香港米芝莲2019!新上榜餐厅逐间睇
2018-12-11

香港米芝莲2019啱啱新鲜出炉,今年名单都无咩特别大惊喜,一星就有六间餐厅新上榜,二星就有两间系首次夺星添,而车胎人推介同街头小食就分别各有4间同5间新上榜,一於同大家逐间介绍下先!


新上榜一星餐厅!


清新创意法式料理  Arbor


呢间中环嘅法国菜餐厅由芬兰主厨Eric Räty主理,虽然系法国菜,但主厨好擅长利用日本时令嘅食材加入菜式中,如前菜Sea Urchin、主菜Wagyu Beef A4等等,味道令人惊喜之余仲好清新。难怪餐厅开业未满一年就成功夺星。

图:Joy_cce


时尚法国菜馆 Belon


Belon今年先啱啱上咗Asia’s 50 Best,呢间同样都系法国菜,菜单选择唔算多,但就系贵精不贵多。主厨James Henry擅长突出食材本来嘅风味,而且挑选当季新鲜食材,因此餐牌大部分菜式会每星期更换一次,令食客每次光临都有惊喜。而餐厅供应嘅酒大部分亦系嚟自法国,环境亦优雅舒适。

图:mercurykwok


连续夺星 国福楼(中环)


国福楼已经连续几年得到米芝莲推介,仲已经连续两年夺星,就算搬咗新舖去中环,今年都不负众望继续留守喺一星位置!想喺一个优雅清静嘅环境食粤菜饮杯茶,国福楼绝对系唔错嘅选择。

图:为 食 龙 少 爷 SiuYeah、shirleyymf


高质印巴菜 New Punjab club


New Punjab Club系第一间亦都系唯一一间拥有米芝莲一星嘅巴基斯坦餐厅。创办人Syed Asim Hussain就话,南亚菜喺香港嘅地位已经越来越重要。餐厅装潢行低调奢华路线,有前菜、烧烤、肉类咖哩、菜/豆类、沙律,唔少人都话佢系香港最好嘅印巴菜,睇嚟真系所言非虚。

图:adrianang


名厨私房菜 Octavium


呢间意大利餐厅都系由名厨 Umberto Bombana开设,而名厨旗下已经有一间三星意大利餐厅8 ½ Otto e Mezzo BOMBANA,所以话今次成功夺星一啲都唔奇。Octavium系佢私下开嘅私房菜,可以畀佢用心制作菜式或加入唔同新元素。特别推荐名厨拿手嘅手工意粉,食落好好咬口。

图:adrianang


富豪饭堂 新荣记


餐厅已经系上海米芝莲一星名店,果然香港都成功夺星!主要食江浙菜,北京烤鸭、烧BB 乳鸽、蜜糖番薯、酱萝卜、沙蒜烧豆面同鲳鱼焗饭等都系招牌,酱萝卜采取高山萝卜、入味之余仲好清甜,值得一试。

图:Reneedaone


新上榜二星餐厅!


东京三星寿司名店 鮨.斋藤


总店连续多年得到东京米芝莲三星,世纪主厨Joël Robuchon亦曾大赞系全球最佳寿司餐厅!香港店由大厨斋藤考司嘅得意门徒小林郁哉主理,斋藤考司亦会亲自挑选鱼获然後即日空运到港,由海鲜、酱油到寿司饭都确保香港店食到嘅同日本店嘅一样。


图:吃吃君Reneedaone


创新法日料理 Ecriture


由法籍总厨 Maxime Gilbert主理,主打糅合日本烹调方式嘅法国菜,而且集日本同法国两地嘅当季优质新鲜食材,创作出精致特别嘅菜式。位於中环一座大厦顶楼,可以一览中环景色,而开放式厨房亦系一大重点。
 


图:餐厅网站


新上榜车胎人美食!


第三代面店 刘森记面家(福荣街)


刘森记面家已经传到第三代。店内所有竹昇面同云吞都系人手制造,云吞包入原只鲜虾同猪肉,饱满爽口。招牌系云吞面、虾籽捞面同猪手捞面,配料自制腌萝白爽、脆、香,值得一试。

图:ChloeLeung9775


苏豪区内的中东风味 Le Souk


位於苏豪区内嘅中东菜,由两位埃及兄弟开设,餐厅内嘅装修色彩缤纷,无论食物定气氛都好有中东味道。店内以摩洛哥同中东美食为主,推荐羊肉煲,嫩滑之余仲好香,无花果中东沙律亦系另一味受欢迎菜式。


图:siuposiupocrlrgrs


传统中式糖水 佳佳甜品


佳佳甜品今年同时被列为车胎人美食同街头小食推介,呢间中式传统糖水店相信大家都唔陌生,必试有宁波姜汁汤丸、浓姜番薯糖水、芝麻糊同白果薏米腐竹糖水等。

图:soya1314piggy16


台湾妈妈主理 吃什麽


之前经营请坐嘅两位台湾妈妈,经过一番波折後,成功喺中环重新出发,开设吃什麽。食材同手法依然不变,肉松蛋饼嘅肉松同蛋皮都由台湾进口,仲有多款台式传统食物卤肉饭、咸酥鸡、卤味拼盘同牛肉面等,感受到浓浓嘅台湾味。


新上榜街头小食!


榴槤主题店 榴槤乐园


一年四季都供应嚟自马来西亚自置果园嘅榴槤,品种有猫山王、D24等,可以食到原个榴槤同多款榴槤甜品,如榴槤Bingo、榴槤芝士挞、榴槤芝士蛋糕同啖啖猫山王奶盖等。店主话希望呢度可以成为香港各位榴槤迷嘅乐园!



早餐之选 豆浆大王(新蒲岗)


招牌即叫即包粢饭,香软嘅糯米配埋自家制炸菜,仲有肉松同脆卜卜嘅油条,口感丰富。放入砂糖同油条嘅甜粢饭、咸豆浆同其他豆类制品都不可错过。

图:heiheimonaeatingtwins


独沽一味 苏记炖蛋


呢间专食炖蛋嘅小店,独沽一味只卖牛奶炖蛋白,口味都只系得一款,不过高峰期可以日卖300碗。舖头标榜每碗炖蛋白都系纯牛奶加蛋加糖去制作,完全冇加水,牛奶味同蛋味香浓。

图:冰粮派出所


无味精车仔面 蜜斗


呢间主打冇味精嘅车仔面店,开业短短8个月就极速上榜,除咗主打健康无味精外,招牌菜可以话系佢哋嘅酱汁,有石磨芝麻花生酱、四川麻辣酱、担担酱、XO酱等十几款酱汁,大部份都惹味香口。

图:ericjojo


豆制品专门店 公和荳品厂


公和系大家都好熟悉嘅豆制品专门店,呢间荳品厂日日都好多人专程去食佢嘅豆腐花同煎酿豆腐,仲会买佢嘅豆卜豆皮自己返去煮餸。而且重新装修後,都仲保持到过往水准。

图:adrianangKent-CEO


文:Yanica、Cathy

关键字
米芝莲
香港
2019
夺星餐厅
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
7天前
全城抗炎!北角酒店最新应变 自助餐都有得外卖?
2020-07-17
全城抗炎!屋企都叹到三层架下午茶 Tea Set外送/外卖自取推介
2020-07-23
全城抗炎!送上门懒人煮食包及套餐大合集2.0 花胶炖汤/火锅/铁板烧
7天前