摩芽雞蛋仔 (已結業)

呢排摩芽雞蛋仔登陸葵涌廣場，各大媒體都爭相介紹講到幾咁好食啲雞蛋仔，但一食之下我會講"no" more eggettes。本身屋企樓下已經有間好好食既雞蛋仔，摩芽同我樓下果間絕對冇得比。香芋星星冇媒體所講咁值得食，味道零特別，同原味無異兼冇芋頭味，仲有雞蛋仔唔香脆，啲蛋漿落得唔均勻，我見好多底倒到唔平滑不特只，好似啲豆皮窿咁，所以雞蛋仔邊完全爆開哂好核突，又冇蛋香，可以話失敗之作。正常慢工出細貨，摩芽違反呢個定律，基本每個人都要等超過30分鐘，最後買到只有劣質雞蛋仔。

今日閒逛葵涌廣場時發現新開咗呢間雞蛋仔店見到咁靚當然要買返個嚟呃下like先啦揀咗呢個香芋星星雞蛋仔製作嘅時候勁香香芋味不過食落又唔係好覺香芋味咁勁有少少失望啦不過朋友仔揀嘅朱古力味就ok下次都可以再試下其他味道嘅

我很喜歡食雞蛋仔，亦都好踴躍嘗試不同店舖的雞蛋仔新口味來滿足為食的自己。這間雞蛋仔店一直都想試，得悉在葵涌廣場開了分店，今天終於有機會與朋友嘗試。有多款口味的雞蛋仔、格仔餅及飲品供應，不過我與朋友一早已鎖定食香芋蜜糖星星雞蛋仔！我是明白人流太多會令到出食物效率會較慢，不過可否令我覺得我等待的30分鐘是值得？？？？？？蛋漿份量落得不平均！食落口零香芋味，完全與食原味是無分別。等待30分鐘的雞蛋仔原來出品是這樣～

叫左底雙重朱古力雞蛋仔,朱古力漿配朱古力粒,好濃的朱古力味,同之前食過的北角雞蛋仔同紅磡雞蛋仔比,我中意摩芽多D,但係佢重朱古力味,蛋味就無咁香,中意多D蛋味的人可能會中意紅磡雞蛋仔多D見佢整先知朱古力星星果個都係朱古力漿加朱古力粒再加星星! 本身以為有星星會無朱古力粒,下次要試下!

見到新開張 好多人排隊，滿懷奇望就買左個雞蛋仔試下🤔個樣係好得意 每棵雞蛋仔都有粒蜜糖星星⭐️可惜雞蛋仔唔夠脆身🙈而且紫芋味略嫌太淡，食落口味道同原味差吾多🌚

經過依間舖頭，就比佢既香芋星星雞蛋仔吸引住目光，滿心歡喜去買既時候先知冇香芋味賣，有d失望，唯有買左另一款雞蛋仔試下~ 等左10幾分鐘，土鳳梨雞蛋仔終於到手啦~ 其實我唔明點解依款雞蛋仔既價錢係最貴，可能係佢每粒雞蛋仔入面都有類似鳳梨酥既鳳梨係入面有關~ 食入口覺得好普通，雞蛋仔唔算脆身，蛋香味唔夠，鳳梨味都ok，帶有少少酸味，覺得內裏可以落多d蛋醬，令口味更豐富~ 不過要等10幾分鐘先試到這種質素，應該唔會有下次~

作為本土香港人，實在無理由唔認識雞蛋仔呢款平民美食，而且可謂由細食到大，充滿那些年既回憶，仲係香港十大街頭美食之一。可惜，現在已經愈來愈難搵到好食既雞蛋仔，就連北角雞蛋仔都每況愈下，真可惜。 但，今日見到呢間摩芽雞蛋仔，確實很開心，因為雞蛋仔款式實非常多，咸甜都有，心思思所以立即試試。購買時已經晚上9點幾，不過可能新開張好多人排隊，買一底竟然要等30分鐘最後買左朱古力星星，23蚊，雞蛋仔蛋味確實需唔突出，而星星形狀只有部分成形，但朱古力味香濃，外脆內軟，雞蛋仔內仲有好多朱古力粒，very good，希望下次可維持水準~

近排特色雞蛋仔愈來愈多，見呢間係新蒲崗嘅評價唔錯，所以試下原本想order 星星香芋但店員話賣曬 所以只好買星星朱古力（ 店鋪仲提供其他口味雞蛋仔 如抹茶紅豆 香芋 雙重朱古力etc. 及格仔餅 和飲品）落單後店員提醒需要等15至20分鐘味道唔會太甜 食到有朱古力嘅地方 就幾好味整個雞蛋仔不夠蛋香 小小脆 不至太焾但以$23 一底這個價錢來說 性價比低若然價錢為20以下 可能會較常幫襯 🤔

好多人排隊等既雞蛋仔，我地又貪得意買左個黎試。本來就想食double chocolate，但見佢d推介都係紫芋星星雞蛋仔所以就簡左佢喇！等左大約20分鐘，我地去左周圍行，番到黎都未有。一拎上手熱辣辣，可能因為未吹涼，拎第一粒係淋既，痴既，一d都唔脆，不過食落好有紫芋味。星星係好令，但可惜佢都係淋既，有d失望得個樣。食到一半都有番少少脆口，不過都仲係唔夠脆，仲係好痴口。但基於佢好重紫芋味，所以係不過不失啦！

最近，雞蛋仔好像也出現熱潮，呢間摩芽的分店特別吸引到我既目光! 除左雞蛋仔既味道特別，樣子亦都有新鮮感，所以今日終於一試。老實說，我是原味雞蛋仔既死忠，但今日朋友話要食呢間野梗係食特別d既口味，所以佢揀左紫菜肉鬆味，一聽落去就會諗起紫菜肉鬆鳳凰卷呢味野，應該Ok既...終於整好有得食喇! 紫菜肉鬆夾到雞蛋仔，雞蛋仔外面還是脆的，裡面肉鬆同蛋漿加起黎又幾好食，反而紫菜既味道就唔算太突出。

背景: 選了流心蜂蜜+雪糕雞蛋仔。食物: 所謂流心意思喺放了蜂蜜爆珠。本人就覺得幾有趣。之前試過原味雞蛋仔，覺得一般，蛋味唔夠香，蛋漿亦太甜 (基本上淨喺食到甜味)。如果淨喺講雞蛋仔本身，我就比較喜歡媽咪雞蛋仔。雪糕就喺一般雪糕。價錢: 原味雞蛋仔$15，流心蜂蜜雞蛋仔$24，雪糕雞蛋仔$40。現在d有質素雞蛋仔都喺這個價格，要食好嘢都喺要付出gala，不過雪糕雞蛋仔多兩球雪糕就貴$15-20，唔太抵。總結: 會再幫襯，但要有多d錢先… 

葵涌廣場2樓新開左好多小食店，人頭湧湧，以後唔一定要幫襯3樓既小食店但都幾貴，本身想食雞蛋仔+雪糕，但要40蚊（同行話3樓5球雪糕都係12蚊，超唔抵），所以叫左雙重朱古力雞蛋仔，都要21蚊。落完order係附近行下買下衫，等左15分鐘終於有得拎唔算好脆，但好有朱古力味，唔錯唔錯！下次有機會可試下星星雞蛋仔

因為新開張 所以野飲都做緊半價優惠中杯 正常要18蚊一杯而家就9蚊佢既selling point係夢幻花茶但我覺得有點中伏 因為個味道好甜明明叫左小甜少冰🙄個野飲顏色好特別 同埋講到對人體有益 純天然野飲 仲有好多吾同選擇一飲落去覺得幾冰爽 但愈飲糖味愈重會愈黎愈口渴我覺得半價可以一試 全價就米搞了

一向鐘意食雞蛋仔,好味又飽肚,今日去完葵涌運動埸跑步後來到葵涌廣場醫肚,馬馬虎虎食完碗車仔麵,大少有D吾滿意,甘一於去掃街,本來目標是葵涌廣場頂樓,經過2樓時,見到人頭湧湧好熱鬧,有一位少女拿着雞蛋仔經過,wa見到已經想食,原來葵涌廣場2樓有個Corner 位集中的各式各樣的食店。太久沒有來了,又有意外驚喜。摩芽雞蛋仔的口味幾創新,星星雞蛋仔也得到不少人歡心,本來想要紫竽味但考膚到大少的口味,最後要了芝麻味,雖然大少口話食少少試下,所以要甚麼味也沒有關係,但結果當然不是這様~由於不少客人,我的雞蛋仔也要等上幾分鐘,但是値得的,收錢後單上有編號,雞蛋仔做好就叫單上編號。 我叫大少去拿雞蛋仔,還襯我不為意偷步咬了一大口,可想而知雞蛋仔有幾香幾吸引。雞蛋仔上有炒香的黑白芝麻,食落好香芝麻味,雞蛋仔的口感微脆帯煙韌,而且不會太乾太甜,大少食個不停笑笑口話有意encore,我當然也不客氣~食完雞蛋仔也不覺好口渇,下次一定要試其它味!!