潮州仔食堂 (已搬遷) 新店位置

呢間小店成為我最近經常幫襯嘅地方。因為佢嘅楜椒豬肚湯底實在太香啦！每次經過都聞到好香，自然成日都想去食！我呢篇食評係食過幾次之後所得哦！呢度主要係食豬內臟既，招牌係豬什王，佢包括好多一般餐廳無既豬內臟，有常見既豬肚、豬大腸、豬紅、豬膶、豬脷，但仲有少見既豬心、豬肺、豬黃喉，第一次食時真係大開眼界，我都未食過豬心豬肺呢！楜椒豬肚湯底好香微辣，啲餸仲好足料，款款都有兩至四件，好飽肚，想要加麵底加幾蚊就可以了！配埋枱面既白楜椒碎，真係好惹味！另一招牌係豬手，不過本人覺得呢度啲豬手無乜肉，只有豬皮，所以再幫襯都只係食豬什。呢度嘅潮洲式腸粉好滑，配甜豉油好好味，仲會有啲菜添！不過我至愛既豬膶腸就唔覺好多料，食過兩次都只有碎濕濕既豬膶，唔知係咪潮洲式係咁佢仲有加蛋既選項，不過唔覺得邊種特別好味。但夜晚係無得食腸粉架。煎餃就無乜特別，不過細細粒易入口。呢度瑞士雞翼都幾大隻，好入味，幾好既。仲有瑞士汁豬耳，爽口，略嫌份量少咗啲。除咗一般茶餐廳飲品，呢度仲有豆漿，可惜只有凍無熱既選擇。呢度仲有其他牛肉等既選擇，不過我至愛都係豬什，因為就腳又好味，會繼續幫襯既。