秋冬成日谂起辣嘢、炸鸡，去食韩国菜一定最满足!! 旺角、荃湾都有分店嘅韩国过江龙“Yadllie Plate”，当地已经超过30间分店。韩国老板朴正根先生亦好着重香港店质素，大部分食材均由韩国直送，并亲身为香港店设计多款限定料理，全新蒸煮食法白切五花腩，推出几个月已经爆红啦！
新开荃湾店环境开扬，黄昏时间有机会睇到日落。
荃湾店大玩英伦风
旺角店大热嘅惊喜二重奏，有齐石烧牛扒+原味炸鸡，终于唔使选择困难啦。香港炸鸡都系跟随韩国做法，用人手逐一扑上秘制炸粉，减低炸鸡粉浆吸附过多油分，薄脆低油食多几只都唔惊肥㗎。旺角同荃湾店餐牌都系一样，有招牌炸鸡、爆红料理；以及多款地道料理—八爪鱼煎饼、玫瑰牛肉炒年糕、鱼介汤锅等，完美还原韩国风味。新开业荃湾店就更IGable，全店大玩英伦火车站主题，深蓝色氛围更显浪漫。拣啱黄昏时间嚟，仲有机会睇埋日落。
【爆红料理】香港少见！白切五花腩
韩国直送原条五花腩，肥而不腻兼零羶味。
平时韩烧五花腩会食到一身油烟味，有时仲好热气𠻹。朴先生就特地设计蒸煮食法，锅中猪肉汤会边食边滚，利用猪肉汤轻烟蒸煮上层五花腩。呢种蒸气食法可以逼出多馀油分，同时又保留五花腩水分肉汁，入口软嫩渗出油香而不腻，真系有相逢恨晚嘅感觉呀!!
新鲜生菜包住五花腩、辣椒、蒜头，蘸咸虾酱/大酱食好正。
肉控天堂！惊喜二重奏
旺角店长期人气No.1嘅惊喜二重奏！石烧牛扒系顶级肉眼扒，加埋原味炸鸡完全系肉控天堂。“Yadllie Plate”香港店均用韩国进口走地鸡，肉质特别弹牙鲜嫩，系韩鸡嘅独特风味。
石烧牛扒+原味炸鸡CP值好高，旺角店长期人气No.1。
【招牌健康炸鸡】零化学调味·人手扑粉·双重油炸减油
韩国“Yadllie Plate”以炸鸡起家，所以好着重炸鸡质素，会用济洲岛20多种蔬菜香料醃制，完全零化学调味剂。为咗令炸鸡健康不腻，每日坚持人手扑粉将粉浆减至最薄，减低粉浆吸附油份；更用双重高压油炸先锁肉汁、后逼出油分，做到外脆内嫩又低油。全店共4款炸鸡口味拣—原味炸鸡、大邱辣酱炸鸡、大葱丝炸鸡、蜜味奶酪粉炸鸡，心大心细可以拣半半炸鸡任选2款味道。
半半炸鸡(大葱丝炸鸡、大邱辣酱炸鸡)，附送炸番薯条大满足。
【正宗韩国风味】
韩国冰汤机制 | 水冷面
无惧秋冬都要食呢度嘅水冷面呀！“Yadllie Plate”水冷面好烟韧，而且有别坊间只加碎冰做法。真系用韩国冰汤机，即场将水冷面汤底制成片片冰花。每啖Q弹面条都挂满冷汤冰花，入口融化慢慢渗出香醋微酸、黄芥末轻辛，完全唔会咬到无味碎冰㗎。
韩国冰汤机即场将汤底制成冰花。入口融化，一般碎冰难以媲美。
韩国直送粉浆 | 八爪鱼煎饼
韩国地道料理不得不提煎饼，呢度系用韩国直送粉浆，所以做到脆边烟韧嘅独特口感。八爪鱼同样韩国直送，啖啖都好爽弹好足料，自行蘸 煎饼辣酱／自家制酱油 更加香口。
煎饼粉同八爪鱼都系韩国直送，够晒地道。
完美还原 | 鱼介汤锅
朴先生更完美还原韩国街头小食—鱼介汤锅，连炉上枱滚住食好有风味。经典鱼豆腐、鱼糕等都系嚟自韩国，拎住竹籤食真系好似去咗韩国咁呀。
鱼介汤锅系经典韩国街头小食，拎住竹籤食更有风味。
终极邪恶拉丝 | 玫瑰牛肉炒年糕
早前玫瑰酱炒年糕喺韩国掀起风潮，而家“Yadllie Plate”香港店都食到喇。最重要系加咗几种邪恶乾酪，完全系极限爆拉丝！将年糕、乾酪连埋炸米通一齐食，又脆又烟韧绝对上瘾。
韩国掀起风潮嘅玫瑰酱炒年糕，配炸米通食更过瘾。
【IGable甜品·梳打】
梦幻雪冰系列
雪冰系列好梦幻，大大杯只系$78起有黏糕雪冰、朱古力雪冰、草莓雪冰、蜜瓜雪冰、芒果雪冰。雪冰系用牛奶作基调又绵又有奶香，入口融化。全部都有满满配料，蜜瓜雪冰仲有支蜜瓜雪条好惊喜。
蜜瓜雪冰有蜜瓜波波、蜜瓜雪条，见到已经好开心。
(左)草莓雪冰、(右)黏糕雪冰。黏糕铺满黄豆粉，粒粒冰糕俨如雪米糍口感。
芒果雪冰铺满芒果肉。
朱古力雪冰最香浓。
唯美渐变 | 梳打系列
4款梳打都系唯美渐变色，有巨峰乳酸梳打、草莓乳酸梳打、蝶豆花青瓜梳打、蓝橙荔枝梳打选择。
(左起)巨峰乳酸梳打、草莓乳酸梳打、蝶豆花青瓜梳打、蓝橙荔枝梳打。
Yadllie Plate 야들리애플래이트 (荃湾店)
地址: 荃湾大河道100号海之恋商场2楼2030-2032号舖
电话: 62231415
Yadllie Plate 야들리애플래이트 (旺角店)
地址: 旺角西洋菜街1号兆万中心11楼
电话: 23600233
