A4和牛沾面配鸡白汤 李泳豪旺角新开拉面屋(有片)
2019-03-27

拉面控有新店可以去试啦!旺角呢间拉面店由上年开立食烧肉店嘅艺人李泳豪创立,主角同样系日本直送和牛,新店就变成配鸡白汤、浓虾汤等不同拉面同沾面,口味多变而且每款汤底都用料十足。
 


阿久根和牛拉面屋唔同坊间其他拉面店,配料特别选用A4和牛西冷,皆因店主李泳豪锺意食牛,继阿久根和牛立烧店之後,拉面都要同和牛有关!不过唔同嘅系烧肉店会用油花较多嘅A5等级,沾面同拉面为咗令口味平衡,就拣脂肪少啲但同样充满肉香嘅A4等级。
 


慢煮A4和牛·鸡白汤沾面($128)

西冷和牛腌制後低温慢煮八小时,约两至三成熟後封四面肉汁再以煨日式叉烧汁,所以食落非常嫩滑Juicy,有入口即溶感而肉味浓郁,略嫌筋比较多。鸡白汤就用日本鹿儿岛走地萨摩鸡加少量猪骨熬成,奶白色沾汤浓稠香滑。
 


将面条浸落热辣辣鸡白汤中,因为鸡汤够浓所以够挂汤。如果系食唔惯浓味嘅朋友,可以选择加少少带酸嘅昆布醋,或者食到中间请师傅加入鱼介清汤,咸味都会减低变得更易入口。沾面用嘅面条比较粗身,口感介乎油面同意大利面中间,比较实而滑溜。
 


香煎虎虾·浓虾汤沾面($98)

其他口味依然落重本!虾汤用咗两款唔同嘅虾熬足九个钟,而且先炒过带出味道,闻起嚟鲜味自然双倍浓郁。沾汤加上樱花虾,沾面底亦加上餐厅自制虾油,令成碗沾面虾香十足!
 


虎虾比手掌更长,煎香後啖啖虾香口感弹牙。其他配料包括有糖心蛋、木耳、大葱、笋、紫菜,糖心蛋选用可以生食嘅日本鸡蛋,用两日腌至入味,酱油味香而唔死咸,系一大加分位。
 

更多【名人店】:
1. Chill叹周末!黄宗泽蚝吧新推任食生蚝Brunch
2. 杨明夥拍朋友开炖汤店 为都市人原盅炖无味精靓汤
3. 新推限量海胆鲁肉饭 傅佩嘉赴台学茶 加卖tea espresso

 

灸烧豚肉·浓骨汤拉面($68)

汤底用猪骨加少少鸡脚熬成,有猪骨香但比坊间一般嘅豚骨汤清,唔会食两啖就觉得太浓或者太咸。豚肉灸烧过後多咗一份火灸香味,肉质偏瘦而唔柴。
 


和牛饺子($68/3件)

日式拉面店中又点少得饺子呢,而系呢间主打和牛嘅拉面屋中,饺子亦唔系普通嘅猪肉馅,而系A4和牛馅!煎至外脆内Juicy,牛肉香突出。
 



拉面屋占地唔算大,但胜在唔会太逼狭,坐喺吧枱仲可以欣赏到师傅烹调过程,增加互动。而且仲有木牌畀大家写低愿望许愿,系唔可以错过嘅打卡位!
 



阿久根和牛拉面屋
地址:旺角广华街13号广辉大厦地下1号舖




文:Cathy
相、片:Tom Li

关键字
旺角
拉面
沾面
和牛
李泳豪
阿久根和牛拉面屋
开饭星探
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
2天前
4月份好评餐厅十强
2019-05-07
实现梦想 开一间联系社区嘅咖啡馆 上水独立Cafe粉岭重开
2019-04-29
泰国手标奶茶登陆香港!铜锣湾ChaTraMue旗舰店直击(有片)
2019-04-25
铜锣湾新开$78新派素食自助餐 六十多款任拣 素食寿司、冰镇咕噜肉(有片)
2019-05-02