智多星 (已結業)

今日行過深水埗搵下附近有無野食,點知搵到間傳統既快餐店,一於決定去試下拎下懷舊既味道,傳統既快餐裝飾已經算不錯,食左個鐵板餐,好有氣勢,煙都出晒味道真係唔錯,比起D大型連所快餐好好多價錢又合理,又有野飲又有甜品,下次一定會再番黎

一直對舊式快餐店特別有好感，尤其是在長沙灣的智多星。畢竟在長沙灣生活左廿幾年，讀書時幫襯到現今，唔多唔少都會有點親切感。又獨個兒來開餐，下午約兩點鐘到埗，仍要搭台，看來也有不少老街坊支持。今次食沙嗲牛肉炒河，凍檸茶，合共三十一個大洋，價錢比去年貴了一點。由於客人較多，也要等上近五分鐘才有得食。牛肉算不上是靚牛，好在仍有咬口，不會淋pat pat；最欣賞的反而是配角的青椒，爽口之餘還吃得出其鮮味，很不錯。至於靈魂的沙嗲，夠香口，又不會致太辣，用來撈河粉，好快食晒一碟。凍檸茶是一般港式快餐店的水準。講到凍檸茶呢家野，始終都係茶餐廳做得最好。再一次沒有令我失望，下次必會再光臨！

因為某 D 原因 我每個月都會落一次深水步因為都會平時收工先去既關係都會去番呢間學生時代既飯堂食以前每次都獨沽一味煎蛋免牛飯但因為又平又好食所以都唔會厭到今時今日煎蛋免牛飯依然有水準下次去食可能試下其他先

自從個仔出世請左個工人後好少出去食快餐咯 , 咁啱今日工人休息 , 叫個外賣星洲米啦 , 點知唔知係咪佢嫌一個星洲米都要人送外賣賺得少呢 , 盒野淡而無味 , 一定係冇落鹽啦 !杯涷奶茶送到上黎時 d 冰都溶晒咯 , 不過我都明外賣阿姐一次過要送好多間屋可能最後先送到我啦 !

每次來的原因,都只因為這裡的"煎蛋免治牛肉飯".一種兒時吃的味道,仍能保持至今相當難得.我不敢說這碟飯很好吃,要握介給天下人來吃一次.只想說是,我差不多每星期來一次.都只為這碟飯.但不妨推介是這裡的炸雞脾.炸法獨特.女友至愛^_^

上次去過石硤尾嘅水手，今次嚟嘅係智多星...同樣都係港式快餐店...邊食邊勾起以前中學時代嘅回憶...同樣係食炸肶飯。比起水手，呢隻炸肶就好得多--- 新鮮炸起，皮雖厚但頗脆口，大大隻，雪藏味不太濃，算係咁，但當然水準不及九龍灣嘅日月星la...今次捨洋葱汁而取黑椒。不太夠辣，但汁入面食到有煙肉粒，頗特別...不錯不錯...

早幾日睇見南瓜兄有關智多星既食評，感同身受，因自己從前也是長記仔，附近的機舖波樓當然也去勻。看完此食評後，放工專程一個人走去智多星食番餐，亦打尖把此食評登出。叫左個金牌什扒飯，飲可樂，盛惠$26，真係抵食到不得了。未夠一分鐘什扒飯就做好，有燒雞串、豬扒、腸仔同埋火腿，同埋一大"pat"既洋蔥汁。水準都係維持咁上下，腸仔同火腿無咩好講；雞串燒得有點焦，豬扒幾硬，不過肉都算可以。好在一大"pat"既洋蔥汁好送飯。唔知係咪感情分既關係，總是喜歡去呢類既快餐店，即使食物不甚特出，也一定會再去。有一點與南瓜兄不同，德貞妹曾一早遇上。

長沙灣仔成長三件事:一就走遍全區機舖球場,二就同個德貞女子做個朋友,三就去快餐店打躉.作為一個在明愛出世的小弟,兼在長沙灣渡過整個中學生涯.雖然人已不住在此區,在地域意識上,小弟仍覺得自己是"長記"人.至於長記仔三件事,第一個就做到,第二個就要長大成人,兜了個大圈才結識三數名德貞校友,第三嘛,除美居老麥之外,仍有一間在舊時戲院隔離的港式快餐店- 智多星.在成長期間,一次也未光顧過.同德貞妹一樣,要到近年才遇上,世事,就是那麼玄.早上來吃個早餐,ABCDE,就要個比全日英式早餐更複雜的早餐,餐肉火腿蛋,搭薯餅,兼拼一件幾九唔搭八的蘿蔔糕.老實講,整個早餐之中,最特別是個粟米薯餅.非老麥的Hash Brown之味,而是內裏的薯茸,混合著一點點雜菜.記得十多年前在foodcourt內的"紀文",也是這等味道.煎蛋煎到一劈野,餐肉火腿沒有談論價值,蘿蔔糕粉味多過蘿蔔味,火腿通粉,又是普通到極.或者是純屬巧合,店內正播著長記成長年代的其中一首外語流行曲- The Cramberries的Dreams.又好像一下子回到過去了.姑勿論好吃與否,算是還了個小小心願.

和一位面臨破產的中學同學食lunch，話請佢食佢又唔肯，於是就去了這間好耐冇去過的食店－智多星。以前在長沙灣區讀中學的時候，時不時都會來這裡或是食口福等的快餐店食晏，今日再來，重拾不少讀書時的回憶。叫一個肉醬意粉和一杯可樂，$21。好大份，味道也不比一些連鎖快餐店遜色，舊同學既什扒飯亦有佳評；顯示了這快餐店仍有一定的水準。老實講，這類快餐店隨著連鎖快餐店的増長和改革下，生存機會大減。現今還在掙扎中的就只有翏翏可數的幾間。論裝修，這類小型快餐店當然不可與大集團的相比，因這些快餐店的資金很有限，段段唔可以斥資幾十萬甚至過百萬去翻新店舖。不過，這代表著它就要被淘汰嗎?事實上，論食物質素、份量、以至價錢，這間快餐店均不會比大集團輸蝕，而且這店更是不少深水埗街坊的食堂。因此，我希望這類型的快餐店能繼續在社會上立足，不要被那些大集團壟斷。

以前中學年代經常去食, 到最近去d 水準仍然保持住, 什排飯一樣咁抵食, 其實味道都普通, 但係咁既價錢, 加上叫咩都有野飲送, 認真抵食

價錢勁平, 各式粉面飯都係＄２０－＄２５, 仲包凍飲一杯, 不過味道一般. 但係可以一試.