炳記茶餐廳 (已結業)

炳記的結業係西營盤街坊的一個非常無奈的消息，服務區內街坊幾十年，亦是一帶海味鋪從業者的聚腳點，原因好簡單因為嗰份人情味及食物一直保持極高水準就係呢度嘅魔力。小弟對舊式冰室及茶餐廳一直情有獨中，尤其是經營已久較舊式的小店，無需要金碧輝煌裝修、亦無需要制服整潔的服務員，只要食到經營者嗰份誠意我就會時常幫襯，炳記屬於我最喜愛之一，而且在我心目中是三甲之首，老闆親自沖製的奶茶更是我飲過的最好。我明白到天下無不散之筵席，我數數下自己由初中到今日已經係一個中年男士都幫襯咗經已超過30年，眼見幾位老閭年紀已經老邁，祝願他們退休生活健康快樂！

好味道真可惜咖啡紅豆好好味牛肚牛肉米粉加沙嗲好好味菠蘿油熱辣辣西多士仲好咩老闆一把年紀冇人接手太辛苦了這些茶餐廳買少見少少咗一番風味蛋牛治好好味😋雞鎚右面仲好味⋯⋯

中上環地區雖然舊，但好多又好食又抵食嘅茶記。呢間差唔多每個禮拜都嚟食，而且老闆記得哂食客叫咩名，好有人情味☺️講返先，我每次黎都係嗌牛肉麵。$19你話邊度搵😝😝佢係半山熟嘅嫩鮮牛，面係大光麵(好似公仔麵但係冇咁油膩)。不過我知人人唔同，有人鍾意食熟嘅或者醃左嘅牛肉。鮮油多每次黎食完牛肉麵都已經九成飽所以要同人share呢個夾住厚厚牛油嘅多士。舊式茶餐廳好嘅地方係你嗌咩佢都整到俾你，餐蛋白餐包，牛筋要林定硬，有時叫佢加多半杯檸茶都得。我食過一次蛋牛治，普通啦，但牛肉麵一定唔會失望！留意翻呢間三點就關，因為佢好早開舖😛😛佢入面好闊落，唔哂見到出面好多人就唔入去，係舊式啲，但衛生ok。

向西營盤返工一段曰子，成日經過呢間茶餐廳，因為外觀關係，所以從來無打算幫襯。 後來，與同事閒聊及極力推介茶餐廳的奶茶。所以今朝，我決定獻上我的第一次，入去試一試……呢度同出面的茶餐廳同，無得叫早餐A,B,C。全部單點叫發。 冇餐牌，得塊膠板掛喺牆上邊。別無他選嘅情況下， 我叫左碗魚皮餃河加沙嗲，同埋一杯凍檸茶。  我諗好多人覺得 河粉加沙嗲有啲怪 ，但係出奇地好食喎 。 係鹹咗少少 ，但魚皮餃ok好煙韌好有口感。嗰杯凍檸茶好飲到不得了 ！最勁嘅係幫你篤埋檸檬。真係估佢唔到。我最欣賞嘅係佢哋既服務態度非常之好，同出面嘅茶餐廳相差好遠。感覺好有人情味，唔錯！

當台式飲品成為唔少香港人日常必需品嘅時候，有幾多人仲會記掛港式傳統味道？自小就有飲奶茶嘅習慣，一杯傳統港式奶茶到肚先係一日嘅正式開始。炳記亦係自細食到大，皆因咁多年杯奶茶都保持到水準。得閒坐低飲杯奶茶，食件多士，都係人生一大樂事！

一間有實力的小茶檔，地方樸素但奶茶質素絕不簡單。一走進舖頭已見沖茶廚房。叔叔會熱情地向客人打招呼，但只見沖茶叔叔忙於煲茶，茶香四溢。叔叔是用傳統煮食爐煲熱舊式的不銹鋼茶壺造茶的。每次嚟到都總會叫奶茶咖咉多。絕配。奶茶飲口，有厚度，有茶香。最緊要仍然很熱。熱度適中。喝一口奶茶，茶香仍會留在口中一段小時間。再來一口自製的咖咉多，很配合。咖咉是傳統味道，唔係好多餐廳會有得食。這裡可一嚐，不太甜還帶有點香味。

星期六返工嘅強心針，返工前都會去修打蘭街的角落炳記叫早餐，平常多叫鮮牛米少辣加茶走做早餐。舊式茶記叫飛砂走奶，砂是砂糖，走奶多數用係奶茶，唔要砂糖淡奶而用煉奶取代，奶茶會較香濃，含糖量較高。炳記外賣會奉上奶茶前會加砂糖，如果唔想茶走但又唔要飛砂，咁就要叫茶少，即係少砂糖了。佢的鮮牛唔似有用鬆肉粉，有質感，加上米粉如果堂食會叫西多士，佢嘅翼尖都好食，如果你是第一次到炳記，其實走過店面進內還有一個內堂，好似一個蛇竇，因為唔進入店面係睇唔到依個空間值得一讚，炳記伯伯好親切

修打蘭街有兩間人情味小店，其中一間就係炳記。通常與朋友二人各點一碗粉面+奶茶，再share一份西多士。佢地既西多士真係好好味！新鮮炸好的多士充滿蛋香，再加上煉奶既清甜及牛油既咸香，香甜鬆脆。滿分的邪惡。每人食半份當作飯後甜品不太過份吧！奶茶都好出色，茶奶平衡。聽到鄰枱的食客都讚他們奶茶做得香濃，自己在家做不到。記得第一次入來時以為好細間，眼見得兩三張枱。原來再直入仲有一個舖位全是座位。但本人喜愛坐出面，對住水吧！聽著老世門與食客閒聊，談笑風生。

星期六一早去左上環聽完talk，同事介紹食好東西，帶我行左幾條街，轉入內街，當我想繼續行之際，同事話已經到。門口非常隱蔽，入茶餐廳以後滿座，老闆叫我地轉入去有位，轉左之後，好似穿過隧道去另一個地方咁。餐廳食物沒套餐叫，食物飲品單點。我叫左餐肉蛋公仔面加秘製沙嗲醬($19+$1)，沙嗲醬自家製，味道似東南亞醬料，有粒粒花口好嚼口好香，蛋煎半生熟，細個樓下時時食，而家好難搵當年風味。飲檸水，餐廳好細心幫客人整好檸檬，檸水送上，已經可以飲，我不加糖唔太酸，仲覺得似左好多維他命C。大家多多支持小店！

星爺嘅一碗黯然銷魂飯，食到一個人落淚。看嘅時候只會覺得好誇張，只會覺得睇戲先至會有。今日。一碗湯河，一個炒蛋加一杯檸茶，令我流下眼淚。出世到20幾歲都住在這餐廳旁，他們都是看著我出世的，我亦是吃著他們的東西大的。搬走了百般不捨，很小再過來，但內心從未有離開過。今天回來了，步入餐廳，如常的裝修環境，幾張熟悉的面孔。但他們並沒有留意到我，我入了內堂坐，人不多，差不多一人一張枱，但感覺是溫暖的。不斷看，不斷懷念。餐牌上沒有我的招牌餐，疑惑甘問姐姐還有沒有，幸好，你還在--牛肉雞搥河。還是那種味道，清淡的湯底，有味精的味道，我卻還喜歡。獨有的牛肉質感，不是經過梳打粉醃的，是鮮牛肉的味道，但卻有特別的味道，自己做不來。雞搥，我最愛，滷水味重。外面嘅只有雞翼，但這裡有我愛嘅雞搥。河粉依然晶瑩剔透吃嘅時候在想，我這個招牌麵會唔會令煮麵的姐姐有一刻會想起我這個人。火腿炒蛋，到現在我也十分喜歡食，一齊的來源就在這。看似普通的炒蛋，但滋味卻在心中。炒蛋嘅蛋汁充滿整個炒蛋，小小嘅幾條火腿配合已經足夠了。凍檸茶，還是不用自己篤檸檬。所以男友不用帶來了。甜度剛好，茶味適中，但今天剛好多了點鹹味，淚水嘅味道。走的

上環的炳記，大概只有住在這的人才認識我認識炳記，是因為你還記得我們在這裡買的蛋牛治烘底嗎？不知道是年紀小還是因為人家認得你，我們點總了涵去多到掉下來。是我記憶中吃過最好的蛋牛治(家貧不要要求太高) 今天我早了起床，就是要來吃一件蛋牛治，和奶油多。事實上，裝潢不變，賣少了支裝汽水，多了位置好多士配奶油多，不會差的配搭吧依舊厚多士，沒有縮水了蛋牛治有點失望。不夠燶，而且內裡那當年的蛋汁鹹牛肉汁漏出來的感覺沒有了。只餘下和我媽煎的慳皮煎蛋一樣薄的內容。。。(幸好我媽只管看台灣綜藝節目，不看食評，否則我應該沒命了)不過這裡人情味都是很濃厚，就這種味道都值得一吃，價格還是10元奶油多，15蛋牛治，當年今日朋友，來到這令我記得當時年紀少在你家中樓層殺曱甴，然後過百隻湧泉而出，我跳船逃生的一個故事，到今天記憶猶新。然後，我當你的姊妹陪你出嫁，然後你搬離修打蘭街，然後。。。是時候你要再和我來吃我們記憶中的蛋牛治！

之前幫襯過粉麵，略嫌選擇少，今日下午抽開再嚟嘆茶，點咗份花生醬多士，凍檸茶。原來個多士先係鎮店之寶 外皮十分香脆，厚身多士居然處理得咁好，正，花生醬好均勻咁搽滿包面，好香花生味。凍檸茶水準當然高啦，其實平時經過炳記門口都會被一陣濃烈茶香所吸引。

今日中午走到小時候經常嚟嘅修打蘭街炳記，不過我唔肯定有冇轉過手，因為我講緊20幾年前嘅事。小店其實無乜裝修可言，廚房同水吧連成一體，用具亦充滿上世界80年代味道，但睇佢賣嘅嘢似車仔麵檔多過似茶餐廳。點咗個魚皮餃併紅腸米粉，加杯凍檸茶。見食評有人推介魚皮餃，入口的確係幾好味。紅腸就麻麻哋，好膠好死實實而且染色染得好勁。本來想叫油麵，但老闆話無生麵供應，只有公仔麵，咁我揀米粉啦，餸菜選擇不多，連菜都冇，有點失望。幸好檸茶水準不錯，加返啲分。

鮮油多 $9熱奶茶 $12(好食指數: 7.5/10)西環呢個老地方好就好在有呢d古式d既茶檔，以為舖面得幾個位，其實入面內舖別有洞天。厚多士好脆，夾住成塊牛油真係膽固醇爆燈，好得意傳統牛油好似有種橙味咁。熱奶茶當然係茶濃奶滑，好有香港地道feel。最重要既係好抵！2-11-2013

自己住在上環, 總是覺得上環無乜好食既茶記, 全都是又貴又唔好食!但是上次媽咪帶我去食炳記之後,我就喜歡了這裡! 這間不起眼的茶記, 就在橫街裡, 如果不是媽咪帶我來我都找不到呢!我喜歡鮮牛米, 多士, 三文治, 紅豆冰…好味又唔貴!!全都是簡單的食物, 沒有做作, 真材實料!