永利餐廳 (已結業)

今日中午我們去咗何文田窩打老道嘅「永利餐廳」食中午飯！我們叫咗洋蔥汁龍脷柳飯嘅外層炸粉唔係好厚身，入面嘅肉質好嫩滑，洋蔥汁嘅味道好惹味！鮮茄斑腩飯嘅外層炸得都幾香脆，斑腩嘅肉質好結實彈牙，蕃茄亦好新鮮，而且份量十足！星洲炒米炒得好乾身同鑊氣十足，材料亦非常豐富，味道相當惹味同唔會過鹹！

經常在佢收鋪前去食飯，幾乎所有炒嘢都好食。我最喜歡黑椒焗牛脷飯，炒底軟硬適中，牛脷軟稔，汁量啱啱好，焗到面d牛脷邊輕微焦脆，勁好味！其次喜歡魚香茄子肉碎飯，炒貴刁，星米，夏門炒米… 有個飯腳次次食肉絲炒麵，有個成日炒飯，西炒，五香肉丁炒…

阿爸阿媽啲牙唔好，所以屋企成日都有魚食，同埋工人姐姐蒸下肉餅、水蛋咁，啱晒兩老食，今晚帶佢地出街食飯，當然都要遷就返佢地啲口味啦，佢地仲話平時工人姐姐整餸無乜未，搞到佢兩個成日口啖啖，所以強烈要求我要點啲惹味菜式比佢地嘆喎，收到！首先整番個薑蔥魚頭煲($128)，頭大而肥，魚頭煎得好香脆，肉質雪白細嫩，啖喺熱辣辣嘅砂鍋入面，凍凍地嘅天氣享用就最好不過。成個煲都夠香多汁，加埋炒香嘅蔥薑，好好送飯。再黎一個鮮茄蛋煮鱸魚($100)，鮮茄煮蛋由細食到大，味道酸酸甜甜，夾埋魚都係第一次試，鱸魚營養豐富，口感清爽，魚肉單純鮮甜，骨唔多，非常老少咸宜嘅一道菜式。再叫埋呢個鹹蛋肉碎蒸水蛋($62)，夠晒有味喇卦，軟軟滑滑嘅水蛋香滑細膩，鬆但唔散，拌入飯裡面十分容易入口，兩老都比平日食多左好多飯。 最後我私心點左個自己好想食嘅黑胡椒原隻蝦碌($138)，香脆但唔會太油膩，好開胃，蝦又甜又辣，蝦肉鮮味，彈牙結實，好味到連手指都吮埋呀！

今晚真開心，好耐無試過一家大細、有老有嫩咁齊人出去食飯，因為阿爸強烈要求想食羊腩煲，所以近近地揀左呢間喺屋企附近嘅餐廳飯聚。天氣涼涼地，老豆食羊肉癮又起，坐低第一時間叫個雙冬羊腩煲，細味之下肉腍入味，皮彈唔羶，醬香濃郁，一次過滿足「暖身、溫飽、滋味」三個願望！支竹同大葱吸晒柱候醬湯底精華，無得彈！一家人一齊食更覺溫馨。冰梅一字骨就係老媽子點嘅，佢話送飯好喎，用冰梅醬炮製的汁醬一口清新酸甜，開胃之作，排骨咬落去啖啖肉且Juicy，特別惹味。鹹魚蒸肉餅呢d就老少咸宜啦，肉餅很鬆而唔散，肉餅食起上黎好滑，味道啱啱好，又係一道好好送飯的家常菜。清炒豆苗其實無大家想像中咁容易整得好食，好鐘意豆苗的獨特氣味，美味可口，份外濕潤嫩滑！仲有個煎蛋免治牛肉飯，上枱無耐小朋友就急住食咗，所以無獨立影相。冇拍底。太陽蛋輕輕放在肉醬上面，蛋白煎得微脆。肉醬混合左蕃茄醬同牛肉等，舖滿大大碟白飯之上，撈勻黎食好惹味。

今日同男朋友兩個都夾到放閒日, 於是帶埋狗狗去何文田一帶行街街, 放低佢喺舖頭做護理, 我地兩個就去撐下枱腳食個LUNCH先.男朋友話之前食過呢間茶餐廳唔錯, 所以就帶左我黎呢度開餐.我地兩個為食鬼未食早餐, 所以好肚餓, 於是諗都唔諗就叫左兩款極邪惡經典茶餐廳美食──咖喱牛筋腩飯同乾炒牛河, 兩口子開心SHARE.先講個咖喱牛筋腩飯, 一層筋一層肉, 炆得軟腍, 牛筋軟綿, 入口即化, 薯仔又夠入味. 上枱已聞到陣陣咖喱香, 食落辣味慢慢滲出來, 香辣有層次, 剌激食欲, 配飯身粒粒分明嘅白飯, 認真一流.而個乾炒牛河好有鑊氣, 好彩唔算好多油好肥膩, 整體上做到香口, 乾身好味道.  牛肉嫩滑，無過量嘅鬆肉口感, 加埋少少燶香, 越食越滋味, 仲有芽菜、韭黃、葱段均勻分佈喺河粉度，盡見師傅炒功.雖然兩樣都好邪惡, 不過又真係好好味, 唔緊要啦, 我地兩個瘦人大把QUOTA, 食多幾次都唔怕, 嘻嘻……

今日一大早要同同事去何文田果頭見客，咁早起身梗係要對自己好啲，所以就搵左間餐廳歎返個早餐先~提起鮮牛公仔麵，好多人都會諗起深水埗好出名果間”維x”，估唔到嚟到何文田呢間小店都食到類似嘅鮮牛肉一丁(40蚊)，啲牛肉咬落好嫩滑入味，食得出好新鮮，連湯底都鮮鮮地，食完呢個早餐個人即刻powerup~!同事叫左個最經典嘅餐蛋一丁，配埋凍飲都只係32蚊，兩大隻太陽蛋，加上煎到好香嘅餐肉，同事話抵食兼有水準~

屋企停電，所以今晚就唔洗阿媽煮飯，我揸主義帶佢同老豆嚟呢度開餐，食下家常小菜，一家人共聚天倫。唔好睇少家常菜，有時簡簡單單嘅菜式反而仲考功夫、仲難整得好食，今晚一於試下呢度會唔會成為我哋一家日後嘅飯堂先~首先點左個土魷蒸肉餅，自問係肉餅迷，任何肉餅都勁BUY勁鐘意食，貪佢送飯一流丫嘛。雖然土魷蒸肉餅十個煮婦十個都識得整，不過好似我媽子咁，D水準好飄忽下，成日都會蒸過龍定唔知咩原因，整到又乾又實！呢度就整得Juicy又彈牙喇，用嚟送飯真係無敵！清炒豆苗又係另一款快手家常菜，又健康又好味，簡簡單單，食落口感好鮮嫩、清爽脆口，完全食到最天然嘅本味，健康有益。白灼海蝦又係阿媽久唔久就會整嘅，因為老豆鐘意食嘛！其實最緊要來貨靚，咁輕輕灼下已經好好味。呢度整到保持鮮、甜、嫩嘅原汁原味，點唔點豉油食都好滋味。呢樣係阿媽開聲話要食嘅，佢以專家口吻話，盲鰽唔係魚味濃嘅魚，所以最適合用豉汁蒸。上到枱大大條好抵食，魚身豐腴，細味新鮮味美，肉質滑嫩，阿媽連個魚頭都唔放過，佢話識食一定要食埋魚頭喎。整體上出品都幾有水準，唔怪之得有咁多家庭客幫襯。

今天經過窩打老道，聽聞朋友介紹永利餐廳不錯的，一心想試。見到環境不算差，吃了沙爹牛肉炒河，味道還可以，但味精很重，令我很口渴，侍應的態度也一般，熱水潑濕我也不道歉，我想不會再去食飯。

這間第一次來食，看了下餐牌想起很久沒吃蔥油雞扒飯，就點來一試，順便作為測試這店的水準。蔥油雞扒飯來到，賣相尚可，蔥油雞也略帶清淡不油膩，皮脆，肉質也嫩滑，合格以上之作。重點的蔥油也份量及濃淡適中。$46，價錢不算抵但也尚可接受。

今日食左3個餸開頭夾起隻隻都冇肉，以為好流啦點知唔係，原來炒蜆好正啲肉冇沙，又大隻，正呀另外一個係鹹魚豆腐煲勁多豆腐，都幾滑不過完全冇鹹魚味，哈哈。。。不過都冇影響都幾好食三個最差就係粉絲蒜蓉蒸魷魚完全冇味道一啲都唔鹹粉絲仲要軟晒唔好食不過都算唔差架啦可以再嚟過

來到旺角窩打老道，就在匯豐及沙士酒店附近見這小廚，在大街當眼位，都算方便 四個人隨便點些家常小菜，這裡好多人都點蒸魚，有好多魚揀，我都叫碟豉汁蒸黃立倉，剛落完柯打，就來了四碗例湯，非常好味老火青紅蘿蔔湯，好有誠意  豉汁蒸黃立倉蒸得剛剛好，肉質幾嫩又滑，豉汁調得幾香，是本晚的焦點!枝竹火腩豆腐煲，吃得出火腩有燜過也燜得幾林，但咸味差D，整體都唔錯!西蘭花鮮魷同滑蛋蝦仁都中規中舉，蝦都幾大隻也都幾爽!還有好多個石油氣爐上檯既菜式，以後可以多點來 

今天到九公館＜九龍公共圖書館＞頭先小食唔夠照，很快感肚餓，看看手錶，仲可趕及下午茶時間。記得附近有餐廳，馬上趕去醫肚。這家餐廳客人不多，不算嘈吵。環境ok。餐有很多款我點了奶油豬，朋友們點了米線及豬扒包。要向職員索取熱水.奶油焗豬仔包上來了。但是看清個包包，一邊是煉奶，一邊是黃色的油(馬加連)。 第一次遇上2樣物料是分開囉. 奶油豬奶油多的精髓在於牛油和煉奶混在一起的鹹甜共融。 這個包無囉。 就算上下2層一同吃，可是沒有如此大口。 再加上馬加連，真係好邪惡.唯有將2邊合埋, 互相磨擦, 希望佢地2個HIGH到對方,溝到馬加連和煉奶混在一起.但太天真了, 唔WORK.滿口馬加連,,, 真係好.............香茅豬扒酸辣米線 HKD 33朋友表示 : 不太酸, 不太辣所以食完無出汗.澳門豬扒包 HKD 28中間有豬扒, 蕃茄, 一點菜, 仲有溶化的黃油.食完真係飽飽地.熱奶茶 - 一般啦.

又到星期六早餐, 今次去近何文田, 但失望而回. 點了吉列魚+腸仔+熱咖啡吉列魚+腸仔+多士 - 吉列魚都夠熱, 但太薄, 腸仔煎過但太咸. 多士去了皮, 細了又不脆熱咖啡 - 唔知點解酸酸地, 唔好飲.環境: 超差, 由於冇位坐窗前, 太陽曬到頭十分不舒服, 只有在窗前放報𥿄才頂下去.

新開張以來嚟過呢間餐廳已經好多次，終於响OpenRice找到了它 - 永利餐廳。今日又嚟食晚飯，見到差不多每張枱都有點蒸魚食，所以自己也叫了一條。呢度老闆話每日下晝都會去揀魚返嚟做晚市，見到乜嘢新鮮就入貨，難怪枱枱都有叫。叫了一條清蒸細鱗，果然沒有失望，响呢頭啲餐廳真係好難食到鮮魚，知道呢度有真係附近街坊一大喜訊。再叫了一碟滑蛋虾仁，好食，嚟咗咁多次都知道呢間嘢嘅小炒一向OK。其實一間高級茶記都有咁嘅水準，價錢又公道，你仲想點？

餐廳開了兩個多月，每次想來吃午飯都是人頭湧湧，今天特意三點多才吃飯，怎知一進來也是幾乎爆滿，要等一會才找到兩個位子。這裡裝修後感覺比以前舒服多了，下午茶餐有很多選擇，在這區來說價錢也算便宜，難怪常常也這麼多人。坐下來先點了個XO醬豬頸肉炒一丁，老婆說想試試這裡的酸辣粉，於是再叫了一個中辣的牛腩酸辣紅薯粉和兩杯凍奶茶。先說說那個豬頸肉一丁，油不算多味道也不錯，之前也聽街坊朋友說這裡的炒粉麵OK，今次試過後，對我這個著重飲食健康的人來說也算合格。至於那個酸辣粉， 一個字，正！那加了酸菜一起煮的湯底，上面放了大量芽菜，蔥花和芫茜，跟紅薯粉的味道特別搭配，比起現在X仔的酸辣米線好吃多了！那湯帶出來的味道令人吃了一口又忍不住想再吃多一口，叫我這個不怎麼吃辣的人差不多把老婆的下午茶也吃光。總括來說這裡的食品認真OK，飲品也不過不失，要特別一提這裡的服務態度十分好，員工很有禮貌，下次一定會再來。