喜喜中國廚房 (已結業)

母親節飯局, 諗住去間有些新意的酒家,所以揀左呢間,食些圍村菜,兼豪少少的感覺, 點知去到,菜牌的套餐都係普通酒樓見到的菜式,好彩仲有約十款可以散叫, 好食係好食,亦幾惹味, 但唔知係咪惹味得制,成4-5隻鳥英係咁撲埋黎我地d野食,,我地起勢咁趕都沒用(因為我地比較早到,鄰桌都未開飯), 要左手拍鳥英右手夾食物,卒知隻糯米蟹成功俾兩隻鳥英著陸,唉!激到我呀,搞到出晒汗!好喇,唯有迫自己快快脆食晒d野,偈都唔駛傾呀,終於食完,一群鳥英又向著鄰桌進化,一幕幕拍烏英場面又繼續公映.....我屋企人講笑謂都唔知係咪特登放鳥英趕我地走,做多幾場!俾咁貴價錢(屯門區來說),$750蚊5位食5個菜,咁豪裝的環境做草根的行為,我上左大陸還是去左印度?我地研究後,最大嫌疑係,佢d垃圾放的位置同出面大廳只有一道門及走廊之隔,可能當日唔夠人手處理垃圾(母親節前一日).彈完,都要讚一讚,佢地方算幾寬落,雖然係母親節,並沒有為左開多些位而減少空間,好多一家大細又bb車, 老人家坐輪椅都入到,算唔錯.

我去這間喜喜都是看雜誌的. 好老實,平時坐巴士都唔知佢有個大招牌.佢地d服務都唔錯, 可能當日唔係太多客. 我點了炒蟹(嫌淡,但份量十足)四吋骨(好味)葡汁四蔬(一般)煎釀鯪魚(好味, 陳皮味重, 唔腥)甜品是free. 有楊枝甘露(okay), 同紅豆沙(好沙, 好味).

裝飾得幾靚, 服務一流, 係一間我會諗下比貼士既餐廳. 價錢我諗同流金歲月, 金滬庭差唔多掛, 但係呢度靜好多, d位又闊d, 坐得舒服好多喎, 我地兩個人total食左二百幾蚊, 都有碗冰糖燉雪耳食添...

入開屯門, 順便黎試下呢間新野, 老實講, 呢間酒樓地點都算比較僻, 中午飲茶大把位, 兩個人一點鐘去到都唔駛等位, 裝修比前身果間好好多!侍應招呼都不錯, 叫左3 碟點心, 一碟炒野, 共150 大圓, 價錢真係略貴, 但食物尚算ok, 另外d 茶葉飲得出同平價d 荼樓有少少分別! 中午飲茶都有泊車優惠, (雖然5 蚊一個鐘), 總括黎講, 如果有車同平時中午時分想飲茶, 又唔想係市中心個邊慢慢等位, 可以証下!

昨天同皇后去試一間新開食店,由於地段關係位處屯門邊皮.如果無介紹一定唔會去,一入到去第一個感覺(豪)裝一定唔平.結果一看餐牌果然走中高價路向.至於侍應態度超快(由於小客)我兩人共食四個,食物味道同質素好好,其中家鄉煎鯪魚魚肉彈牙口感極好.雖然所有好.唯獨侍應換碟次數太多了.不過下次我會再試其他食物再下評語.

環境清雅, 裝煌華麗, 招呼殷勤, 可能地點唔就腳, 比較客少清靜, 有多個廳房, 三兩圍聚會都唔錯.我和皇上兩人, 試菜:1) 煎釀鯪魚(特別推介懷舊菜系列): 魚肉彈牙, 陳皮味濃, 略煎再煮, 如有蝦米更佳. 略嫌汁多.2) 砵酒焗牛仔柳: 牛仔柳質佳, 肉嫩味香, (另有香草煮法)3) 沙巴雞件: 香口味濃, 雞先醃了特別醬料再炸, 雞肉鮮, 炸完都唔會鞋.4) 怪味什菜煲: 沙爹加少辣, 唔似一般什菜煲水汪汪淡茂茂, 有創意.5) 飯後有生果盆送. 見菜牌有多款煲仔飯, 下次再試.食品質料有水準, 煮法有待改進, 價錢略高, 勝在環境清靜, 招呼殷勤. 送泊車. 可惜屯門中央廣場十室九空, 唔似屯門市廣場無街行, 人流唔夠, 做酒樓都幾難生存. 祝佢好運.