三悅飯店 (已結業)

以前(10幾年前) 讀書放學之後都會係媽媽個office 度做功課, 午餐9成都係三悅度食, 佢地d貴妃雞, 真係食極都唔厭, 因為真係好好食, 唔太肥, 又夠滑, d 薑蓉又夠味, 佢地堅持用新鮮雞。有排禽流感, 無雞食, 就食下碟頭飯, 特別係有時叫沙爹牛肉飯加蛋..正..佢地d小菜好有水準, 唔會將貨就價, 全部新鮮煮的, 侍應態度幾好, 我仲記得當再次有番鮮雞供應, 佢地第一隻貴妃雞出爐, 全場哄動, 好快就賣哂, 而家close左, 真係可惜

我們同事的飯堂。每每在想不到lunch 地點時，它就是我們的救星, 尤其一班人，lunch 好難搵食。依度d雞出曬名，不用多說，其他小菜如扣肉飯、燒味、炒牛河等。而且仲送例湯tim最重要是好底食，一般9 個同事去，只order 7個餸，都好飽，計埋都係廿幾銀。底!!

呢個星期終於有幾個同事同我係鰂魚涌做嘢，做到夜夜地，大家諗到頭都爆唔知食乜時，係七姊妹道見到呢間飯店，就入去食吓啦。睇睇佢的菜牌，有好多小菜可以選擇，仲可以有一啲自選套餐，一湯四餸，248蚊。見我地二男三女，四人餐都應該夠食架啦。於是點咗例湯、貴妃雞、魚香茄子煲、炒菜心同埋椒鹽九肚魚。好快就有得食啦，先黎例湯，個晚係煲西洋菜湯。自己對西洋菜有喜好，於是覺得好味，但同事說鹹了少許。再黎就係貴妃雞，呢間飯店主打貴妃雞。啲雞唔係太大隻，而且唔係好肥，都幾好味。到魚香茄子煲，熱騰騰的，同事激讚好味，我都覺得幾好味。炒菜心同椒鹽九肚魚都幾夠鑊氣。食食吓望過隔離，見隔離枱開咗支紅酒。嘩！咁high？係呢間唔係咁高級的地方食飯都開支紅酒，似乎呢個係熟客。總結而言，呢間飯店都可以推介，一人60蚊左右的晚飯，幾抵呀！

舊店成日幫襯，自從搬左之後第一次去．昨晚同老公兩個去食晚飯，叫左個二人餐：雞一碟例牌，保持到水準，d肉好嫩，唔錯！雜菜煲味道ｏｋ．梅菜扣肉正！唔會太甜唔會太咸，扣肉肥而不膩．例湯不過不失，可惜因為天氣冷，好快凍左．連埋ｂｅｅｒ同白飯，埋單二百二，抵食！ｄ伙計貌似做到滑哂"牙"果類，但估唔到都幾好服務．

一行三人來到吃午飯。這裡的招牌菜是雞，那我們就一定要叫番個雞食。大家都不太肚餓，先要叉燒切雞飯和日式炒烏冬。切雞的確好好，雞肉香滑，有雞味。雞皮連雞肉食，口感好正，可惜份量太小。叉燒其實都不錯，只是雞太好而被比下去。這飯店始終都係食雞既老店，也有心理準備其餘的菜色不會太出色。所以，即使日式炒烏冬只是平平(其實亦不是太差，只是較淡)，也沒有半點失望。看見人家食燒肉好似幾正，又叫一碟例牌試試，也有驚喜。皮脆肉淋，非常好!

到北角開會後，一落樓就見到呢間野。晚上六點半，只有兩個客。街坊燒腊店格局，裝修保持八十年代風味，絕對唔會堂食。點了半隻貴妃雞（$85 / 半隻），外賣。幾貴！經過九個字車程，回到家攤左半句鐘，依然美味！體積頗細，但有雞肝、雞心，老媽幾like 。皮肉之間那層果凍質地，吃得兩老心花放，好！貴，但好味，應該再來買外賣！

當回憶是美好時, 現實又會是怎麼樣?回想當年, 初出茅蘆, 公司就在健威. 當時三悅雞是北角區名菜, 風頭一時無兩. 我們近水樓台, 有五六年差不多隔天在此開飯. 後來公司一遷再遷, 越搬越遠, 不知怎的, 就是提不起勁回訪當年的飯堂.當年甘之如飴的"美食", 不知是他們退步了還是家人口味已經轉變, 現在已經不再吸引了. 以雞來說, 當年每次必吃的, 現在再品嘗, 已嫌味道不夠鮮美, 肉質不夠嫩滑. 店內環境亦相當擠迫, 當年是如何雄霸一方的呢?話說回來, 這裏的價錢只是中下, 和一般中級酒樓食肆差不多, 要求高質素的美食和優雅的環境當然沒有可能. 總的來說, 是物有所值的, 看個人要求罷.

上面開會，下面就得個等，於是同同事兩條友來試下貴妃雞，要了個例牌，交帶要了雞脾及雞背，再搭個菜，本來打算叫個芥蘭炒牛肉，但同事死話要西芹，惟有就犯，最後加個湯，費時諗，就叫個海鮮豆腐湯。貴妃雞，冰鮮雞，叫做嫩滑，但味道認真麻麻，偶這土包子，吃慣大陸雞，淺嚐兩口，扒飯去也。再來的西芹炒牛柳，夠油水，但無鑊氣可言，最可怕的就是被師傅及它的老友打成一片，那肉質與師傅的味道，叫人一試難忘，又是吃一口，再扒飯去。最後的海鮮湯，認真夠鮮夠腥，喝半口，手震得連匙亦跌下，連喝三杯茶，當晚即告失眠。

今天和兩個同事，一共三個大男人到這裡午膳。人少關係，只叫了雞（例牌），菜遠炒牛肉和紅燒豆腐。雞一直是這裡強項，果然沒有失手，雞肉滑有雞味而又不會太生，點上蠔油和薑更為惹味。菜遠炒牛肉的牛肉沒有過火的情況，菜亦炒得爽口。豆腐都不錯，幾嫩滑。

呢度其實都算係飯堂之一, 近我office, 不過lunch比較多麻甩, 地方又幾逼....今日因為經過見人唔多, 拿拿聲叫個雞飯食, 雞肉鮮嫩好吃, 係招牌啦! 其實呢度小菜都唔錯, 見隔離檯碟生炒骨咁正, 叫個例牌, 大大舊, 外面鬆脆但肉地好腍, 個汁亦夠酸, 都好味! 不過如果細件會容易吃.平, 吃得過!

幫隊友搞婚禮佈置，忙足幾個禮拜，終於黎到正日。一早搞完兩架車o既裝潢，趁新郎哥去左接新娘同「針」茶，o係佢屋企掃埋阿外母預備o既車厘子，就拉隊黎最近o既三悅食個早早地o既午餐。十二點唔夠入到黎，當然係包場咁o既格局啦！連冷氣都好似係o岩o岩開咁，好弱！由於大家之前都食左新娘叫人送黎o既西餅﹝有人唔止食左一件﹞，六個人只係叫左一隻貴妃雞、什菌炒藕片同麵醬炒油麥菜。由於什菌炒藕片o既藕片少得可憐，我地又追加左一碟南乳炒藕片。貴妃雞上檯，都幾大隻，肥瘦相宜，肉地亦算滑，配薑茸同蠔油，味道都唔錯，不過雞味其實並唔係太明顯。似乎o係街食o既雞，點都唔及D伯母整o既咁有雞味，不過質地就好細緻同好滑囉！其他幾味小菜就普普通通，杯茶就完全唔掂，好難飲！整體黎講，呢度o既食物水準只係普通。埋單只係280大元，價錢就幾相宜，益左出錢o既新郎哥啦！食飽飽，又係時間出發去酒店開工。

三悅在九十年代初曾創下日買七百隻貴妃雞的壯舉，此事在飲食界曾響負盛名，只因此店用的是兩斤半重的黃油雞，再用秘製的堯柱白歯水浸調，雞味香濃而滑口，至於其他菜式是走東江酒家的路綫，如：家鄉炒藕片、梅菜炆扣肉和錦江豆腐煲等，很多菜式都有高水準。奈何近年香港的飲食文化以高速發展，不同菜式的食府處處皆是，再加上金融風暴和沙士的衝擊。那日買七百隻貴妃雞的日子已一去不返，但此飯店仍不致門可羅雀，可見它仍有可取之處。

黎呢度, 一定要食雞. 平時同屋企人出街食飯, order雞最多半隻, 但呢度就一定一隻!其他小菜也不錯! 但補充一點, 有北角地膽話呢度唔穩定.

中秋果日跟男朋友的同事一起食飯做節.佢地大時大節都會一齊食個lunch慶祝下,咁岩我又放假就可以一齊高興下.佢地多數都會去呢度或者去北角鳳城.男朋友話呢度d雞好好食,而且價錢好平.一圍十四人,叫左兩個餐.一個四人,一個八人.有好多野食下.雞一隻.size唔算好大.我都唔sure隻雞係唔係鹽焗,少少咸啦.最緊要係唔肥.d肉都好嫩下.感覺好似0係大陸食走地雞咁好食.真係好唔錯喎.粟米魚肚羹.都好足料呀.有好多粟米同魚肚.都幾好味.什菜煲,一般啦.都有幾多菜.梅菜扣肉.勁正.不過得好少.d梅菜一d都唔咸,甜甜地,d汁撈飯一流.雖然d扣肉好似好肥咁,但係食落又唔覺喎.魚香茄子,好香.味道ok.唔係好肥.d茄子冇炸過.椒鹽九肚魚.ok.南乳炸排骨.好得.勁香口.好香南乳味.排骨上面d炸蒜頭都好好食.脆卜卜.斑腩煲,好多料.有菜,叉燒...斑腩都好大舊.幾好味.黑椒牛仔骨.辣辣地,幾正.牛仔骨幾腍.好入味.最好味係d洋蔥,吸晒d汁.仲有一個唔知咩豆腐,我冇食到.但係好快清碟,應該ok.埋單七百蚊有找.都幾抵食.d野都好大碟架.而且服務都幾好.