摩芽雞蛋仔 (已結業)

今日喺葵涌廣場掃街, 摩芽雞蛋仔由入面搬左出去出面鋪, 依舊非常之多人等候, 我order 左個夾餅要特成半個鐘...差D 餓死。綠茶紅豆夾餅, 餅底好厚身, 外脆內軟嘅, 紅豆係滿曬, 完全唔孤寒。

見呢間被吹捧得咁勁，就試下個雞蛋仔，有星星果個就吾多想試了，因為我成日食星星蜜糖。叫左個香蕉朱古力雞蛋仔，佢係即叫即做，所以都要等15分鐘，好彩收銀哥哥態度都好好仲可以行陣先番去拎個雞蛋仔，真係好食，朱古力有啲似心太軟咁中間融左，有淡淡既香蕉味，但一定要熱食，因為凍左就冇左香蕉味了雞蛋仔都好味，凍左仲脆脆的，但一定貴過普通雞蛋仔，值吾值就見仁見智了

今日掃街梗係唔少得呢間摩芽雞蛋仔，自從半年前新蒲崗食過之後都想食過返尋味！今日就食佢！星星朱古力雞蛋仔係我第一次試，上一次試原味，估唔到都有驚喜！雞蛋仔入面加上星星穀物早餐，絕對提升雞蛋仔本身口感，味道都互相配合到，好完美既配搭，熱朱古力味亦夠濃，岩哂鐘意朱古力嘅我！下次會再食！

本人最鍾意試新野! 見到紫菜粟米肉鬆格仔餅即時心心眼所以就諗都唔使諗就叫咗呢個! 都等左 10 分鐘左右！ 本身以為是一個鹹味的格仔餅！ 但一望就發現原來佢除咗紫菜粟米肉鬆外，最原始嘅格仔餅配料花生醬同煉奶都會照落呢個係意想不到嘅！咁究竟又咸又甜好唔好味呢？ 答案係出奇地好味肉鬆味同紫菜味加埋花生醬同煉奶都好夾！ 粟米就唔係太突出，但係都有少少味道出咗嚟! 仲有最緊要係熱辣辣相信係即叫即整！ 推介！我見佢雞蛋仔好似都有肉鬆味下次都可以試吓！

葵廣其中一個必食就係雞蛋仔!第一次係因為香芋味所以去買,今次再去,已經沒有香芋T.T 不過!咖啡味我自己都想試~由於佢即叫即製又多人買,所以order完之後我建議大家去附近小店買下野先,起碼要等10分鐘~~終於等到我,一黎就見到佢顏色好咖啡XDD 然後咖啡香氣好濃飄曬出來,佢都幾足料,所以雞蛋仔唔空心,好結實~~食落去一樣好濃咖啡味,我最like就係佢外層真係好脆好有分量.唯一一個問題就係油左少少,不過都依然係可以接受的程度!咖啡控一定要試!

Double Chocolate Egg Waffle!!! 🍫 雙重朱古力格仔餅！。暑假是長肉的好日子✨首先，昏訓到十一點，悠然起床，趁着人不多的時間，去買個早餐吃。。黃色的那一塊是牛油！是牛油！是牛油！格仔餅的致肥精粹和美味泉源✨ 尤其是剛出爐的格仔餅熱力會將牛油溶化，牛油混在口口的朱古力醬中，香氣四溢，而且格仔餅朱古力味濃厚，和厚厚的朱古力醬相得益彰！。除此之外，還有湧出來的朱古力醬！。其實，還能不美味嗎？🌝🌝🌝。

行完葵廣買衫就去掃下街醫下個肚，見到有熱熱辣辣雞蛋仔，覺得好吸引就揀左個紫菜肉鬆雞蛋仔。等左幾分鐘後，新鮮出爐雞蛋仔，熱就係好熱，但做唔到外脆內軟既感覺，因為一整完就入袋俾個客，唔會好似其他咁吹一吹得佢外皮變脆。肉鬆極少，可能肉鬆成本太高掛，基本上食唔到肉鬆味，只係得好少量係雞蛋仔與雞蛋仔中間，同原味雞蛋仔無乜大分別！估計其他味道都應該一般般，不試也罷咁既價錢唔太值得，回頭指數低！街邊十元八塊既雞蛋仔仲好味

今天特意帶朋友入來葵芳行街順便吃格餅因為真係好好味又多料，但係今天真係好失望因為個收銀姐姐換左人，變左個瘦的收銀，佢的服務態度實在太差了！我朋友第一次吃問佢有咩好介紹！佢好唔願意咁膚淺回答好像我們左住佢睇電話咁！毫無表情！黑口黑面！件衫已經係黑色了點知佢塊面還要黑個件衫！

葵涌廣場 - 可以說是一個萬能的全方位商場，起居飲食、各行各業，說得出的店鋪都可以在這歷史悠久的地區商場內找到。既沒有舒適寬敞的逛街環境，也沒有大型連鎖店的進駐，不過任何時間都總是人頭湧湧。除了受女生歡迎的平價服裝店外，小食店相信是另一大受歡迎的種類。中餐西餐、日式韓式、茶餐廳、快餐店，就連掃街小食也可以吃得到，價錢大多都是親民價，真的不得不佩服！又有冷氣歎，又可以吃到街頭小食，還可以邊吃邊逛街，相信全香港應該沒有哪幾個商場可以媲美得到。二樓一角由服裝店、美甲店改裝成小小美食區後，多了很多掃街小食檔的開設，將同層及樓上樓下的食客吸引到這裡來。擁有不少分店，開設於美食街外圍的摩芽雞蛋仔，也來到這個殺戮戰場分一杯羹，也許是名聲關係同樣受到注目。 主打的雞蛋仔口味有16款之多，大路的如原味、芝麻、咖啡等，較特別的新口味就有鳳梨酥、紫菜肉鬆、咖哩肉鬆等，價錢由$16-$26，未算很便宜。除了傳統的球型外，外型上更花巧地印有星星圖案，不過口味只局限於朱古力和橙味朱古力才有提供。亦有加入雪糕的雞蛋仔，不過站於掃街立場來說，還是普通雞蛋仔進食比較方便。 除了雞蛋仔，也有格仔餅的供應，款式也有11款

Order 咗個抺茶紅豆夾心餅，收銀姐姐問原有嘅沙糖、煉奶、花生醬都有，有提及其實都幾貼心。我就走咗沙糖+花生醬，等咗一陣，姐姐話唔小心落咗花生醬所以重整，唔會夾硬你要，我覺得好好，因為有啲你唔要佢會黑面... 好大件好飽肚，但因為紅豆甜，個蛋漿又甜，夾心又有煉奶，整體嫌偏甜... 食完要揾嘢飲，整體有待改進。

老公很喜歡食格仔餅係中意到要買部格仔餅機回家整個種呢間小食店在雞蛋仔和格仔餅上發揮了很多創意門面:格仔餅配抹茶紅豆，第一次見，試下新野先拎上手熱呼呼的，很期待邪惡的軸心:Wowwww除了紅豆，重有格仔餅的靈魂花生醬和糖份量很足，格仔餅很厚身，女仔食要張大個口來食紅豆煮得很軟，和花生醬很融合，格仔餅外脆內軟，熱呼呼的特別一讚是花生醬，不知道是花生醬特別調味過，還是抹茶降低油脂的感覺，食落咸度剛剛好，食完一個很滿足，又不會很肥很流

之前見fb有page介紹過呢間嘅雞蛋仔同格仔餅，之後一直都想試下，今次終於試到了，但比想像中差好多……我買左一個咖啡味格仔餅，諗住應該會有好香濃嘅咖啡味啦～但點知一食落…… 零咖啡味 仲要冇乜蛋味…… 口感仲要勁脆，脆到離譜 好似食梗厚餅乾咁，一啲都唔好食而且入面嘅牛油全部都係一大舊一大舊咁，好似完全冇打算搽勻啲牛油咁，入面夾住起碼5、6片以上嘅牛油，舊舊都大過1蚊銀另外，正常嘅格仔餅應該係軟綿綿帶有少許脆口，但呢間整到脆過米餅，仲要乾爭爭又硬崛崛咁，饞到口腔都損咁滯～真係街邊檔嘅格仔餅都好食過佢呢檔多多聲…… 唔會再幫襯佢嘅格仔餅，不過未食過佢嘅雞蛋仔，唔知會唔會都係咁差呢？

作為一個雞蛋仔控, 務求試盡全港唔同口味既雞蛋仔, 見到摩芽愈開愈多, 有雞蛋仔, 格仔餅, 野飲都有, 假日11點幾去到葵廣, 附近無咩小食開門, 就試下佢!初初以為等2-3個號碼好快就有得食, 見到店員唔知做乜咁, 整完又掉, 等左成20分鐘先有得食, 一拎上手已經無左當初既期望, 睇唔到有幾芝士, 聞落都無咩芝士味咁...食過第2間既芝士雞蛋仔, 期望好大, 反而呢個真係幾失望, 當原味雞蛋仔黎食既話都唔錯既, 口感唔錯, 夠脆, 夠蛋香, 但芝士就真係唔講都食唔出啦, 以呢個價錢($23), 唔會ENCORE LU ...

同區附近其實有數間售雞蛋仔的店選擇喱間係因為朋友推介今次試左香蕉巧克力雞蛋仔 $26 評分：7/10因為即叫即做既關係，上到手還是熱哄哄的，想佢更脆建意先把紙袋拉開一點，讓佢吹吹風。最令我驚喜既，係濃烈既香蕉味。開頭以為係香蕉油，但食落發現每一粒入面香蕉糕粒喱一點加左好多分！

葵廣出左名係多野食既，小食飲料都應有盡有，而且款式仲好多添！摩芽雞蛋仔其實都唔止葵廣呢一度有，但係今次黎到，個朋友話想食下，睇下同一般既雞蛋仔有幾唔同咁話。呢一度既雞蛋仔既款式都有好多，而且有一種仲要係以雞蛋仔作為筒型去裝雪糕。但果一種我就冇去試啦，反倒係揀左呢個紫菜肉鬆雞蛋仔黎食。本來以為啲紫菜同肉鬆會飛哂出黎，好難整架嘛。但見到佢啲紫菜肉鬆又整整齊齊佈滿喺雞蛋仔上面，其實都幾驚訝。呢一款既雞蛋仔我就覺得幾好食，有多左一種口味但係依然能夠保持到雞蛋仔果種脆脆地同軟軟熟熟既感覺，而且味道亦都唔撞，所以呢一款雞蛋仔都算唔錯架啦！