母女档新开贵族茶室 主打正宗英式三层架下午茶+手工蛋糕 (有片)
2019-04-01

各位ladies,如果同姊妹、闰蜜去下午茶聚已经成为生活日常嘅话,咁呢间喺尖沙咀新开嘅茶室你哋一定要知啦,主打正宗英式下午茶,三层架嗰只呢,仲要一入到去成间店嘅装修都好鬼高贵好鬼靓,超多打卡位!

水晶吊灯、复古家具、光猛纯白主调……好似去咗转英国,真系做咗贵族一样。喺呢个咁好气氛嘅环境下食个tea,都零舍优雅同有气派。而呢间餐厅原来系由一对母女合作经营,妈妈Vicky系系做蛋糕高手,而女女Katrina则协助营运工作。

「我好细个都已经开始好锺意做蛋糕,(开店)呢个都系我梦想嚟。」Vicky做咗18年蛋糕,今日终於梦想成真。佢最初只系喺图书馆借啲曲奇、烘焙嘅书返嚟自己跟住整,後嚟就不停跟唔同师傅去学做蛋糕。「每个师傅如果做同一样嘢做30年,其实佢未必有太多经验去话畀你听点样系好同唔好,但如果我学10个至30个,我就可以知道晒人哋当中有好多好同唔好嘅嘢,我再将佢集合咗,就有自己嘅方法。」所以,Vicky手下嘅每款蛋糕,都可以话系集各家之大成!

英式三层点心架下午茶系茶室嘅皇牌菜式,由最底层嘅咸点食起,分别有蜜瓜帕马火腿、迷你小牛汉堡同香煎蟹肉饼。

然後系第二层富有果香嘅甜点,包括草莓挞、意式奶冻同软心朱古力挞,前两者都比轻身,而朱古力挞就好甜咯,甜魔会锺意。

而最顶层就有招牌伯爵茶戚风蛋糕、歌剧院蛋糕同拿破仑,拿破仑好够酥脆啊,招牌伯爵茶戚风蛋糕以澳洲乳酪,茶味浓香之余口感亦相当轻盈软熟。

另外仲有蛋香味十足嘅焦糖炖蛋同带有微温而外脆内软嘅英式松饼配玫瑰红桑子,非常丰富,全部都系每日新鲜制造,记得要预留定多啲quota去食呢个tea set啊。

如果食完个tea觉得啲蛋糕太细件,得一两啖仔唔够喉,呢度其实都有全个蛋糕可以买走呀。焦糖海盐伯爵茶戚风蛋糕,以手工制造,采用天然成分,冇任何添加剂。配上研制多年嘅海盐焦糖酱做夹心、外层嘅焦糖酱则混合咗法国优质半甜鲜忌廉,令到整体味道咸甜交替、口感软滑,并渗有烟燻味同醇厚茶香。

送畀特别嘅人就要送特别嘅蛋糕,伯爵茶戚风蛋糕仲有特别版!一朵朵金黄色玫瑰唧花相当细致,再加入白珍珠造型朱古力同金箔,感觉好elegant。

呢度对於茶叶亦同样讲究,选用传统英国皇室御用品牌Fortnum & Mason。四款经典选择包括辛香嘅伯爵茶、渗出天然果香嘅蜜桃茶、甘醇嘅锡兰茶,同埋混合少量乾燥玫瑰嘅玫瑰包种茶。


Victorian Rose Tea Room
地址:尖沙咀山林道38号银座38 17楼


文:Kar
相、片:Tom Li


关键字
尖沙咀
下午茶
甜品
蛋糕
打卡
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
7天前
悠闲时光 9月份下午茶推介
2020-09-02
【2020中秋】台式流心奶皇、电车限量版月饼 早鸟优惠及限量预购精选集合 (不断更新)
2020-08-20
和牛及海胆主题菜单 尖沙咀西京烧専门店夏日新菜式
2020-09-02
饮得嘅抹茶富士山!日式茶室旺角重开 必试抹茶系列、焦糖布甸拿铁
2020-09-10