穿梭巿区 寻访日本的味道
2020-12-07

相信好多朋友仔同开饭仔一样,已经好耐都冇去过日本喇,然後每日都好挂住日本嘅美食,呜……好彩香港都有好多日本料理,由日本入货,将食材运送过嚟。今次同大家介绍两间位於巿区嘅日本菜,交通便利,挂住日本嘅话,随时都可以去止一止个瘾先。

浪人日本料理(湾仔) 

位於湾仔嘅呢间日本料理,地方宽敞,价位喺同区嚟讲算系几抵食,而且做任食而冇设用餐时限,大家可以慢慢食唔使急住chur晒啲嘢落肚,系几吸引嘅。补充少少,呢度嘅任食系类似semi-buffet嘅形式,首先需要点选一款主菜,然後先可以享受喺纸仔度任剔任食多款日式美食,例如寿司、炸物、天妇罗、烧物、甜品等等。适逢餐厅开业六周年,由即日起至年底前,凡惠顾晚巿套餐(即半自助任食)全单都可以有85折。

炭烧日本水饲育猪鞍配柚子汁

晚巿套餐有牛、羊、猪、鸡嘅选择,其中呢道炭烧猪鞍都几有特色。只猪系喺日本由专人以谷物、粟米、日本米混合当地矿泉水打成嘅流质饲料饲养,饮嘅水都系矿泉水嚟,肉质较平时嘅猪松软腍身,冇咗阵猪羶味,仲好juicy添。由於用浓汁烹调嘅话,就会盖过咗原有嘅肉香,所以师傅特意选用酸咪咪嘅柚子汁去提味呢。

 


浪人特上刺身

晚巿套餐除咗有肉类选择之外,仲可以拣要刺身。而浪人特上刺身,就总共有八款,包括三文鱼、油甘鱼、带子、剑鱼腩、八爪鱼、北寄贝、牡丹虾同海胆。大部分都系由日本运送到香港,即使系任食但质素依然新鲜,牡丹虾鲜甜爽口。

 


寿司

任食落单纸上,有大约十款寿司选择,生嘅熟嘅都有啲。除咗有大部分港人最锺意嘅三文鱼同鳗鱼寿司之外,亦有蟹籽手卷同芥末八爪鱼手卷等。每晚都有师傅驻场手握,保证新鲜。

 


吉列‧扬物

炸物嘅选择则包括吉列广岛蚝、唐扬鸡软骨、唐扬鱿鱼圈、日式炸饺子、芝麻鸡翼、芝士忌廉虾同蟹肉忌廉饼。全部都炸到金黄色,香脆可口。其中,芝麻鸡翼系最受客人欢迎嘅,几乎枱枱都会点。鸡翼先沾上芝麻浆,再落锅炸,皮脆肉嫩。

 


烧物

烧物系任食中不能缺少嘅一环,餐厅采用易於保持恒温、火力平均嘅日本烧炉制作烧物,藉以增加效率,以应付排山倒海嘅落单。鸡翼控食完炸鸡翼都会想食埋烧鸡翼嘅,混入椒盐同蒜粉调味,阵阵咸香。一夜干(日本池鱼)亦相当惹味。另外,烧海虾、烧菠萝、烧茄子等同样都系留肚之选。

 


蔵鸢居酒屋(尖沙咀)  

漫行加拿芬道,会发现到有条楼梯通往地库,通往两间日本料理餐厅。一间系以Omakase为主嘅,另一间就系嚟紧同大家介绍嘅居酒屋。有吧枱,有卡座,几有气氛,仲要有个大鱼缸,内有多款即日运到嘅新鲜海产。餐牌选择多元化,由刺身、寿司、串烧、滨烧到丼饭都有供应。

KURA寿司

呢个寿司相当丰盛,以乌鱼子盒做器皿,舖满晒海胆、三文鱼子同吞拿鱼腩,面头再放上葱花同乌鱼子,卖相吸睛。选用北海道七星米,粒粒米粒又大又剔透。建议轻轻一匙哔晒所有食材落紫菜度享用,口感丰富。

 


鱼子酱海胆炸虾卷

除咗传统寿司同卷物,呢度亦有多款创作卷物,尝试唔同嘅组合配搭,带出更多层次嘅可能性。就好似呢个鱼子酱海胆炸虾卷咁,鱼子酱鲜香、海胆甘甜,然後炸虾香脆,一啖就食到几种味道同口感先後爆发,有够开心。

 


二人时令滨烧盛

海鲜控唔使谂,点选二人时令滨烧盛无误。一次过就可以食到多款时令海鲜,包括:虎虾、鲍鱼、生蚝、贵妃蚌、蛤、元贝同马刀贝,而且仲会有店员帮手烧,控制好火喉同时间,咁就唔使怕自己唔识烧而浪费咗啲海鲜啦。其中日本蚝肉肥美爽口,海水味重;鲍鱼亦够弹牙。加上三款官配酱汁:七味面豉、柚子胡椒同师傅自家调制嘅滨烧汁,更能提鲜。

 


鳕场蟹北海道牛乳锅

听闻今年冬天冻嘅时间会长咗,咁食返个热辣辣嘅汤锅暖身就最啱啦。呢个北海道牛乳锅,以北海道360牛乳混和师傅自家秘调嘅汤底熬制而成,奶香低调平衡,绝对唔会抢咗鳕场蟹嘅风头。鳕场蟹肉质饱满,鲜甜多汁。至於牛乳锅内则以蔬菜类为主要配料,索晒汤底嘅精华,甜甜der。

 


虾丼定食

刺身丼饭一向都好受港人欢迎,成碗舖满晒五花八门嘅刺身,又的确好吸引嘅。而呢度更有一个坊间好少见到嘅组合——由牡丹虾刺身、牡丹虾蓉同甜虾蓉组成嘅虾丼定食。名副其实嘅虾,全部都系虾!啖啖都系鲜甜嘅虾肉,虾迷梗要试。

心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异


关键字
大厨招牌菜
湾仔
尖沙咀
日本菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
1天前
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
1天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【最平$298最贵$938】佐敦新开日式和牛烧肉放题 独家引入鹿儿岛小田和牛
4天前