海港酒家

营业中

休息中

見香港疫情開始緩和，終於按耐不住，同老婆出外食晚飯。地點選了屋企附近的海港酒樓。去到酒樓，只得約10枱客。二人點了泡菜煎餃子，佛跳牆，豉汁蒸白鱔及蜜味欖角骨。等了約半個鐘，餸還未到。於是叫夥計跟進。過了5分鐘，夥計才説佛跳牆巳沽清。感到有點氣憤，無可奈何，改了叫兩份淮山杞子燉鮑魚湯。再等了5分鐘，鮑魚湯先到。立刻飲一啖，味道不俗，材料亦豐富。跟住煎餃子亦到，老婆食一口，裏面竟然係凍。立刻叫夥計跟進， 但為免夜長夢多，直接叫夥計取消算了。跟住再上豉汁蒸白鱔。白鱔算肥美，食落彈牙，豉汁味濃郁，很不錯。另欖角骨味道亦不俗，蜜糖味加上欖角甘香味道，起了點化學作用，而排骨亦做得鬆化，送飯一流。其實這裏的小菜做得不錯，但服務水準很一般，令我對這酒樓印象大打折扣。

假日飲茶都預左要排隊,但無諗到咁誇張,酒樓門口企滿人,想攞排隊號碼都要穿穿插插先攞到!這裡空間非常大,雖然d枱排得密密麻麻,不過就因為咁先容易等到位,唔洗半個鐘已經可以入去!坐低後立即搵點心紙,選擇都唔少!<鳳爪排骨飯> 飯粒軟硬適中夠哂熱,淋上豉油加埋豉椒,又香又好味,可惜排骨唔算多肉,鳳爪好細隻,有點失色!<紫心香芋丸> 炸得好乾身,沒有油膩的感覺,內裡的香芋餡好味又唔甜,真係食得好滋味!<鮮蝦腐皮卷> 未食已經覺得好油膩,外皮唔係好香脆,餡料雖然有蝦有豬肉,但太油膩,食左半件已經有點濟!<翡翠筍蝦餃皇> 蝦餃蒸得好熱出哂煙,皮薄餡靚,咬開蝦餃見到大隻又新鮮的蝦,內裡還有筍,食起來好爽口!味道不錯!<蒜蓉蒸鮮魷> 除了有魷魚筒又有魷魚鬚,咬左幾下,居然食起來唔韌又爽口,下面仲放左好多粉絲墊底,吸盡蒜蓉汁,一啖魷魚一啖粉絲,十分好味!整體來講,酒樓環境雖然大,但枱和枱之間實在太密,坐得比較迫!人手又唔夠,每次點單或加水都要自已行出去搵人,服務方面仍待改善!至於食物都算可以,下午茶大中小點同價非常優惠,下次

食生日飯最痛苦嘅莫過於要諗食乜，上幾年差唔多世界名地嘅菜式都食過晒，幸好今年主角提議返璞歸真食返中菜。我覺得呢個餐超抵食！埋單每位都係百幾蚊乳豬唔記得影😅但呢個湯超正！因為好濃同超多花膠！呢個伊麵啲蝦好新鮮彈牙，味道不太濃，冇搶左啲蝦味！墨魚餅冇乜特別😅鮑魚都新鮮條魚蒸得剛剛好西蘭花帶子正常脆皮燒雞好正！啲皮堅脆！個炒飯啲配搭有啲怪😅壽包正常

$148/1斤真係好抵食！一家四口食4斤！6個人食五斤！7個人食6斤！係唔夠食架！因為實在太好味！好食到一個星期食左三餐！啲蟹真係好靚好鮮！就咁清蒸真係原汁原味！蟹肉好多！真係啖啖肉！一家4口，叫一隻4斤，叫一個湯，叫多一個餸，真係非常滿足！去到差不多枱枱都食緊！因為$148實在太抵食！到我地第三次去食嘅時候，已經得返最後一隻5斤！都好好味！之後就加返$168/1斤！上年最平都係$188/1斤！估唔到係海港都可以食到又平又靚嘅長腳蟹！記得清蒸就得！有次試過花雕煮，味道麻麻地，仲要加多$100！感覺唔抵！所以記得要清蒸！

我們一行十人，到這位於將軍澳的海港酒家吃下午茶。這酒樓距離寶琳地鐵站很近，大概走兩三分鐘就可到達。我們坐下後，發現這酒樓的下午茶以點心和湯米線為主，若想吃飯和炒粉麵，就要付正價或午市的價錢，結果我們點了五碗湯米線，還有大量點心。這酒樓的裝潢不錯，座位舒適，不過明顯人手不足，我們在點心紙上選取點心後，等了好一會兒也沒有侍應到來，結果要自己拿着點心紙去找侍應。米線和點心源源不絕地送上。先說說湯米線，湯頭不錯，米線的質感也不錯，配料分別有叉燒、雞和燒鴨，叉燒最好吃，雞一般，燒鴨味道也好，但是脂肪層極厚。至於點心，大部分的味道也不錯。最好吃的是流心奶皇包，它的包皮是黑色的，內饀的奶黃不太甜，有香味。豬骨粟米粥和油菜也好吃，味道好，不肥膩。炸兩腸粉則比較差勁，因為腸粉內包着的油炸鬼口感欠佳，我們覺得是炸過不只一次的。另外，豬手炆的時間不夠，吃的時候覺得太硬。看着畫滿圈圈的點心咭，我們都飽得捧着肚皮，但每人也只是要付四十三元，性價比可說頗高。

朋友介紹海港長腳蟹做緊$168/斤，咁抵，梗係即晚去試下啦...一有位就即刻出去揀蟹，最細果隻都6斤重，不過我地都有8個人，仲可以加多個餐，個餐仲有魚有海鮮，仲有龍蝦伊麵...真係大滿足，每人都係300 幾蚊

呢排成日見到長腳蟹廣告，每次見到都好想食但又驚唔好食！朋友試左幾次都話掂，終於等到機會認真試下喇！仲要好好彩我地呢隻係果晚最後一隻😆一嚟試左碟主菜長腳蟹先！約5斤重！小妹食左2隻腳1個鉗，個胃已經半飽！之後再有小籠包，肥牛，丸，蒜蓉粉絲魷魚都一流！可惜掛住拆蟹冇乜影相😂

今日午餐落左去海港買個叉燒油雞飯返屋企食$33，無同佢講到啲咩特別要求。點知啲叉燒太肥，有啲肥到大半舊都係肥豬肉，而啲豉油落得又太小，好難撈飯食。唯一比較好係啲雞肉全部都係雞胸，比較多肉。

家人想食龍蝦的關係，我就帶佢地到附近的中式酒樓試試。這間酒家都算主打海鮮。為保留龍蝦🦞的鮮味，我地選左用上湯去煮，龍蝦都幾大隻, 龍蝦上枱好香，肉質結實及鮮味，好新鮮，吸收了龍蝦汁的上湯，配上伊麵，都好入味🤤我們點了另一樣係鮑魚雞煲🐓，鮑魚係用鮑魚仔再用上湯煮，雞件方面係鮮雞件，有點像啫啫雞。

自從海港裝修後，我同屋企人都冇去過，今晚咁齊人，又去試一試先。一黎就叫咗媽媽致愛—燒鵝半隻。果然係燒到皮脆香口， 而且啖啖肉，一咬落去，肉汁同肥油就bi出，配埋酸甜醬真係一流。跟著就上咗個經典牛仔骨，一大陣黑椒同洋蔥撲鼻而來，肉質嫩滑，非常香口同埋熱鍋上枱果然夠哂熱。我地冇叫到飯配餸菜，反而叫咗個鮮蝦燴伊麵。鮮蝦都香口同爽滑彈牙，但個麵就冇咩味道，而且配搭個無咩味嘅汁，所以只食到蝦嘅鮮而消失咗伊麵嘅入味。口痕嘅我就叫多咗兩款小食—麻辣口水雞同酒香鴨舌首先個麻辣口水雞都幾失望，個汁竟然唔係平時食開嘅麻辣醬油，反而係豆瓣醬煮開嘅麻辣汁，成件事變得十級奇怪，仲要十級辣，就連係辣不歡嘅我都避而遠之，真係搞唔掂，最後只好放棄咗佢。跟著嘅鴨舌，其實味道同醉雞一樣，用咗醉雞汁醃好再入雪櫃冰冷。食上口爽口又好咬，都幾好食，如果再入味啲一定會加分！成餐飯最出色嘅當然係燒鵝啦，呢個冇得輸，其次係牛仔骨，其他就中規中矩。另外酒家裝飾完嘅環境都幾別緻舒適，可以黎試試。

今晚family dinner9個人黎食晚餐見到人叫長腳蟹 又心郁郁好在冇訂都仲有兩隻簡 好大隻好新鮮食完隻蟹大家都好飽了 隻蟹$2200話抵又唔係抵 但老豆中意食就冇計個人prefer龍蝦伊麵多d燒鵝鮑魚太un了 蒸過龍個花膠螺頭雞湯都好飲

終於試食蒸氣石鍋，之前女友同同事食過一次覺得好好味，海鮮都新鮮，四人餐亦幾掋食，但我倆遲遲都未搵齊腳，都未食到！ 呢一晚路過，興起走去問下，其實不一定要四個人，兩個都可以食，只不過無得叫餐😛 問完又有位，就走咗入去lu。粥底唔少得！瑤柱咸排骨($58)，跟住㨂咗龍蝦($168)，蒜蓉元貝3隻($381隻)，沙白蜆($48)，加個菜，蒜蓉聖瓜($58)，每樣都教咗你蒸幾多分鐘，都幾好！大至上都唔錯，但未夠鮮！隻龍蝦我覺得貴咗啲添🤨 到最後，食個粥，都唔錯！份量仲幾多添，好彩都無叫勁多海鮮，因為食埋個粥都勁飽🤪 不過⋯⋯好似唔多覺有瑤柱咁🧐🧐總括來講，兩個人就唔會再來⋯⋯約到四隻腳就不防再來食😁

今晚約咗朋友嚟佢屋企樓下嘅呢間酒樓食晚飯 海港嘅食物質素一向有保證 中上咁啦 所以一齊再去試下 冇諗過今晚呢餐比想像中更加有驚喜👍🏻六點到入到去 已經坐咗半滿 好彩我地早到咋 睇嚟呢間酒樓好受歡迎😮我地叫咗三個小菜 第一碟係鮑汁燴花膠海參 花膠炆得好林身 海參一啲都唔潺 仲幾有咬口 啲汁又唔會蓋過海參嘅味道😛黑椒豬手 豬手好大隻 又好多肉 肉質又唔會太林 黑椒汁好惹味 送飯一流🐷 配埋啲洋蔥 好好食 食完啲肉仲可以攞住條豬骨 成條噒 好正😅生炸蟹肉脆燒茄子 呢碟係全晚最有驚喜 茄子輕輕走過油 外面有少少椒鹽 又脆脆地 入面就好軟熟 再配埋淋喺上面嘅蟹肉做芡汁 食落好有層次🙊啲小菜咁好味搞到我都食咗兩大碗白飯呀 果然keep到水準 下次再嚟食過先😻

同一班朋友相聚，朋友揀左海港酒家。菜色都是一般中式酒家菜色，不過就有阿拉斯加長腳蟹，而且賣$288一斤，去魚缸揀左一隻3斤半，用蛋白蒸。老老實實，價錢真係好平，但蒸得過晒火，蛋都老晒。其他菜式還算可以，不過不失。

已經食左好多次，主要係因爲屋企附近食材新鮮，尤其係隻長腳蟹，現場去魚缸度揀188一斤，揀左一隻五斤，七個人食都好夠每次都到都會再叫豬肉丸同燒賣燒賣係完全未蒸過的，生上，好特别唯一要講一講個服務某d侍應好似唔憂做咁十問九唔應