金黄酥脆有蛋香嘅蛋卷系咪你嘅Favorite?香港蛋卷关注组集合咗唔少爱食蛋卷嘅网友,互相交流唔同蛋卷嘅特色,或者倾下点食最滋味等等。开饭仔就整理咗以下最多网友推介嘅品牌。
牛油味最香 德成号
北角驰名蛋卷店,有原味家乡鸡蛋卷、鲜牛油同鲜椰汁味,分别嘅蛋香、牛油香同椰汁香都够突出。大部分都会推介试鲜牛油味,蛋香加上牛油香加倍诱人。味道唔会过甜,三款口感亦够松化!留意返数量有限,建议朝早9点去到排队,9:30就会有员工截龙。每人只限买四细罐,而一大罐计两细罐。
售卖点:德成号北角门市
口感无得输 龙记
100%香港制造嘅蛋卷品牌,蛋卷呈蜂巢状,比较厚身而且咬落更有层次更松脆!有原味同咖啡味两款,咖啡味真系好有咖啡香,不过亦有网友指有少少燶味。 原味有蛋香而且甜度适中。包装有齐胶纸封条、泡泡纸同牛油纸,大部分蛋卷都Keep到完整唔会碎,值得加分。
售卖点:屯门龙记轩门市或周末市集(可留意品牌Facebook)
图: (右)Ritakitty
更多【开饭专题】: |
健康无添加 尊
同样100%香港制造,更标榜系无添加嘅蛋卷。原来因为创办人对添加剂敏感,所以就想做一款畀大家食得健康嘅蛋卷。蛋卷口感几脆,虽然有网民指唔够松化,不过睇返佢哋无用起酥油,所以偏实啲都可以理解。而且有牛油、金莎(咸蛋)、榴槤、抹茶,甚至中国芝士(腐乳)口味!
售卖点:大生生活超市、金田井駄菓子屋
老字号新包装 回味
传承旧品牌添宝嘅配方,采用新西兰牛油、每日农场直送鲜鸡蛋,以人手工艺制造嘅蜂巢蛋卷。最多人推介红色罐嘅特浓鸡蛋卷,有蛋香而且好松脆!白罐嘅特级牛油鸡蛋卷都有牛油香,略嫌绿色罐香浓椰汁鸡蛋卷嘅椰汁香比较淡。
售卖点:菁云、SOGO、一田、city'super、诚品书店、千色、HKTVmall等
图: 品牌Facebook
Bouns!澳门最香饼家
嗱呢间1958年开设嘅老字号位於澳门,但胜在可以喺网店订购然後速递到港。佢哋嘅长蛋卷口感偏厚实,带少少猪油香而且唔会太甜,反而系有少少咸味。不过其实饼店最驰名最多人买嘅系粒粒杏仁饼,里面有粒粒杏仁碎,杏仁香气浓郁,最重要嘅系够松化唔会硬到咬唔开!
网店:https://chuiheong.com/storefront
图:品牌网店
文: Cathy.H
相: Tom Li