稻香 (紅磡廣場)

营业中

休息中

今日（28/5/2022）同朋友一點十到這食店，要等位，近門口侍應不停叫掃針咭，由於未入座，故拒絕，侍應仍不斷叫掃針咭。準時二點，侍應叫有籌號就跟一男侍應入內安排座位，但該男侍應只安排了幾枱就算，大堂有好多空枱，唯有自行搵位，坐下，無人理，開包茶葉都叫咗3次，我哋唔係幾識用個水壼，叫侍應，不停叫等陣，最後，都係靠自己，攪咗成幾分鐘先有水入落個壼。點心都幾多點了4個點心功夫小籠包，湯留晒出嚟頭抽鴛鴦椒，熱辣辣，夠味香麻叉燒酥，香脆，幾多叉燒餡料榨菜牛肉腸，好淡口，食唔到榨菜

曾去過其他分店飲茶，昨天專登行去這間最近屋企嘅分店試試下午茶質素。分店內不是太寬敞，因店鋪floor plan四正，食枱叫做放得整齊。現在星期六無咗下午茶全部點心以小點計算，相信因此無須排隊。蒸點心夠熱，薑醋上枱時仍在煲內滾動著。其實點心上枱時亦算排列整齊，不似其他一些分店在上蒸點心時已亂堆在一起。可是食客方面就有點恐怖……有個阿叔口罩只在頸，由店內比較入的位置，一直行出食店入口，途中經過好多食枱，對其他食客構成衛生威脅。亦有只一阿叔與同枱食客講野，不斷大大聲投訴該酒樓依樣嗰樣，都唔知佢到底想點，有不滿就直接搵伙記投訴啦，無謂影響其他食客用膳！

不知是否區域問題，員工態度極差。已搖控取票攞位，票號燈箱號碼已到，問門口阿姐事宜，阿姐完全不理人，只顧與熟客談天說地，應都無應過我，直頭當我透明，時運高，睇我唔到。明顯熟客或是比了什麼甜頭的客人優先入坐。今時今日，ICAC見吧

人人都知道稻香酒家出哂名1蚊雞優惠，上次試出1蚊炸子雞人氣大不如前，今次推出1蚊乳鴨、優惠價$168 澳洲龍蝦（上湯伊麵底）、$68鮑魚海中寶（海鮮雞湯）。😋我們6pm去到酒家，已經大排長龍，等了15分鐘安排入座，差不多全場爆滿，優惠十分受街坊愛載。1蚊BB乳鴨，手掌咁大隻，皮脆肉香，不用醬汁已經十分入味，每人都可以叫一隻乳鴨最抵👍🏻 🦞澳洲龍蝦（上湯伊麵底）反而不夠新鮮，上湯伊麵味道比較淡，我舖愛芝士打底，喜歡清淡的人士可能會適合，不過龍蝦啖啖肉，價錢也很實惠。鮑魚海中寶我就不太推介，湯汁很清淡，不似真正足料靚湯的味道，不過每碗都有鮑魚。😆

話說我今日打電話去嗌外賣，嗰位小姐語氣非常之差話好多人你要買就上嚟買啦，咁即係算點呀！係咪唔使做生意😡😡😡😡😡😡如果你唔想做就唔好做外賣生意啦！其實我都好想喺度食，但係情況唔理想，這位小姐可唔可以體諒一下！

終於有機會來嘗嘗稻香的雞煲和羊楠煲，碰巧跟家人夾到時間，於是來到這裡試試這個深宵食堂。是的，晚上八時半後，所有雞煲、羊楠煲也是半價，平均來說五十多元就擁有一個雞煲，十分值得吃。一來到，就馬不停蹄點了雞煲和羊楠煲各一。然後發現了以下的新玩意：這個名不經傳的東西，原來集煲水、洗煲、充水於一身，可惜我真的是大鄉里，花了不少時間才能掌握此機的技巧。食物方面點了1）羊楠煲；2）雞煲3）櫻花蝦墨魚飯雞煲，配料十分足，但雞件略嫌細少，不夠火喉。如果只提及配料的話，是十分好的，各式各樣的配料放在一起，三個字：「好鬼辣」，深深地觸動了我的味蕾。而我的脷子也深深地麻痺了一陣子，有一刻幻想自己中了可怕病毒。之後來了羊楠煲，足料，以肉肉計，比雞煲來得多，而且湯底也十分濃，忍不住吸了幾口，材料有枝竹、冬菇、薑片、薑段等，全部應有盡有，有一種吃不完的感覺。最後點了櫻花蝦鰻魚炒飯，這個粒粒飯香，配合醬汁，但略嫌蓋過了鰻魚的口感，需要很仔細才能咬下鰻魚。每一口也有鰻魚，足夠給讀者慢慢細爵。總括而言，食物價質，價廉物美，會回來的。日期：2020.11.17

以前返工必定一個星期有兩日喺稻香飲早茶，而家已經很少去了，今日lunch相約同事食午餐，剛裝修好冇耐，依家沖茶加水竟然係自助式，每張枱旁邊都有自助加水自己沖茶，按個制就可以，好新穎，我哋四個人都係以大路點心為主，點左蝦餃、燒賣、蘿蔔糕、鳳爪、鯪魚球、腸粉再加一個蟹膏蟹肉炒飯，上面再鋪一層蟹子，呢個炒飯的確有驚喜食落真係好香蟹膏味，加上蟹子的爽脆，很嘢味👍另外每人再加一隻椒鹽鮑魚仔，鮑魚彈牙唔會韌，略嫌比較鹹，其他點心就不過不失！

剪完靚髮後，決定在這裡跟媽媽吃晚飯。在一元一隻乳鴿的優惠下，可以吃多一點點。在機緣巧合下，我倆獲安排下卡位，是幸運指數爆棚的一天。除了乳鴿外，也點了生菜又鯪魚球豆腐煲和瑤柱蛋白炒飯。在等待的時間，我分享了最近的生活瑣碎事給媽。很快地飯菜就上了。先來了乳鴿，先不論食物質素如何，但精緻的「籠中乳鴿」，便大大增加了食物的分數。細嚐之下，雖是啖啖肉，卻是一般的嫩，相比明星的評分低了一個等級。之後來了生菜又鯪魚球豆腐煲，此菜式雖然成本頗低，但煮下來卻是十分不錯。下一次我也要在家試試烹調。最後來了瑤柱蛋白炒飯，炒飯底，一粒粒米，飯香撲鼻，十分好。值回票價。只要重新推出一元優惠，我們定必會再來的。

稻香一蚊雞做到六月尾，襯完結前來試一下啦，個個都話抵食嘛。開了一壺香片，都幾好，捨得落茶葉幾有茶味。咁梗係要點壹蚊雞，意外地大隻喎，仲有幾塊蝦片點綴下，賣相唔錯。朋友話一定要影下佢屁屁，哈哈，誘惑翹臀。結實的大腿～皮脆肉嫩又多汁，炸雞都不會乾巴巴，又真係好味喎，一蚊係抵嘅。仲叫左孖寶，其一係新鮮菠蘿咕嚕肉，無乜特別，甜甜酸酸咁，最好食係後面個四份一個菠蘿，激甜無渣，好正。其二係涼瓜炒牛肉，涼瓜爽口唔苦，牛肉嫩滑，幾好味。淨食餸有啲寡，叫左個白飯＄15，比起孖寶同一蚊雞，飯個比例叫貴了，哈哈，而且水太多好淋，唔好食。兩個人二百幾蚊落樓，抵食吖。

同事講開食一蚊雞，即興放工去食，無得訂枱，6點半去到九龍灣要排100個籌，一時醒唔起用App攞飛，蠢咗惟有改去機會大啲嘅紅磡。皇天不負有心人，趕得切叫雞4人叫咗兩隻雞，再加3個餸(太肚餓食唔哂)，雖然係一蚊嘅雞，上枱嗰陣仲係熱辣辣，我哋影完相又玩咗隻雞一輪，食嘅時候肉係熱皮係脆，其他餸味道同賣相中規中矩，最特別咕嚕肉擺盤係成條菠蘿上，好似飯後生果盤咁，可能我有老花啦，花膠什菜煲啲花膠我食咗都唔知。

不見三日刮目相看，突然美味得出奇，絕大部份出色高質好味道！蠔皇鮮竹卷，蠔汁鮮甜不濁，包著滑嘟嘟的鮮竹卷，結實不鬆散，肉甜蔬爽！鮑汁鳳爪，厚厚鮑汁掛在膠黏雞腳上，啜得高興一再回味！稻香蝦餃皇，半透餃皮使得蝦仁十分透惑，熱熱整粒啪入，鮮味盡露！淮山雲耳浸皇帝菜，鮮淮山粉爽有益，山藥味美妙。皇帝菜翠綠鮮爽，每啖爆出獨特菜甜味。山竹牛肉球，嫩嫩牛肉，看得見的肉汁閃令令，味鮮搭酸甜喼汁更醒神。鬆軟叉燒包，手感一流暖笠笠微彈，香噴噴的麵粉味，肉餡濕潤甜美濃郁。櫻花蝦雞粒炒飯，粒粒金黃乾爽飽滿，充滿蛋香有鑊氣，配上咸鮮櫻花蝦及嘆韌雞粒更可口。脆皮燒鵝，皮脆肉嫩，香料清新入味，肉質嬌嫩，滾埋汁液巧巧黐！金勾炸兩腸，較失色的一味，味道淡淡，油炸鬼微脆略韌，粉皮可以再嫩滑一點。

是日清明節，屋企要做節🙇🏻‍♀️🙇🏻提早2日喺稻香酒樓買咗package，乳豬，貴妃雞連馬拉糕，仲另外送咗一斤米同較剪。乳豬好大隻，有成隻手臂咁長，啲皮都好脆，肉都幾多下，而貴妃雞比想像中大隻，啲肉都好滑，係平時喺酒樓食嘅質素，買嘅時候，好驚好似以前一蚊雞嘅size😂勁滿足嘅一餐☺️

我心底非常討厭稻香，近年全部點心已由大陸工場製造再速遞到港，極度厭惡﹗油膩重味的出品，每次食完都十分口渴，周身唔舒服。見同事們誠意拳拳，免強出席支持下，話晒冬至前夕聚餐。香麻煎堆仔，竟然第一味上場係甜品﹗熱辣辣咬啖，平凡豆沙餡，芝麻外層脆脆，不過不失。原蝦燒賣皇，咸蝦略爽，肥豬肉球油膩滑嘟嘟而結實，趁熱食沒那麼油感，放涼就非常大鑊。稻香蝦餃皇，餃皮綿胎那麼厚，怕隻蝦會凍親嗎？還是怕隻蝦太生猛會破皮而出呢？實色韌韌的餃皮是乾硬的，假爽啤水蝦腥到盡頭咸味嗆喉。試試另外一籠蝦餃，都是同樣情況，地獄劣質。山竹牛肉球無味，還恐怕不夠分而全部一開二，但同事們不太動手，看來牛肉球不受歡迎呢。無緊要，讓我來頂﹗慢慢半個半個地消滅，硬實質感淡茂茂沒有牛肉味，就連醃味也食不到。師傅忘記落味嗎？幸好有淋上喼汁點綴一下，起碼有陣酸味。鮑汁炆鳳爪，最穩陣之選。濃稠的鮑汁厚厚不水，可遇不可求，實屬難得。香甜味突出不嗆不濁，跟黏滑鳳爪融合得完美無暇，腳趾損得過癮美味。蜜汁叉燒，罕見叉燒鬆軟不乾硬，強咸中有一絲甜味，最衰完無焦香味道。入得口、吞得下，淨食重口味，撈飯會更合適。明爐燒鵝，何時推出迷你種的？還是 BB 鵝

交完法律文件，沒事做，就決定去稻香吃飯，順道慶祝父親節。餐廳內外餐廳外放滿了不少椅子，以供等待的人士安坐。略嫌沒有深圳的餐廳一樣提供飲品，糖果給輪候中的人士。餐牌方面想不到稻香竟然安排了手機點餐服務給打邊爐的用家，什為貼心。但另一方面，餐單卻保留了一般酒樓的特色，只有菜式名稱，價錢，並沒有圖片(精選菜式除外)，表現實屬中規中矩。食物方面只點了1）龍躉兩味(黃豆醬蒸龍躉頭腩+鮮茄濃湯泡龍躉球)；2）經典玩味BB豬；3）柚子蜜醬配排骨；4）鮮鮑汽鍋雞。先來了黃豆醬蒸龍躉頭腩，魚味濃郁，肉質嫩滑，不過略嫌份量太少，未必滿足多數人的胃口。至於另一味-鮮茄濃湯泡龍𧄌球，反而這個味道更理想，濃濃的鮮茄湯，令人垂涎欲滴。之後來了經典玩味BB豬，BB豬肥瘦均勻，皮脆肉嫩，配合刈包，效果出奇地好，如果刈包的數量能夠給予更多，那就更好了。其後來了柚子蜜醬炒排骨，柚子蜜醬很好吃，不只有酸味，而且有柚子肉在內，基本上只吃醬已經足夠😭。最後爸爸點了鮮鮑汽鍋雞，內裡有一隻鮑魚，而且有雞，鮑魚的海鮮味配上雞的鮮味，可以說是一拍即合。份量少，但質素佳，是畫龍點精的一句。

以前經常同屋企人去稻香食晚飯，覺得又好食又抵，特別係食一圍圍既餐，真係超值。不過近呢一兩年，唔知點解佢地既質素差左勁多，啲食物自從轉左餐單之後，煮得真係差左好多。而且好明顯既係，近呢兩年啲餐具每次都係油，要自己帶濕紙巾抹先夠膽用.... 講返啲食物...# 燒乳豬 # ***** *** 8/10係Ok 既燒乳豬，皮燒得夠脆，中間有層 "薄薄" 既脂肪，如果脂肪可以少啲就perfect。" 蒸石斑 " ***** *** 8/10不錯既石斑，新鮮，唔腥，熟既程度尚算適中。" 蒸阿拉斯加蟹 " ***** ***** 10/10超級鮮甜多肉，勁推介! 蟹都有少少膏。" 瑤柱蛋白炒飯 " ***** ** 7/10啲飯偏硬，太有咬口啦。。。要比啲牙力先食到，同埋有少少油左啲。。。好懷念以前又乾淨又好味既稻香啊!