冬蔭公公 (已結業)

餐廳位置在商場門口附近，只是用一米左右的屏風包圍住，比較嘈雜。我地叫左一個招牌海南雞飯同冬陰公海鮮拉麵。每個大約50至60元。首先，我是吃少辣的冬陰公，海鮮都有兩隻青口和蝦「撐著」，都有真材實料。至於辣方面，始終都是冬陰公，對我來說都有少許刺激，但又好刺激到味蕾！不過d花生就林哂☹️。另外，海南雞飯的三碟醬油跟一般餐廳的差不多，雞的份量則不是太足夠，油飯也不夠香。值得一提，當晚有一張椅子的一隻「腳」斷了，職員立即處理，也不讓客人坐。整體而言，只屬一般。

下午茶在此食，＄40有碗自選湯底嘅粉麵，點了冬蔭公湯底，BB辣度，啖湯味香濃偏酸，夠醒胃，點了手撕雞及魚片頭，唯魚片頭唔彈牙偏腍，喜愛佢嘅米粉夠幼身，仲包埋飲品，凍飲唔加錢免九加一！

放假怕人多，呢间唔使等，試！Set lunch, $62，有幾个 大路選擇，冬蔭公公，梗係食冬䕃同海南雞歺啦！湯底ok, 唔太spicy, 有香味，小小油可以接受，海南雞都唔錯，皮比较黄油小小，不过湯河入面淨得花生芽菜，乜都冇，如果加小小豆腐卜咁会冇咁dry, 重有，河粉轉米線点解要加$2，轉木粉要加$4，呢个有小小唔扺…Service 就一般啦！仲有，地点係大堂 出入口，冷气冇乜，D人出出入入果時，陣陣热气，呢个真係有D熱

一行3人食午餐，叫了3碗麵3碗都有特別，一碗麵內生雞肉，仲要係遲遲沒有及另上，一碗四面超大魚蛋但內面凍，最後一碗有咬不開的牛橡筋，仲要超耐先上！服務員真係好奇怪！以後不敢再去！

今日好少有咁去咗荃灣，荃灣都出名多野食，所以行完街都決定係度食埋先走，係荃灣廣場行過聞到好香就俾佢吸引咗入去，但睇咗陣餐牌，已經劃底咗想食嘅野，到想叫野食轉身叫人嘅時候，有一位已經收工換好衫嘅男員工，見到我揮手叫野食，你完全望到我，但佢完全無反應，我明白你收工，唔理我無問題，但佢完全可以同佢身邊兩位未收工嘅員工講有客人想落單，但佢連呢樣嘢都無做，我真係已經對呢間餐廳打咗嗰五折，終於等多兩分鐘都無人理我，唯有自己大聲少少嗌唔該啦(真係俾正常聲線高少少姐，雖然真嬲嬲地)好，叫咗個(青咖哩雞扒飯，泰皇燒春雞，同應該係招牌嘅秘制豬軟骨米線)先嚟(豬軟骨米線)，好失望，湯無味，米線overcook好淋，我諗有少少煮食常識嘅人，望到圖都知個米線有幾淋，係豬軟骨好食，但出得上面海報，呢個好似打自己招牌喎（青咖哩雞扒飯）咖哩幾香口，雞扒份量夠，咖哩配菜都夠，整體係好食嘅，但個炸蝦凍嘅？好明顯炸定，但其實可唔可以返熱咗先俾我食呢？？？😓，嘅然呢個好食，我決定換咗女朋友個米線自己食晒去，俾呢個青咖哩我女朋友食，我真係唔願意我女朋友食個唔好食嘅米線。(泰皇燒春雞)半隻，呢個係三款比較出色嘅，雞幾入味，夠熱，

成年都無食檬粉，竟然一連兩日都係食檬粉冬陰公湯底，尋日食過小店今次試下連鎖店，是在大型商場內的，店離商場正門不遠，開放式店舖，所以感覺寛敞又是下午茶時候，又是冬陰公湯底檬粉，比起上一編的小店來說分不出高低（其實越濃味菜式越難分出好味），但環境比小店好得多，另外最重要提及的是跟餐飲品，夠哂大杯，冰粒形態是多吼碎冰，減少溝淡飲料之餘能保持冰凍總結，以冬陰公做主題連鎖店，沒有什麼突破底下，即必須以環境舒適及價錢吸引客人

OT後食埋野先回家，到了近車站的荃灣廣場，介紹同事黎食冬蔭公公，個人很喜歡佢個冬蔭功湯底。多左個一人邊爐餐，好似幾正咁樣。落完單店員送上餐具，乾淨程度一般，自己攞紙巾抹一抹啦。兩杯凍奶茶（$9/ea），略淡，但勝在夠大杯。炸魚片冬蔭功湯檬粉（$49）同事叫了少酸同要檬粉，都幾大碗喎。魚皮分開上，夠香脆，不是死鹹。豬頸肉冬蔭功湯紅薯粉（$56）紅薯粉有咬口，吸了湯汁好正，豬頸肉有四、五片，肥肥地有咬口。同樣叫了少辣，呢個辣度對我黎講啱啱好，酸酸地有香茅香，勁正的湯底，飲哂全碗湯呀～不用加一，都幾抵食吖。

今日系荃湾戏院睇完戏，因为隔离嗰间乌冬闩咗门先至嚟呢度食。嗌咗个海南鸡饭同埋个米线，结果大失所望，鸡肉硬到咬唔落，米线汤咸得滞。总之啲嘢贵又难食。 更加顶唔住嘅系d服务员质素又差，门口个男waiter细声讲大声笑，偷偷係度讲客人闲话。加上铺头冇冷气，热到爆。一定唔会再嚟呢度。👎👎👎👎👎👎p.s. 其实我都好少系呢度写评论，今次应该算系第一次。平时遇到啲嘢麻麻地都算啦，今次实在顶唔顺，就算凑够200字都要unlike呢个铺头！

睇完戲夜晚晚唸住求其食少少嘢。行到呢間餐廳，見冇咩人又唔駛排隊，就走左入去。老婆要了牛骨湯檬，完全冇牛肉湯味，竟然係藥材味（不過唔好諗住係肉骨茶味），又好咸，又苦，食緊嗰陣以為自己飲緊中藥苦茶，完全唔掂。食完要飲番啲甜野送口。碗野應該有病醫病，冇病強身！勁！而我就叫左碗冬蔭公湯米線，啲米線漲卜卜，個樣好似好多咁，以為黎錯左碗烏冬，一食落去，嘩....好淋呀，啱晒bb同老人家食，魚腐超咸，羅白好苦，唯一安慰係D菜份量都好夠。早知返屋企煮公仔麵好過！好後悔。

呢間野勁唔抵食！正價價錢，d 冬蔭湯粉勁少！d餸勁唔抵食份量又少（$9，叫餸冬菇，1粒切開3片），食完食左一陣風，個場冷氣又勁唔夠，食到出晒汗，點叫人再去，沒有下次！

已係嚟第二次，上次試朱扒凍矇，都好好味。經常試其他店嘅海南雞飯，今日就嚟試個海南雞飯，個飯都做得好好，但份量都係小囉，但雞嘅份量就未免太少，五十幾蚊食完只感到四成飽，好惨惨(希望佢個份量比多少少)，另外 order 咗一客春卷，一客燒雞串， 勉強達六成飽 ; 朋友叫咗個冬蔭公幼薯粉，反而覺得食呢個會 com 飽d 😅 叫埋杯凍咖啡，都好好味，由於個雞飯送到埋嚟，太少，睇見都已唔想影相😂

午餐在這裡解決，泰式沙律是加錢換的小吃。叫了一個冬蔭公雞扒紅薯粉，雞扒普通，紅薯粉偏淋，叫了大辣，可惜不覺辣，但湯頭是不錯的，也有椰奶香味。泰式沙律則偏甜不辣。整体不過失

上星期日經過荃灣廣場，聞到好大陣冬蔭功味，好香，發現是來自冬蔭公公，於是一行4人立馬去食。星期日，大約8點，都毋須等位，當時竟然未發現有異樣。一坐下，點了3個海南雞飯，但已賣清。最後點了以下幾樣:香茅豬扒飯餐沒有香茅味，其實是鼓油豬扒，太咸跟餐的湯不咸，但一試就知係味精粉開出黎反而得一小碟配菜可以食冬蔭功火鍋同之前食評一樣，知道會與宣傳單張有落差，但不知真的落差會這樣大。先說湯底，似是由湯包開出來，味精極重。再來配料，除左兩塊大生菜葉是正常，蝦是'梅'，不新鮮。青口尚有雪味。最新奇的是冬蔭功竟然會有粟米冬蔭功薯粉完全是一個敗筆。食薯粉尤如食矽膠，食到朋友面都西埋。最後只可以食餸。香蕉船叫左榴槤，芒果，朱古力。聲稱是gelato，結果是雀巢雪糕。榴槤味ok，朱古力味正常，杧果味好假。埋單每人大約100元。以這個質素來說已經是貴了。呢個價錢，不如去食茶餐廳好過。其實去泰國機票咁平，又何解要留港食偽.泰菜呢？就算要食泰菜都不如去九龍城食。

荃灣有好多不同種類的食店，選擇咗泰國風味的冬陰公公。設計比較開放，餐牌選擇很多不過不夠統一，看起來有點亂。泰國馳名海南雞＄86@半隻色澤比較似普通白切雞，味道也跟普通的白切雞分別不大，主要是提供了三款泰式醬汁。馬沙拉咖喱原隻羊膝$98 配薄餅有比較濃郁嘅羊酥味，而且肉質好鮮嫩，咖喱汁深入了羊肉裏面，味道超乎想像，再加上我們選擇脆口的薄餅，鹹香十足又酥脆。馬來肉骨茶湯飯＄72裏面好有藥膳的味道，而且材料充足又有冬菇又有鮮豬骨，味道濃郁又夠香。綠茶雪糕椰汁冰$38雪糕椰汁冰個雪糕甜甜地，小小清新，味道還好。椰汁冰份量很大，裏面有好多綠色的Jelly好有咬口。自選雪糕香蕉船（蜂蜜牛奶，朱古力，榴槤）最好就係可以自己選擇唔同味道嘅雪糕，有幾款味道都比較特別，唔係用雀巢。蜂蜜牛奶甜甜地又好香，榴槤非常濃郁，不過唔食榴槤嘅朋友就叫我整遠啲個榴槤雪糕la⋯

原先打算去另一西餐廳晚膳，但事總不能如人願。。。唯有周圍睇吓，揀吓價錢合理又想試吓既餐廳。。。行經被這餐廳門外的餐牌吸引，於是入內試試。朋友怕熱氣叫左豬排飯餐，而我就點左一人冬蔭火鍋，好特別呀希望唔好太辣啦！鍋黎到啦…樣就不甚吸引喇。。。材料看似全都熟，除左果兩片菜不過人不能只單靠外表，一於試試。湯底是偏甜不太辣，但味道還可以，似係用醬開出黎，“傑傑”地，唔啱當湯飲。 唯有用黎焯吓檬粉，而不飲。料就有: 幾條紅色魷魚(煲極都唔縮水)、兩隻蝦(肉質唔錯)、兩片唐生菜、兩隻青口(ok)、好似3粒龍蝦丸(無咩味)、兩條蟹柳及一隻大冬菇，追加一碟肥牛(不太肥)。其間要求員工加點水，但佢豪不吝嗇，攞左冬蔭湯底比我，但我係想溝稀啲湯底食，所以婉拒佢既好意。整體其實都唔錯。但是，上openrice睇番前兩個食評，原來早幾日都係食同一款鍋，發現賣相折然不同，材料份量又不同。唉！只能說不是你的就唔到你。。。希望餐廳能保持水準,唔好咁大落差喇!