小泰閣 (已結業)

係九龍灣覓食其間發現依間小泰閣，店舖係專做外賣生意，拿拿臨拎張外賣紙返office同d同事研究。同事們均好泰式食品，於是決定試下依間lunch whatsapp外賣自取。11：15落單11：30覆實12點準時攞得，員工態度非常好。我地叫左白咖哩豬扒飯，香茅豬扒湯河，泰式肉碎飯，每個餐仲有杯綠茶送，45蚊內都算幾抵食。原本對白咖哩豬充滿期待，最後都係失望而回，白咖哩汁太稀，開飯盒蓋時仲彈到周圍都係……豬扒份量足料，質地較淋冇牙都咬到，但我最鐘意係有舊白蘿蔔，吸晒d汁好入味，如果汁可以傑身d會好d。同事話湯河好味，成碗食晒，泰式肉碎飯就麻麻地。白咖哩始終都係沙x王既最好味，暫時未搵到第二間可以超越到佢。

九龍灣真係有好多隱世美食架就好似呢間小泰閣 舖面細細 但一到Lunch就超多人幫襯 唔一早電話落定單 隨時無咗我最鍾意食既冬蔭功湯河 所以我通常都一早電話落單 去到就岩岩好有得拎 佢個冬蔭功真係不得不讚一下酸辣程度剛剛好 又係令我忍唔住要飲晒成碗湯 河粉係金邊粉 用來搭配冬蔭功係perfect match今日我仲試埋佢新出既小食 沙嗲雞球與求話係雞球 不如話係炸雞 因為佢D雞球全部係無骨既 配埋佢個沙嗲 又出奇地好味喎 個沙嗲汁非常濃郁 沾上每件炸雞面 都食到啖啖沙嗲汁 岩晒我呢個「汁怪」

小泰閣， 一睇名就知係食泰國嘢，佢話自己係雞飯外賣專門店， 咁就梗係要試吓佢招牌嘅牛腩湯河加配白切雞肉一份牛腩入味軟嫩，完全唔會覺得柴，有少少筋位連住，好好食， 應該係畀咗牛筋腩我呢。白切雞肉應該係雞扒位， 小店處理得好好， 軟滑之餘仲有少少肉汁， 雞皮下無脂肪嘅， 食埋都唔會覺得邪惡。雖然叫咗清湯湯底，但比我想像中好過唔少泰式湯河店， 相信係自家製嘅牛骨湯底嚟， 由於預設係放咗幾粒指天椒入去， 如果唔食嘅就預先講聲啦。 跟餐仲有一杯無糖綠茶， 可以選凍或熱可惜無得堂食， 想食嘅朋友就要搵定地方開餐啦

小泰閣地址: 九龍灣宏照道6號鴻力工業中心地下B1A號舖今日Lunch揾嘢食😆，估唔到俾我發掘到一間CP值高嘅泰國餐廳🥰～招牌雞飯🐔$42海南雞份量好足，海南雞外皮金黃，雞肉一早就去咗骨吃起來好方便🤪。雞皮下只有薄薄脂肪，啖啖肉質感，雞肉好滑身嫩白😌，而且雞味好濃郁，就連雞胸位置都唔會太鞋口，再配上濃郁甜豉油同薑蓉一齊咁食，真係好足料，正😛。白咖喱豬頸肉🐷$44由細到大都好鐘意食豬頸肉😍，所以幾開心呢間野啲豬頸肉唔會燒到乾之餘仲保留肉汁，而且大大塊無咩肥膏，爽口彈牙，完全唔會覺得會好肥膩😋，而且連埋啲白咖喱醬汁一齊食，配搭起來效果唔錯，值得一試，正🥰！酸辣豬扒撈🐷$44同樣大大份豬扒撈，豬扒爽口又Juice😏，加上酸辣汁，清新而不油膩，大滿足🥰，正~

覺得小泰閣最好食嘅係芝麻醬雞絲撈金邊粉，自己口味中意order少豉油。雞絲相信係採用左雞髀部位，食落無骨，啖啖肉，非常之彈牙爽滑。仲有脆脆嘅香蒜碎點綴，加埋葱、莞茜提鮮，配合埋秘制蒜蓉醬溝芝麻醬可以話係無械可擊，永遠係我心中嘅the one and the only one。大大份，作為午餐好夠飽，如果係細食嘅女仔，可能要嗌少粉先得。跟餐嘅無糖綠茶清香解膩，同撈粉嘅口味取得平衡。呢個餐點我喺第度嘅餐廳未食過相同味道，相信係店主獨門配方。菜式唯一嘅缺點係食完會口臭，好臭果隻，因為蒜蓉太多加上重口味，會口臭足成日㗎，所以約左人千祈唔好食，食完亦要同人保持1.5米距離，臭親人就唔好啦。 第二個VIP就係霸王雞飯，同樣採用左去骨雞脾部位，有4至5件砍件雞肉，上面舖滿咗莞茜、葱絲、辣椒，簡直係莞茜愛好者嘅恩物！雞肉同樣係爽滑彈牙，秘制醬汁(甜豉油加海南雞醬)，令雞肉嘅美味提升到另一個層次。雞肉下方仲有一舊炆得淋軟嘅蘿白，清香撲鼻，食落清甜無渣，係成個飯之中嘅vip。個黃色香料飯又係一絶，食得出應該係有黃薑粉，飯的色澤誘人，食落粒粒分明、乾爽有彈性，好似食緊炒飯咁。份量又係大件夾抵

平時食泰國菜 飯後甜品都一定會食佢哋嘅糕點🇹🇭呢度真係超正！！可以一次過試齊晒四款唔同嘅口味😌有斑蘭糕、西米糕、椰菜大菜糕同南瓜糕✨最鍾意️係椰青大菜糕❤喺出面都比較少見 食落好清甜 好香椰子味🥥

放lunch經過一間外賣泰菜鋪頭，鑑於附近食過都有唔錯同價格相宜既，今次見到一間差唔多價位既決定都試下質素如何。落單果陣職員態度唔係咁好，最後買左盒招牌雞飯$40配無糖凍綠茶，見佢係招牌心諗實無死，點知打開個盒第一次見到有人可以將啲雞肉整到死屍肉咁款，啲肉醃到死曬，仲有陣難以形容既味，後尾諗返係似放左好耐先會發出既垃圾臭味。試驗性咬左兩小口雞同食左幾啖飯，當晚痾嘔同發燒，第二日搞到請病假，真係多得呢間嘢唔少。盒飯連配菜都落左好重香料，懷疑係為左掩蓋本身食材唔新鮮，所以我估我唔係第一個食到腸胃炎。

事隔一段時間，再次幫襯小泰閣，無獨有偶，今次買嘅食物，竟然同上次一模一樣。同另一半一齊分享，大家都覺得，味道依然無變，都係咁好味，而佢亦問返我相同嘅問題，喺邊度買㗎？我同佢講返，大家都忍唔住相視而笑！呢間小店，各樣嘢都令我好滿意，以外賣店嚟計，佢只係做一個中午，但係價錢、質素、份量、味道，都甚合我心。其實由佢哋嘅位置，行到返我屋企，都要三、四個字左右，不過，我一定會多多幫襯，希望唔同嘅小店，都能夠繼續努力生存啦！😋👍🏻😍💪🏻😋👍🏻😍💪🏻

✨白咖喱豬頸肉飯（$42）好耐冇食啦，買返黎食先～佢白咖喱真係整得好香，用黎返工醫肚係一流豬頸肉整得都ok，另外個餐會送熱或凍綠茶，如果份量再多少少就好啦🤣🤣

今日想食香辣肉碎飯， 去小泰閣點餐， 個cashier 呀姐好細聲話無， 我聽唔到， 繼續想點野飲， 點知呀姐就勁惡咁話「都話無香辣肉碎飯！！！！！」其實如果做得辛苦唔想做， 可以辭職， 或者自己開鋪可以執左佢， 冇需要拎啲客來發脾氣！！人地點知你幾時心情唔好！！

Lunch聞到同事外賣好香咖喱味經推介原來係小泰閣外賣 $42 跟指定飲品 （凍/熱無糖綠茶）或+8可換樽仔奶茶有6個類別可供選擇主要都係食白/青咖喱可跟配 雞/牛腩/豬頸肉/香茅豬扒份量都唔算細絕對飽肚值得推介午市較繁忙 唔想等咁耐 可以11點半前WhatsApp 落單夠鐘先去拎

係呢個疲情之下相信好多人都養成左一個食外賣既習慣，係一個咁多人食飯既工業區，買外賣返公司食亦都係好合理，咁我呢，就發現到呢間泰國野，價錢夠晒平民，個味道又唔差，而且個份量又夠晒，個2重點就係佢有送埋凍飲。呢間小泰閣既招牌係海南雞飯，但係佢真正好既唔係海南雞飯。佢好食既野包括但不限於以下。1) 白咖哩，佢既白咖哩係做得好出色，個咖哩味好重，同時有又有香茅香味，配埋個白飯一流，就好似呢個飯配合埋個豬頸肉，完全係100分。2) 撈粉，佢既撈粉係好好食，香辣就不在話下，個泰式香味出晒黎，係呢個炎炎夏日，食一啖就所以食慾出返晒黎。

同事話朋友極力推介小泰閣 所以好想試下 點知去咗好多次都因為太遲去到而賣晒冇得食 好失望於是今次我哋就醒咗啦 一早WhatsApp落咗單再去自取 終於食到啦！Menu好多嘢食都係辣 唔食得辣嘅我就叫咗芝麻醬雞絲撈金邊粉 點知幾有驚喜！唔辣嘅人會鍾意食 芝麻醬好香 原本以為係冷麵 點知係熱嘅 幾有趣 我又唔好凍嘢所以覺得幾好 不過個麵算多 食落會有啲膩 好快飽同事就叫咗佢朋友推介嘅冬蔭公雞湯河 覺得香味好足但辣咗啲 雞都算滑 大碗 性價比高另一位同事就食咗香茅雞頸肉湯河 因為menu冇寫係辣嘅 但食落原來超辣！令佢有少少中咗伏嘅感覺 結果要加水先食到 所以就話畀唔到食後感啦 淨係話杯餐飲——預設咗係無糖茶——好健康 另一位同事就食咗泰閣招牌雞飯 不過佢話唔算好滿意 話呢個唔係佢杯茶 佢都係鍾意食海南雞飯多啲 啲雞望落冇咁有食慾 冇咁水潤 乾咗少少而 雞配豉油亦冇咁豐富 但啲菜有調味幾好 

平時喺九龍灣食到厭🙈諗唔到食咩好，見到我同事成日叫呢間食，佢可以每一日都叫，我簡直就覺得佢好似中咗毒！我講笑咁講話可能落咗罌粟啊！今日我就踏出一步去試吓，可能我比較晏先至去到啦，好多嘢都冇晒，個職員就溫馨提示我話下次可以提前WhatsApp留咗嘢食先，好方便👍🏻我今日叫咗個泰式酸辣豬頸肉撈金邊粉，打開食物兜，好大浸酸味飄出嚟，聞到都流口水🤤個樣都好靚仔仲送一杯無糖綠茶食落的確好好味😋越食越想食！而且份量都唔少，我覺得係呢個價錢入面，買到呢個份量幾抵買等我下次再試吓其他野先👍🏻👍🏻

外賣飯盒有昆蟲（見圖）某天中午時間到此店買外賣青咖哩飯，這店是有賣白咖哩和青咖哩雞和豬。本人有與店光顧多次，招牌雞飯的油飯味道唔差，但雞的味道與其他平時食的唔入味（較似蒸雞）。另外青咖哩雞有衛生問題，本人買是外賣飯盒，當買後返回公司進食了一半發現有昆蟲物附送。青咖哩雞飯的汁較好像使用了生粉水混上青咖哩汁。味道辣味足夠但完全不好吃。由於本人發現外賣飯盒有昆蟲，因此本人覺得衛生較差，所以本人決定不會再光顧這店。