神廚館 (已搬遷) 新店位置

上次來食都有一段日子了, 始終要一放工就趕過來先有得食. 難得三個人都早收工, 就一齊來食.來到時終於未係洗地時, 都不用點揀, 就要了三樣碟頭飯.紫菜濃魚上骨湯: 9分, 我不要飲品, 叫了一個湯一齊分. 奶白色的湯, 相當香滑,係紫菜+ 魚+ 豬骨的精華. 相當甜美, 是否無添加, 其實又無傷大雅. 招牌煎蛋海苔窩燒墨魚餅飯: 10分, 賣相一流. 香噴噴的墨魚餅, 炸得熱辣辣又彈牙, 但唔會覺得太油, 食落口係真材實料的有墨魚粒, 面頭再加上海苔, 馬上添上點點東洋味. 另有一隻煎蛋撈飯.總結: 此招牌菜真係有神廚的級數.原汁頂級崩沙牛腩飯: 8分, 柱侯汁係相當入味, 撈飯一流, 牛腩係炆得好淋, 係瘦肉韌了點點.美極香煎蒲牛扒飯: 10分, 再一次要了這個牛扒, 再一次食到傾心傾意. 又係未上臺已經聞到香味, 美極加上黑椒同蔥的醬汁係濃烈而又好美味. 牛依然係鎚得好軟熟, 當然唔韌.柱侯汁+ 美極汁, 真係撈得好掂.服務係依然好有誠意, 又相當經濟, 味道更加係好出色.堅.

探子回報，得得地。所以，今日就和探子一起去嘗試嘗試。點了：1）招牌墨魚餅飯。墨魚餅炸得好香口，且可咬到一塊塊的墨魚，很有咬口。若配上日本的珍珠米飯會更好。2）馬來西亞牛腩咖喱。咖喱味淡香但不夠辣。可能是迎合了香港人的口味。也可能本人比較喜歡濃郁的咖喱味gua。不算正宗（本人是馬來西亞長大的），但也可以接受。$3X 一客，能有這樣的水準和心機，夫複何求？

今朝因有事所以同公司請咗半日假做完啲正經嘢之後同埋老公食完晏先返工諗起呢間鋪頭就去咗呢度試佢個墨魚餅飯, 個飯嚟到已經好吸引食落塊墨魚餅真係好好味夠脆又有墨魚肉係入面一個字"正" 呀, 美中不足係佢個地點真係好鬼唔就腳不過要食好嘢就梗係要花啲時間架啦

世事就係甘,好幾次想黎試都因時間,地點,人物而不成,今次因為晌奧海睇spiderman 3,有機會一試!試左窩燒墨魚餅飯,果然同圖片一模一樣,好得!有墨魚味又彈牙,入面有少少紅蘿蔔,好味!至於咖哩牛腩飯,得得地啦,覺得味道偏甜,純粹個人口味。P.S.店主好風趣,聽到佢同女伙計的對話,好好笑!

睇食評墨魚餅好好食...=0=都唔係想像咁好唧!唔係咁彈牙!入面仲有d滑xx美極牛扒......@.@ 好甜丫～～～不過都可以接受,因本人要有汁要食到飯,好彩都食到小半飯其實我覺得差..不過又未至於要喊~點好~~唉

趁假期便和男友去一些我們平時少去的地方，第一站便是大角嘴的神廚館。來神廚館，當然要試這裡的招牌菜：墨魚餅和美極牛。墨魚餅果然名不虛傳，鮮味彈牙，餅裡的甘荀和馬蹄加強了咬口，吃得我和男友嘴lam lam。美極牛相比下沒墨魚餅出吃，我嫌味太甜，男友卻非常欣賞，因為他本身喜歡美極豉油那股香氣。餐前附送魚湯，鹹了少許，魚味不夠濃，可以更好。跟餐的白飯非常硬，硬都連我這個硬飯王都嫌硬。老闆非常親民，主動走過來問我們食物味道如何。環境乾淨企理，不過油煙味都頗勁，吃完感覺自己像煙窗，長髮的女孩子應該會明白我講緊乜。

我係度想比個喊口open rice,因為佢地既資料唔準確!!!好耐之前已經好想黎神廚館度食但因為大角咀實在唔係太方便,所以一直都冇黎難得今日男友得閒,於是於定同佢黎我地係沙田專登過黎,5:30到, 諗住食個early dinner啦~因為根據open rice 佢係收7:30 ga ma點知去到見到已經收晒野有個女人(唔知係咪老闆娘)同我地講星期六係收4點星期日只做lunch,公假唔開而平日收幾點我唔係好記得, 總之唔係7:30啦個女人都話出面寫錯左佢地既營業時間..結果佢非常唔好意思地叫我地下次再黎..我覺得open rice應該對佢地report既資料負返d責任唔好等其他人又失望而回﹝編按：對於是位食友的不幸遭遇，深表歉意。唯這個免費飲食網站的大部份資料都由其他食友義務提供，只供參考，希望明理者明白﹞

試左窩燒墨魚餅飯同咖哩牛腩飯。招牌貨窩燒墨魚餅飯真係無話可說，又香又有豐富墨魚味，彈口好食。咖哩牛腩飯個汁味道夠香帶甜辣，牛腩夠稔，好好食，下次會再試埋美極薄牛扒飯。

今日同男朋友終於試到呢度的墨魚餅飯, 美極牛扒飯,鮮魚湯同酸梅湯.真係覺得大家冇介紹錯, 墨魚餅香脆,口感豐富, 牛扒美極蒜蓉汁簡直無得彈! 鮮魚湯一上枱已經一口飲哂. 美味程度可以想像.唯一大家唔可以要求的係環境, 一嚟係大角咀舖, 二嚟只係家庭式經營, 環境只係一般, 乾淨程度係睇到的地方尚算OK!埋單時計好要八十幾蚊, 點知老細話飯連湯, 酸梅湯就送俾我地飲, 最終只係五十幾蚊走人. 真係快,平,又好味的推介!

睇咗openrice已經有2年lu,一路都有跟大家意見去搵食,但係今次e間餐廳實在要令我獻出我的第一次....星期六下晝3點去到,地方都易找,搭地鐵到奧運站行多3分鐘就搵到,第一眼見到間舖不太起眼,似一間普通港式快餐店,但居然有7成坐滿,我諗openrice冇介紹錯!!!我同我朋友仔叫咗招牌菜~墨魚餅飯,同埋美牛飯,好快魚湯就上枱,味道不錯,過一陣兩個飯就到喇,聞到已經急不及待試下傳聞中嘅墨魚餅,wow.....正呀"""香脆金黃色嘅外層包住爽口彈牙嘅墨魚,一個字正!!朋友仔居然一次過食晒塊餅,留番隻蛋送飯,哈哈!!!而美牛飯呢都唔差,鬆軟嘅牛扒配埋甜甜地嘅香蔥美極汁,好好味!已經同我朋友仔約定下個星期再戰神廚館試我最鐘意嘅雞,同埋佢要再食墨魚餅wow!!!! yeah!!!

由於之前０係呢個網見到呢間舖係20大最高評分０既餐廳之一，所以我同男友仔就０係2006年11月9日０黎呢度試０下啦！！～我男友仔住大角咀的，我０地０係大角咀都食過不少餐廳，但都真係未試過呢間，因為這店真的不太起眼。現在認識了她，以後０係大角咀就不用煩可以吃甚麼了…^__^第一次試當然試出名０個ｄ先啦！！～一坐低就即刻叫個墨魚餅飯，同埋個奶白色的魚湯，我想問０下個魚湯係咪可以當餐飲０既呢？！～　因０個次我無問到，所以我要另外加＄９…　我見隔離有個客人叫左客“上湯雞飯”都好似幾好味０敢，佢都好似係餐飲要湯的。而我男友本身唔肚餓，但經我推薦後他也想試試個“美牛飯”。首先，個魚湯都幾好飲，淡淡的奶白顏色，有豬骨的濃、魚味的鮮。因加了胡椒去煲，所以沒有一點魚腥味，他們還加了些紫菜同豆卜，為這湯增添口感。輪到墨食餅飯出場啦！！～　個墨魚餅真係夠彈牙喎…　且又有海鮮０既鮮味，應該有加埋其他海鮮，例如蝦等。隻太陽蛋都煎得很好啊！～如覺得個飯乾了些，可加些枱上提供的甜豉油，好好味呀！！～最後，就係“美牛”出場嘞！！～　老細煮緊０個陣已經嗅到好香ga la …個汁真係好惹味呀！！～　葱加蒜茸加美極汁配牛肉

星期六終於有機會一試呢間小店，果然名不虛傳。招牌墨魚餅飯真係冇得頂，同行o既友人亦讚不絕口。而呢餐飯亦體現出小店o既人情味，話說友人係歡喜食哂飯先食餸o既，店內老闆娘及老闆見友人已經食哂飯但係墨魚餅完成未郁過紛紛以為佢唔夠飽，問o左幾次佢仲要唔要飯。雖然只係好小事，但係自己就覺得好窩心囉！

原來收7點半，好彩行快兩步，差D無得食門口停到車，不過廚所要行去公廚講返食物，點了招牌墨魚餅飯，同美極汁牛扒飯即煎墨魚飯很脆口，味道同質感都好好，必試美極牛扒，都OK，唔算頂瓜瓜，但都唔錯啦酸梅湯，有少少甘草味，都幾好，但點都比唔上廣西賀州飲果D咁出色魚湯，我唔食魚的,Comment唔到，不過我太太剩下了一大碗，可能佢怕胡椒啦此店最大問題係油煙味，食完一身油煙，令我非常反感，如果下次行過，都可以考慮外賣，堂食就咪搞喇！！

好耐之前同大佬黎試過墨魚餅覺得味道一流早前睇食評大家又大讚美極煎牛扒飯想試好耐但懶得行咁遠琴晚突然想起就黎買外賣個汁加埋蔥花確實一流牛扒即時變成配角但overall鹹左少少我淨係食白飯加汁都飽晒牛扒有三大件份量足但有d韌魚湯味鮮又唔油唔腥但比起上次飲似乎味道淡左但朋友仔試左啖覺得應該有味精個人鍾意食墨魚餅飯多dp.s.睇番外賣紙發現以前車仔麵有墨魚肉點但而家無左好可惜希望下次幫襯會變番有啦

上星期五因為見到呢間食府嘅食評…令我禁不住即個weekend中午去一試…亦由於啲食物嘅美味…令我喺openrice登記兼寫下我嘅第一個食評…1/地點︰尚算就腳，只要搭去奧運站往匯豐中心行，再往大角咀方向正門一出就見到﹔2/食物︰試左窩燒墨魚餅飯同咖哩牛腩飯…>招牌貨窩燒墨魚餅飯無得頂，又香又鮮味，絕對唔會似坊間粉漿多過肉但係唔會一夾就散﹗配上太陽蛋只不過是錦上添花。>凍酸梅湯︰真係同坊間所飲過嘅味道不同，先旨聲明本人極愛嗜酸，但係佢嘅酸梅湯唔止酸甜咁簡單，而係帶種鮮梅味…分別就好似“罐頭”同“新鮮”個種感覺﹔>咖哩牛腩飯個汁味道非常全面豐富，夠香帶甜辣，一向咀刁嘅男友試左一口即讚，惜唔係成碗牛腩都咁腍…3/服務︰不用再讚，大家見到各食評已經有目共睹﹔4/環境︰家庭式經營，唔可以要求太高，座位不多共4張4人枱，門外亦放到2-3張枱，週末下午隔離舖亦會相助借枱比佢哋，而地方尚算乾淨企理﹔5/價錢︰絕對超值﹗30蚊一碟如此美味嘅飯仲想點﹔最後一句，我一定會繼續幫趁﹗