潮食亚洲风味 玩味概念餐饮体验
2021-01-07

亚洲菜一向不乏捧场客,而今次要介绍嘅两间餐厅,都系揉合地道传统同创新元素,食都食得有玩味,主力吸引後生仔巿场。

十三少酸菜鱼(香港仔大角咀) 

有别於一般嘅中菜馆或川菜餐厅,十三少酸菜鱼走得比较前,除咗邀请香港着名漫画家曹志豪为店舖设计主题卡通外,喺装修或餐具等设计方面亦充满玩味,融入年轻人嘅世界。例如,用花生做筷子托,仲会送上咖啡玉米豆做餐前小食。

十三少酸菜鱼

酸菜鱼当然系重头戏,分有普通版同劲量版,分别适合1-2人或3-4人享用,劲量版嗰款只碟仲有成18寸直径咁长,够晒气势!师傅选用新鲜鲈鱼,每日亲自去骨、起鱼片同处理,使用秘制材料腌味,更特别加入啤酒提鲜,又拌入蛋白,令到鱼肉啖啖都系咁滑口。汤底则用起片後嘅鲈鱼骨熬煮两个钟而成,仲加入十几种香料同辣椒一齐煮,又鲜又辣。就连酸菜亦有两种,四川正宗老坛酸菜同潮汕酸菜,一种酸一种爽脆,以增加口感。其余配料包括鲜菌、莴笋、泡姜、泡萝白片等,仲可以加宽粉,索晒汤底精华够晒入味。


川式口水鸡

川菜嘅辣香有多种唔同嘅变化,既有酸辣亦有麻辣,川式口水鸡就系麻辣喇,先麻後辣,啲辣系咬咗几啖之後慢慢、慢慢咁渗出嚟嘅,鸡肉嫩滑,愈食愈刺激。


十三少麻辣香锅 (香港仔店限定)

嗜辣嘅朋友仔仲可以挑战下麻辣香锅,师傅用咗成廿几款香料、6种酱料、3种辣椒同3种香油炒成,净系听到个调味已经想像到层次有几丰富,香浓惹味。锅内有田鸡、鲜虾、鸡软骨、午餐肉、莲藕、薯仔、莴笋、四季豆,全部都系最易索味嘅配搭。


辣子鸡软骨 (香港仔店限定)

另一样值得一试嘅系辣子鸡软骨,望落好大碟,实际上都好大碟。见到咁多辣椒就预告咗你听,呢碟非同小可,粒粒鸡软骨都好脆口,好重花椒味,比酸菜鱼更麻更辣。


红糖糍粑

饭後食甜品是常识吧,而食咗成餐辣嘢,最啱就系食返啲红糖糍粑解一解辣。以糯米自制,炸至外脆内软,再洒上一层黄豆粉,配埋秘制黑糖,烟烟韧韧又甜甜地,绝对系perfect ending。


泰.夯虾(尖沙咀) 

以前去泰国嗰阵,好多人都会特登搵间餐厅去食流水虾,贪得意又新鲜嘛。而家冇得飞,但香港都有得食到啊。呢间餐厅以为客人提供最新鲜的食材为宗旨,提供正宗泰国流水虾放题,有20米长嘅虾缸,可以即夹即烧。另外仲有好多其他海鲜选择。

盐烧泰国大头虾

大头虾主要生存喺淡水或淡海水水域,原産地为东南亚,含有丰富嘅镁质、蛋白同钙质,对保护心血管系统好有帮助。食客喺虾缸度夹咗啲新鲜生猛嘅大头虾上嚟之後,随即就可以烧嚟食。建议喺烧之前,沾一沾中粗盐,咁就可以带出到佢嘅咸香味。一路烧,啲虾黄仲会一路渗出嚟添。


A5宫崎和牛

牛魔王对於宫崎牛都趋之若鹜,冇计啦,呢只牛连续三届喺全日本嘅和牛赛到拎第一喎,肉质固然有保证。烧宫崎牛有少少技巧嘅,炉要用高温,喺炉上面翻几次,见到啲油份仲喺度跳跳下就得,千祈唔好烧太耐呀。烧完之後等完全静止10-15秒先至加少少盐就最香口喇。宫崎和牛口感紧致滑顺,霜降分布均匀,脂肪丰富,清爽而不腻。


湛江生蚝

生蚝系湛江最出名嘅海鲜之一,餐厅选用嘅生蚝,喺湛江无污染嘅原生态海域中生长,绝无人工投料养殖。只只都鲜嫩肥美,口感又爽又滑。烧生蚝其实唔难,先烧比较平坦嘅一面,几分钟後就翻转再烧。见到蚝壳微微开口之後,可以用夹打开,将有蚝肉嗰面再烧多几分钟就食得。沾埋餐厅自家制嘅泰式酸辣汁,一啖放入口,鲜味立即爆发出嚟。


美国顶级牛

餐厅挑选嘅呢款美国牛,只系食谷物玉米同营养素大,以圈养方式饲养,运动少,脂肪分布较平均。餐厅特意从中选出6个最适合烧烤嘅稀少部位,包括牛板腱、封门柳、牛五花、肩胛翼板、肩胛三角肥牛同降霜一口牛,以高温烧嘅方式快速控制佢哋嘅熟成度,外层会有少少起焦嘅香味,内里肉质依然幼嫩,肉味香浓。


泰国正宗船面

泰国船面源自泰国水上市场,系一款好地道嘅泰式美食。餐厅以大量芫荽、玉桂、八角、胡椒、香茅、猪骨同猪红熬制汤底,色泽深沉。加入猪肉片、泰国猪肉丸、泰国牛丸同各款菜类等配料,连埋多种泰式香料,层次变化丰富。金边粉仲可以索晒汤汁嘅精华,啖啖浓香。


心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异




关键字
尖沙咀
大角咀
香港仔
大厨招牌菜
泰国菜
四川菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
1天前
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
1天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【最平$298最贵$938】佐敦新开日式和牛烧肉放题 独家引入鹿儿岛小田和牛
4天前