甘味讚岐手打烏冬

营业中

休息中

好耐無食過甘味，好懷念個蕃茄湯底，今日難得經過見到，就決定入去食晚餐啦！我地叫左蕃茄比目魚烏冬，蕃茄蒜香雞肉烏冬同吉烈豬扒烏冬。蕃茄味好濃郁，烏冬亦到好彈牙，不過份量比以前縮水左，自己食完一碗都係未夠飽！而且豬扒炸得太乾，不過點左大量沙律醬後勉強可入口。比目魚維持到水準，都幾嫩滑。總括而言不過不失，不過無左第一次食既時候個水準，有d失望😞

一到晚飯時間，荷里活廣場入面既餐廳基本上都要排隊，甘味讚岐手打烏冬都係一樣。我等左大約15-20分鐘，終於有枱。呢到最出名既當然係烏冬，但食得多有D悶，所以我同男朋友都叫左飯類，食完之後覺得佢地既飯都OK好食，下次可以都可以再叫。我地食左:三文魚親子飯男朋友係三文魚Fan, 呢個係佢食既。佢話呢到嘅魚生都算幾新鮮，三文魚子食落口都唔會腥，加豉油同WASABI食都幾好味，呢個價錢質素算幾好wo。燒豬頸肉飯呢個係我食既，我覺得飯量有D多，不過，豬頸肉幾好食，燒得幾香。食物性價比都算高，大家下次可以去食下。

平時唔知食咩好就會諗起甘味。甘味價錢合宜，味道都唔錯，仲可以一嘗日本菜。甘味有兩個餐我係常食嘅，一個係刺身飯。一個係蕃茄烏冬。兩樣都好好味，份量都足夠。兩個人食加多個小食就岩岩好，茶碗蒸同手牛雞翼都係一個唔錯嘅選擇。最正係可以加份甘味會，定期要coupon送，又可以儲分。👍🏻👍🏻👍🏻👍🏻好味指數：8.5/10

中秋節前夕，朋友話想食得清淡少少。 係商場轉左一圈, 隨便就入了這間。 不用等坐, 即刻有位入座。 放工時間, 都坐有8成滿, 對比隔離左右店, 算係多客。 以為好簡單, 打開菜牌都好多選擇。 但佢叫得讚岐烏冬當然要試佢既烏冬。 我們點了窩燒天婦羅蝦和炸豬扒烏冬。 舖頭細細, 但食物質素都有返咁上下, 這是我和朋友都比較意外的。 炸物不會太油膩，烏冬好Q彈, 連湯都可以飲埋。 而最主要我們以為只食個便飯, 想輕食, 但最後都係食得飽飽離開。意外新發現, "便飯"黎講真係一個不錯的選擇。

幾位阿姐態度不太友善：例如上菜時大聲叫客人「小心手機」，實情係暗示你手機妨礙佢上菜；鄰桌小朋友不小心碰撞枱上餐具，服務員露出很不高興表情。食品質素尚可、不過不失。

今日去左鑽石山荷里活廣場食飯，例牌都係食呢間烏冬😆不過都好耐無黎食了今日係weekend，等左半個中先入得去食，限時75分鐘餐牌同之前都無乜點轉，不過係多左啲魚生烏冬set😄🥢蟹子沙律嗌一碗烏冬就可以以$18換一份蟹子沙律同以前比真係細碟左好多😔食2啖就無不過啲沙律醬蟹子就俾多左雖然只係$18，但都覺得唔係幾抵食🥢煎餃子呢款雞軟骨餃子真係好好食😁煎得脆脆地，但入面仍有少少汁，唔會好乾👍🏻🥢泡菜牛舌鍋烏冬呢款烏冬之前都有食過但今次真係差左好多😕烏冬明顯煮得耐左，比較淋，無左讚歧烏龍個種彈牙👎🏻而睇相都見到湯底好稀👎🏻泡菜味真係唔多出而且仲莫名奇妙有種腥味....而牛舌直頭無味😅😅😅

荷里活廣場一到食晚飯時段，差唔多間間食肆都有一堆人等位，呢間讚岐其實都食過好幾次，但次次都緊有一樣食物出事（好難食）今晚都唔例外😤。今晚黎到，見佢門口等位人唔多，算啦，貪佢唔洗等咁耐。前菜叫左一碟蟹子沙律🥗份量比以前起碼小左一半（有冇攪錯）牛磅漬物，咸到食唔倒😖最正常係碟雞軟骨餃子，煎得好香口，好味😋雞絲濃湯蕃茄烏冬，湯底好濃郁蕃茄味，唔會太酸，烏冬軟靱度剛剛好👍🏻朋友嘅牛舌泡菜鍋燒就中伏啦😨烏冬林pet pet ,湯底又稀又有一陣怪腥味（好難食）最後食到一半都要放棄啦🤮

我最鍾意食烏冬，一想食就會諗起甘味。價錢大約六七十蚊到，下午茶食四十幾蚊都有。平時成日食但就好少寫食評，今次就寫下～壽司拼盤拼讚岐手打烏冬壽司比平時食嘅細舊，款式都係平時成日會食嘅款，魚生唔算話好高質嗰種但以呢個價錢都ok。烏冬都係一如以往地好味，好滑、有彈性，個湯好濃，我鍾意加埋七味粉落去就更好味！個蛋好滑好香，而且好夠味，啲材料都好大粒。

一人定餐（牛）包括牛仔骨，刺身，壽司，沙律，烏冬。每款食物的份量都不多，但吃下卻很飽肚。烏冬份量都有半個。湯底味道一般。而蕃茄濃湯烏冬，味道不過不失，烏冬份量十分足夠，而配合燒雞扒的雞扒肥瘦剛好，但有冷凍肉的味道。另外加了一碟刺身吞拿魚味道不夠新鮮，三文魚可以接受，甜蝦解凍之後放得太久。

行政混亂。明明可以讓顧客領票輪候，服務員卻要求顧客站在門外排隊，但在另一位服務員卻向在我之後來的顧客派輪候票，而安排入座時反而先讓那後來的，我跟服務員理論，但她堅稱是那位顧客先到來。這間店的服務安排，實在是莫明奇妙。我不會再來這店，更不會推薦給朋友。

餐廳環境感覺舒適，服務好好。 點了季節限定海膽刺身盛之海膽 刺身盛 配冷蕎麥麵• 刺身三文魚、鱆紅魚、甜蝦、北寄貝、海膽、玉子、 蟹柳，加wasabi來吃，味道都唔錯 ，品質都ok！冷麵加添了牛油果、青瓜絲、 碎紫菜、 蟹子，將麵加進冷麵汁， 幾樣配料混埋一齊 ，冷麵更好吃！👍 套餐配原粒紅豆冰，大大粒紅豆， 不太甜， 不太硬，不太淋。 餐後，飲埋杯紅豆冰，好滿足！👍比目魚蕃茄湯讚岐手打烏冬: 蕃茄湯底味濃。比目魚扒， 簡簡單單煎香，皮脆， 啖啖肉嫩，骨少， 無腥味 ！晚飯時間， 總是坐滿人， 要在店前的自助取票機取票等候入坐。晚市價錢，算抵食。

一向都好中意佢個蕃茄湯底讚歧烏冬烏冬上面既炸蒜係成碗既精髓次次都忍五住飲哂佢個湯底禁耐無食今次再食 水準依然今次嗌左個炸豬扒讚歧烏冬炸豬扒夠脆 烏冬既蕃茄湯底都好濃好食

同女朋友睇完戲，諗住都肚餓求其咩都好食。點知咁都搵到間令人喜出望外，難食到爆嘅日本野。九十蚊到食個曼魚炒飯實真係唔貴，食開嘅都知係咁上下價。難得在獨特嘅手法可以炒到個飯層次分明，飯還飯，曼魚還曼魚。可以想像到預先炒好定飯底再叮熱啲曼魚放上去，誠意十足，我10歲個妹整嘅話我會俾十分。食到一半，真係頂唔順，我唯有拎自己袋入邊價值9.9$嘅Oreo出黎撈飯，先叫做食得完。就係咁，一舊水貼錢買一個失望，不可一，不可再。如果你地老闆見到呢個po, 唔該加買茶葉個位同事人工，唯一一粒星就係俾杯茶

以前細個既時候成日都會食呢間，唔知點解呢間會愈開愈少🙈🙈甘味係我回憶中都佔左一部分🐻🐻🐻🐻🐻🐻🐻🐻🐻🐻🐻🐻🐻今日放工之後，突然想搵返甘味來食，但發現原來剩低好少分店咋拾遠取近，來左鑽石山食，雖然放左工都要坐好耐車來食，但距離都阻止唔到我食好野既決心🐻🐻🐻🐻🐻🐻🐻🐻🐻🐻🐻🐻🐻🐻細細個一定要叫既蕃茄雞扒烏冬，原來都貴左好多🙈🙈希望我地既人工都可以跟得上通漲雞扒烏冬依然好食！！！再叫左個雞軟骨餃子，好好咬口，都幾岩同蕃茄烏冬一齊食仲有叫左牛肋骨蕃茄烏冬，牛肋骨韌左d，個燒汁可以再濃味🙈再嗌左個甜蕃薯🍠都好甜～幾啖就已經可以食曬發現呢一間味道雖然有進步空間，但依然有佢吸引既地方，走既時候仲有人排緊隊，希望香港可以多d唔同種類既餐廳，唔係只係得大型連鎖店🥰

同朋友去鑽石山睇戲，睇之前就黎左呢間店食烏冬，叫左個壽司併盤併讚岐手打烏冬。一個lunch set既可以食到烏冬又有壽司食，都好抵食。呢到嘅烏冬好彈牙，湯底亦好濃郁，一直好鍾意食呢到嘅烏冬。個壽司併盤亦好豐富，有8件壽司，仲有唔同嘅口味。