之前睇社交平台介紹話非常推薦大家去食，指食材好新鮮，牛肉係每日空運到港，有日本當地餐廳的水準。所以馬上急不及待去左朝聖。因為閒日又要返工兼廢事過海，最尾去左黃埔分店食。雖然閒日，但入座率都有7成，以一個中高價位餐廳黎講都幾多。黑毛和牛身盛海膽 $98★★★☆☆見呢個都寫住人氣推薦就試左同埋網上都有指一定要試下。黎到個擺盤幾靚嘅，和牛個紋同油花都靚。但食落口個和牛唔知係咪未解凍夠定點，好硬身個口感，海膽正常但都冇好清甜。如果以呢個價錢，我期望值係勁高，我食完都馬上黑人問號。塊和牛個口感真係難以形容得好貼切，就好似雪凍左D肉咁，加上佢包左幾層，我都咬左好耐下先食完。味道上亦冇咩特別。鹿兒島和牛他他 $128★★★★★呢個十分之推薦大家，同樣係生食和牛，呢個就同黑毛和牛身盛海膽差好多。和牛他他顏色呈鮮紅色，一睇已經知道新鮮！將他他混合鮮蛋黃、調好醬油、紫菜、洋蔥、蔥花一齊食，食落好滋味，個肉質口感好鮮嫩，連我未嘗試食過生牛肉嘅都認為容易入口，個他他上面仲有D芝麻、松子仁，食落更香口，而紫菜洋蔥等配菜令到食落個層次再豐富Ｄ，唔會好單一。重點係佢新鮮，因為生牛肉品質好重要，唔係好易肚痛，但食完都冇事！黑毛和牛裹腹牛柳 $248 ★★★★☆牛柳 120g一舊看似好細舊，但燒完切開都幾多件！食落幾重牛味，食落幾軟腍，越咬越香，個油味出之餘，唔會乾幾多汁，好味，配飯一流！黑毛和牛肉橫膈膜 $188★★★★☆呢款係汁燒，但都好出色，個牛味重之餘唔會因為汁燒而蓋哂Ｄ味道。肉質好軟腍，油花分布均勻，油脂感唔算好重，但個肉味好濃烈，食多幾件都唔會好漏。蔥鹽味上牛舌 $128★★★★☆牛舌唔算厚切，但食落幾爽脆鮮嫩，有口感但唔係韌。有牛肉味，燒完更帶點焦香，但唔會話好乾身，都有少少汁水。因為佢都有帶鹽醬汁，燒完直接食都冇問題。但唯一就係個蔥味唔出，似就咁係放上面，但燒個陣其實都跌哂。黑毛豚無骨小排 $88★★★★☆雖然呢到主打食牛，但都想叫下其他肉類試試。而呢款黑毛豚無骨小排絕對有驚喜，肥瘦均勻，食落口感唔會嚡帶少少爽脆，好香豬味，燒完之後焦焦地，咬落去油脂爆哂出黎好香，而且越咬越香，配埋一啖白飯一齊食一流！若雞胸柳 $80★★★★☆雞胸柳唔算太特別，但都好食，食落口感脆脆地幾特別，有別一般雞柳，完全唔嚡口。如果食牛食到太膩，可以簡呢個黎清一清！黑毛豚脛肉 $88★★★☆☆呢個相比黑毛豚無骨小排就差咁Ｄ，唔係唔好食，都正正常常，但就冇咩特別，如果要揀一款豚肉就唔會揀呢個。泡菜三點盛 $58★★★☆☆泡菜青瓜、泡菜大根、泡菜一次有齊三款配菜，個泡菜醬汁係一樣，只係入面個食材唔同左。三款都新鮮同好爽脆，食完開胃之餘，又可以解膩。大根此終係生醃，個菜青味會勁啲，要睇個人接唔接受到。不過以個份量黎講價錢有少少貴。杏仁奶凍、雪米糍★★★☆☆每人飯後都會贈送一份甜品。杏仁奶凍個杏仁味好出好香濃，但又唔會似藥水味，個杏仁味同奶香好夾，口感好滑溜，甜度適中，食完都唔會覺得太膩！雪米糍比較普通，食落同維記雲尼拿味雪米糍冇太大分別🌟總括：香港燒肉店黎講呢間肉嘅質量冇得輸，新鮮！但價錢上偏貴，但見到佢午市價錢會比較上實惠好多，想一試嘅朋友絕對可以食午市。…查看更多
