的人。見到餐廳也有標榜自家製一些特飲，可惜今天只有一個人所以便不試了。雖然店舖小小但仍加了很多泰國裝飾，環境不錯。下次有機會會再和老公來吃，到時可以試試它的小食。

某個週末去左石門一個商場食船麵，因為雜誌介紹，自己在泰國食過船麵後瘋狂愛上，所以希望在香港尋回同一種味道。結果這間店沒有令我失望。我點了一碗魚蛋拼牛丸米粉，朋友點了魚片河粉。須知道一碗船麵最重要的是湯底，這間店的湯底雖然沒像我在泰國吃的濃，但亦有其特色，湯底挺鮮甜，$3x 的份量來說是十分物有所值跟餐加$12點了蝦餅，蝦餅挺脆，但不像泰國餐廳般厚，但一分錢 一分貨$12其實都食得過其實跟餐加了$15還有串燒2串，也是挺好味。總括而言，現今這世代香港還有這種價錢便宜又好吃的店真的買少見少。絕對值得一試

叫左個好似叫「發財麵」嘅麵同黃咖喱豬頸肉飯。味道都幾好，都會再番黎食。我只係唔太鍾意咖喱同菜分開，一般正宗泰國菜都會把咖喱同菜一齊煮。飲品方面，叫左泰式奶茶同龍眼冰。奶茶幾好飲，龍眼冰都ok 。如果可以多d 即沖唔係樽裝嘅野就好了。侍應好有禮貌～