潮食中菜 味蕾大满足
2021-03-23

中菜文化博大精深,各派各系都有唔同嘅特色,好似川菜咁就多以麻辣鲜香为主,而潮州菜嘅烹调方式则多变,重视工序同选材。今次就为大家介绍两间自家风格突出嘅川、潮餐厅,品嚐坊间少见嘅味道。

红堂   (铜锣湾)  

装修型格,红黑主题,红堂有别於一般嘅火锅店设计,环境舒服乾爽。餐牌上嘅食物亦见心思,有好多都系要手工制,或者经过师傅精心创作而成,唔系坊间一般食开嘅配料。最近逢星期一至四晚,更有单点啤酒买一送一优惠添,无论系生啤定樽装啤酒都得。

和牛牛油麻辣锅

汤底可以话系一个火锅嘅灵魂所在,特别推介招牌和牛牛油麻辣锅,个麻辣胆系师傅自己炒架,用咗5至7种辣椒、廿种以上嘅香料制作,辣劲平衡得宜,唔会一味死辣,仲有阵阵麻香同沙嗲香。要特别提下嚿牛油,系加入咗和牛牛油,慢慢溶喺汤中,增加香气之余亦令汤底变得更滑口。火锅本身分咗九宫格,每格受热程度唔同,方便大家渌唔同嘅嘢食,唔怕渌完捞唔返又唔怕渌过龙。


shake shake 炸酥肉

等紧个边炉滚嗰阵,可以食住啲小食先呀。炸酥肉系四川好兴嘅小食嚟,酥脆香口。餐厅特选西班牙伊比利猪腩肉,炸完都唔太多油,肉质松化。本身嘅胡椒味都几香嘅,但想再惹味啲,可以可以自行加入花椒粉同指天椒粉,用shake shake袋shake匀,增加麻辣感。


蒜泥白肉水晶包+芝士牛肉棋子

呢两道配菜上枱时,都会有烟雾效果,要打卡嘅话就早啲准备定手机啊。蒜泥白肉本身系经典川菜,师傅就花咗啲心思将佢转化做水晶包馅料,同样都系选用伊比利猪肉,渌熟後水晶包晶莹剔透,蒜味重而微辣,几有新鲜感;芝士牛肉棋子则酿入咗芝士馅,一咬就会有澎湃嘅芝士涌出嚟,咸香层次分明,btw睇热啊记住。


虾佬sushi

骤眼望真心会以为系虾寿司啊,造型像真度极高,但千其唔好一啖就摆咗入口呀,似咋,但唔系寿司嚟架。虾佬sushi其实系海虾加自家手打鲜虾滑嚟,仲加咗mozzarella芝士落去,别有一番风味。


拔丝糍粑炸弹

红糖糍粑亦系四川名物之一,师傅发挥创意,将糍粑做到好似蒲公英嘅造型,以拔丝绕住糍粑,面层仲加咗啲士多啤梨爆炸糖,又靓又过瘾,口感烟韧,一路咬又一路有啲甜脆喺度跳跳下。每客炸弹都系新鲜即制,要两个师傅一齐做,一齐拉先得,好考功夫。


囍玥潮州酒家 (尖沙咀)  

潮州菜既考究功夫,亦讲究选料,呢间位於尖沙咀嘅餐厅,就无惧繁复嘅工序,提供正宗潮州菜,仲设有VIP房,无论同屋企人定系朋友,想有个私人空间嘅,记得要提早预订。

潮州咸鸡

潮州咸鸡肉嫩、鲜滑,淡淡咸香,难得脂肪唔多,可以连埋爽滑嘅鸡皮一齐食。师傅特意选用大约两斤重嘅新鲜元朗走地鸡,先用盐腌半个钟,等到入味後再蒸到啱啱熟,时间控制就系最大嘅功夫。正宗食法介绍返,唔需要点任何豉油或者姜葱,咁先可以食到最原始嘅鸡肉原味啊。


特式卤水拼盆

锺意食香口卤水嘢嘅朋友,呢个拼盆啱晒,大大盆,一盆有晒鹅肠、鹅肝、鹅肉同鹅片。卤水胆陈年得愈来就愈香,而餐厅用紧嘅卤水胆就已经有成8年历史喇,以桂皮、八角等十几种材料制成,啲鹅肠鹅肝索晒啲汁相当入味,鹅肉(鹅背肉)口感油润软滑。


反沙芋

要数潮州经典嘅甜品,一定有反沙芋份,不过而家唔系太多地方可以食得到,因为功夫太繁复喇。餐厅选用口感比较粉糯嘅泰国芋头,先走油,再加砂糖糖水同埋少少葱油炒香,令全条芋头都被糖包围住,最後加埋黑白芝麻增香,食落外层酥脆,内层粉糯,好易食唔停口。


心形糖醋面

食潮州菜梗系要食埋糖醋面啦,仲要切开细细块,点埋砂糖同镇江醋一齐食先至够正宗,味道酸酸甜甜,外面嗰层脆口带焦香,入面嘅面条仲系好软嫩,口感同味道嘅层次都好丰富。呢度嘅糖醋面仲整到成个心形咁上碟,颇有心思。师傅选用潮州伊面,先走油,以上汤慢火炆至收汁,最後煎香。


潮州翅

上汤以老鸡、唐排、火腿等熬制6至7个钟嘅潮州翅,浓稠入味,翅针细滑。师傅教落,正宗潮州食法系会加埋少少醋同芫荽一齐食架。


心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异



关键字
大厨招牌菜
川菜
潮州菜
尖沙咀
铜锣湾
火锅
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
2天前
【2021生日优惠】持续更新!6月寿星送海鲜拼盘
2021-06-01
$208起烧肉放题 空运「一头买」佐贺和牛 荃湾新开日式烧肉店
2021-05-20
《优秀开饭热店大赏2021》赛果公布
2021-05-24
5月份好评餐厅十强
2021-06-04