東城酒家 (已結業)

$108 既任飲任食火鍋近年經濟唔好，所以一直都會搵各式各樣抵食既餐廳，而且食肆都各出奇謀去吸客。友人推介一間有任飲任食火鍋既酒樓，位置係順安邨商場就偏僻些少，但性價比確係不俗。呢度既任食火鍋價錢星期一至四只係$108，六日同公眾假期就貴少少收$118，限時兩個鐘，而我地去果日係平日來。海南椰子雞鍋湯底就係揀海南椰子雞鍋，奶白色既湯底都幾夠清甜，唔差。美國肥牛打邊爐當然主打係肥牛，呢度就係可以出去拎肥牛，唔洗寫紙慢慢等，擺係雪櫃入面，好彩又唔會雪到冰哂，肉質不肥不瘦剛好，牛味夠，都幾爽口唔錯，拎左都差唔多有十碟以上。其他野食野飲醬料都係出去拎，熟食雪糕都有，所以都算應有盡有，而且呢度有啤酒任飲。服務都可以既，收野都算快，態度唔錯。環境就一般舊式酒樓格局，唔算大，但坐低都算闊落。總而言之，性價比確係唔差既任飲任食火鍋，仲有海南椰子雞鍋，今時今日算係超值。.

平時放假起身都係食茶餐廳早餐 今日family day就同屋企人落街飲茶 酒樓地方都幾大 11點前仲有早茶優惠 選擇都幾多 蝦餃燒賣必點 見到蔥花包諗緊係咪手抓餅之類既食物 叫完黎到。。。。原來係加左蔥花既饅頭😂😂都照食啦～蝦餃都叫皮薄餡靚 珍珠雞都幾足料 燒賣係豬肉偏多 無咩蝦 叉燒包都幾好味 其實以屋邨酒樓黎講我覺得水準幾好 同埋店員都好親切 唔會叫完聽到都唔應機 最多叫你等多陣 街坊們黎到都自己搵位 店員見未執檯都主動同你講等陣 人情味濃👍🏻

同事介紹，屋邨驚喜大發現。港式打邊爐，價錢非常平民化，味道不錯。 平日去食，港幣一百元全包有找，任飲任食兩小時，包埋湯底和茶介。裝修平民化，服務正常。熱吃有薑醋、胡椒豬肚湯、炆雞腳、馬拉糕、菜肉包、炸雲吞等，味道…係唔錯！打邊爐食品亦唔少，有牛有豬有蝦有魚，飲品也有好幾款選擇，不用在家打邊爐了！

食過2次，今次3人打邊爐，7:00食都唔洗等位呢個價錢，都無咩要求，香港都好難搵到咁平民價錢，真係自己買料都貴過黎食仲要有熟食去到8:00都會座滿7成左右，不過今次黎到，好似水準有所下降首先，無左我最愛的水魷魚又無左皇帝菜，其他食材不過不失啦，我地仲叫左收費的桶蠔，同珊瑚蚌桶蠔好大隻，不過隻隻都有沙，食到好唔過癮熟食個咖喱魚蛋豬失幾好食，豬紅都唔錯下次都會黎，不過應該唔會加錢叫野食了平平地又想打邊爐，住附近係不二之選

之前晚飯都到過東城酒家吃火鍋，感覺都不算太差，都係一般集團式經營嘅屋村酒樓質素，因為不是經常光顧 ，所以比較包容，將漏單、服務差視之為偶爾事件，今天中午，跟老公再到這間酒樓吃午餐，點了星洲炒米、蠔皇鮮竹卷、沙田滑雞粥、濃湯浸菜芯，送了一碟一口叉燒腸，埋單HK$165.50。星洲炒米和一口叉燒腸的味道還可以，鮮竹卷餡料不夠味，硬了一點，雞粥竟然加料，附送魚骨和頭髮絲，等了半小時， 仍未見濃湯浸菜芯的踪影，一問之下，發現又漏了單(不是第一次)，滿口鄉音的樓面姐姐竟然問我要不要取消訂單，而不是問我要不要補回漏單，一股怒氣巳湧上心頭，當菜送來的時候，又發現菜芯是沒有切斷的，更加覺得氣憤，由廚房以至樓面，都是毫無誠意，得過且過，視顧客如無物，最後結帳過程也不好受，收銀員連基本禮貌都沒有，不單只沒有眼神接觸，沒有笑容，沒有說多謝，錢就掟在收銀簿上。

呢幾日天氣轉凍，最啱打邊爐，一大班friend想食飽啲，唔想就住就住， 最啱就係揀啲任飲任食嘅火鍋店 。之前有friend介紹呢間東城酒家 ，都係任飲任食 ，一於就試下。呢間酒樓位於順安邨 ，位置係比較隔涉 ，地鐵去唔到，因為佢嘅位置屬半山區，所以舖頭明顯係做番同村嘅客。湯底可以揀清湯麻辣， 沙嗲 ，或者鴛鴦鍋。 基本上我覺得湯底唔夠味， 如果下次去可以自備定一粒濃湯寶。火鍋配料嘅款式算係幾多，肉類丸類蔬菜類，應有盡有，而且佢仲有唔少熟食提供，老火湯同糖水都有供應，飲品有可口可樂，忌廉康師傅等等。以一百蚊鬆少少嘅價錢嚟講，真係好抵。不過食物質素就普通，基本上啲熟食你唔會考慮食，而火鍋最重要嘅肥牛，真係唔多掂，吉野家都好食過佢。唯一可取嘅係佢啲手打丸類，算係幾新鮮。全程任食兩小時，呢個質數呢個價錢，下次可以再回頭。

今日食潮洲粉果， 發現蒸籠邊有"幾個上手"的痕跡，有白色的包，有黃色的 鬆糕。非常嘔心。。。肉眼所見，最少都有兩次無洗過。而食過的蒸籠也會同其他 污糟碟擺埋一齊 ， 可想而知會撈埋其他汁日或者污糟嘢。我同經理講，佢完全無正視問題，衛生差到極點， 絕對無下次😡

好抵吃$168 有三個餸Size 有可以，平均56元一個餸比大家樂抵！我們五個人吃了二個$168 三餸菜，加上一個波士頓龍蝦加伊麵底，這個要$198，本人覺得這個不龍蝦相比之下，反而很貴。還有火鍋128 任吃

去開佐敦谷玩，之後肚餓想食野， 除咗可以搭車去附近淘大食嘢之外 ，今次就去附近順利邨嗰邊去睇下 。上網搵到有呢間東城酒樓，去到附近發現係街坊食嘅酒樓， 幫襯嘅全部都係街坊 ！ 地方雖然唔大，但係都夠坐，唔需要搭枱同又有bb櫈 ！叫咗蝦餃，燒賣，叉燒包 。碟碟都好大碟，仲有燒鵝瀨粉同腩仔河粉，又係好大碟，可以夠兩個人食啦！價錢都係26蚊一碗 ，仲有雞扎 ，牛肉，都係大大舊同好好味， 比起連鎖嘅酒樓，質素同份量都爭好遠 ，仲有紅豆沙好夠面唔係一粒粒硬豆！ 四個大人同兩個bb，埋單都係四舊水都唔使，好抵！下次一定會再去！

在葵涌工作時, 已很喜歡到大窩口的東城午膳, 喜歡它的價錢相宜外, 食物的質素也不俗。到順利邨探親也就到此一嚐是否有一樣的水準。酒家設在地下特別適合坐輪椅的老人家出入, 二時開始的下午茶時段 吸引了一群退休人士成為座上客。先後點了四道點心, 一碗燒味飯及一窩伊麵足夠4人份量，食物質素不俗, 牛肉布拉腸粉皮煙韌, 韮菜角香脆, 值得推薦, 下午茶時段一碗燒味飯才$16.80, 而且味道比旺區酒樓更優勝。如此質素及價錢實在值得推介。服務方面屋邨酒樓也不可苛求了。

一行十人再加兩個小朋友，7點半入坐食小菜，叫左13個菜，一時間話兩款無，咁好啦我再簡，再轉二個菜。唔夠三分鐘又話其他兩款無，好，我又再改，等多一分鐘左右個待應再走入來話個海鮮卷都無，呢下我真係夠啦！同佢講唔洗改啦！改完又係無，我話不如你話俾我知其實仲有乜野食，點知待應話叫主任來，一陣待應佢話主任唔敢來，叫我出去搵佢，呢下真係火都來，我話唔洗啦，我地走，行到門口經理話要收食左果啲錢，我話無問題但我根本乜都未食！佢話咁照收茶錢同加一！我答無問題你敢收我敢俾！前後十分鐘左右收我110蚊真係俾個叻你！第一次出文！

夜晚同家人去食晚飯 唔係周末竟然都有8成滿座 我地預留左片皮鴨 $118可以任選三個餸👍🏻👍🏻 我地選左沙嗲牛肉煲 魚香茄子煲同西蘭花炒蝦球 佢好好人 片完之後問我地點煮d鴨 於是用苦瓜炒鴨 片皮鴨個皮又熱好脆加有少少肉痴住 我一個人食左5塊 包住片皮鴨d皮好薄同埋得半塊咁去包 唔錯👍🏻沙嗲牛肉煲冇沙嗲味 不過d牛肉似肥牛加埋芽菜 出奇地好味😋 魚香茄子都唔錯 可能順安順利村都係較多長者居住 所以d茄子較林 較易咬 西蘭花炒蝦球份量較少 味道比較普通😅喜出望外係苦瓜炒鴨 佢用豉椒炒 而苦瓜唔苦 係少少甘味☺️overall 屋村裹面有咁既水準算唔錯嫁 價錢又合理

試咗個肉絲雙面黃，肉絲太少，茨汁有啲似漿糊，因為仲見到一舊舊粉狀嘅物體。諗住賣相唔得，可能味道都OK。點知都係唔太得，完全唔覺得係雙面黃，啲麵有少少發脹，同埋無咩味。

因為今晚屋企無煮飯，所以去買外賣飯盒，第一次去呢間買外賣，估唔到差到咁，一盒油雞飯，得五小舊雞不特止，仲要無薑蓉，义燒飯份量雖然正常，但义燒好咸!唔會再幫襯!!

放假同媽咪飲茶，呢間媽咪話點心好味，去到好爆場，要搭枱先有位，茶客都係啲師奶伯伯為主！環境屋邨酒樓，裝修簡陋，尚算乾淨！坐低店員好快手攞茶，快快寫好早晨優惠點心，食物都要等一陣先到！咸水角：熱辣辣，外皮煙韌，炸得乾身，餡料多，肉碎咸香！好好味（因為我一向最鍾意食咸水角，所以真係做得好好味）蝦餃：外皮煙韌乾身，半誘明，餡料脹卜卜，蝦肉爽口，肥豬肉唔多！好清爽！潮洲粉果：半透明，睇到餡料脹卜卜，可惜粉果皮蒸得太淋，軟晒，承受唔住啲餡料破皮，不過餡料好味，花生脆，沙葛粒多又爽！孖寶：白灼唐生菜：生菜爽脆，湯汁微咸，份量大，可以化解點心嘅油膩！孖寶：鳳爪排骨飯：鳳爪入味，排骨好滑！白飯乾身煙韌！甜豉油濃黑好味！店員爽手，而且幾親切，對住啲比較有脾氣嘅伯伯都有笑容！食物真係幾好，點心應該係即叫即蒸，熱辣辣，雖然款式唔花巧但有誠意！而且價錢好抵，三個人五款點心，都唔使$80！好抵食！