寶城美食店 (裝修中)

好平嘅食店.$22一個一餸下午茶有雙蛋,牛油方包,連熱飲.可以食得飽,重要味道都唔差,算係噉啦!叫左一個沙嗲牛肉米粉,另外一個雪菜肉絲米粉.沙嗲牛肉米粉:沙嗲味好嘢味,幾濃!令到米粉好夠味.牛肉肉質都唔錯,可以的話,加多小小餸可以更好!雪菜肉絲米粉:雪菜味可以,但對比沙嗲來講,個湯就淡左D,味道唔夠.雙蛋都可以嘅,不過有小小鑊鐒.牛油方包:有咩特別,可以啦!熱奶茶:水準時好時差.整體可以,好底食!

早前易手後，其炸鷄脾即刻失色不少，令人失望得很。最近得知老闆娘正式回歸，即刻落去一試，味覺即刻返哂來，炸鷄脾皮脆肉嫩，仲好juicy，又大隻，好味道，實在令人食上癮。但提提大家，盡量避免午飯高峰期去食炸鷄脾，因為太忙時水準難免差d 了。

唔知點解，每次如果啲餐廳名叫做美食、美味、知味、極品、頂級，類似既名，啲出品都出奇地恐怖架 ﹗同事大讚依度啲炸髀好食，咁我依個髀痴梗係要試一試啦 ~ 見到牆上菜單有辣魚麵食，張相真係影得好正，我又鐘意食辣，就比佢吸引到我試一試。炸雞髀，好 dry，炸得太耐，肉汁已流失，肉質稍為鞋左啲。雖知雞要煮到全熟才最安全，但以美食角度而言，好唔掂。外皮都炸得夠香口，但過左火，有啲燶燶地。個人而言，依間既雞髀只得 4 分。到底邊度先搵得返以前皮脆肉滑、醃得入味又超巨形既炸雞髀呀？白汁粟米飯，快餐店口味，一般無特別。啲飯太濕，一舊舊，完全唔乾爽，腍劈劈，差。麻辣牛肉魚麵，根本個湯底就唔係麻辣湯底，係啲淡到無味既魚湯再倒少少辣椒油就當係 ﹗有無咁拿西呀 ﹗辣椒油有花椒成份就當係麻呀，中左招添。魚麵？未食過硬到胃痛既魚麵，莫講話要滑、要彈牙喇。口感似未煮透既烏冬，或以未炒熟既上海麵。味道只有麵粉，豪無魚味。辣味牛丸，都可以啦，小販檔即食牛丸，唉。一路食一路掛住沙嗲牛肉麵，心諗早知食即食麵好過啦，頂 ﹗