一蔥味

营业中

休息中

今次率先試咗一間位於深水埗西九龍中心美食廣場五月新開嘅小店，主打台式炸蛋蔥油餅，靈感來自台灣花蓮夜市小食，手工自製麵團，採用中筋麵粉搓揉，發酵一晚後先壓，放入油鍋炸，加上炸蛋同滿滿嘅蔥，即叫即整，新鮮熱辣辣。炸餅有六款口味，分別為原味、燒烤、蜜糖燒烤、鹹蛋黃、沙律醬同香辣，炸蛋蛋香氣十足，咬落爆漿，有燶邊，層次感豐富。蔥油餅微微脆身，夠油，超級邪惡，食到成隻手都污糟晒，見佢放蔥前會用油淋一淋，保持鮮綠色，值得試。

已經好耐冇去過深水埗西九龍中心，難得過嚟鴨寮街買旅遊卡順便過嚟行吓，估唔到已經變咗好多，有好多格仔鋪，而除咗最高嗰層food court都有好多類似小型food court其中呢間炸蛋蔥油餅就比較吸引我哋多啲，價錢亦都唔貴，樣樣都即叫即做，睇住師傅搓薄餅，睇住佢炸蛋，聽住啲聲吱吱喳喳，感覺好療癒啊😂而且見佢沖油都係即刻做，感覺非常之新鮮，因為即刻做嘅關係，口感比較酥脆，留心蛋做得好出色，簡簡單單口感豐富👍🏻