无需出国 地道亚洲风味饮食之旅
2020-03-26

香港素来集多国美食於一身,无需机票无需出国,亦可以喺呢片土地内食尽环球佳肴。今次要同大家介绍嘅两间餐厅,一间泰菜一间台菜,大厨都系当地人,煮出嚟食物,自然就更有当地风味!

SAYAM Thai/Bar(铜锣湾)

装修雅致,空间感大,呢间主打地道泰菜嘅餐厅,由泰国厨师班底主理,由串烧、烧烤到咖喱、海鲜等款式一律都有,仲设有酒吧,红、白酒、啤酒同鸡尾酒等都有供应,泰chill了吧?

柚子沙律

先嚟开胃沙律,柚肉嘅份量一啲都唔吝啬啊。酸酸甜甜嘅柚子肉上,仲有只鲜甜爽脆嘅大虾,配埋脆口嘅腰果,口感丰富。


烧鱿鱼

原条新鲜鱿鱼上碟当然特别吸引,而且仲暗藏咗师傅唔少心机呢,啲酱料系师傅自家调制㗎!混入泰国多款香草、班兰叶等,食落香料味浓郁,微辣中更能带出鱿鱼嘅鲜香。


椰青鸡汤

椰青鸡汤系差唔多每枱都必点嘅菜式,以老鸡熬嘅汤底,加埋原个新鲜椰青水、青柠、芫荽籽等一齐煲煮,椰奶香味十足,清甜中又带有微辣同微酸,好多层次,仲有好多鸡肉食添。


慢煮羊膝

潮流兴慢煮,呢道羊膝要以摄氏65度慢煮成15个钟咁耐㗎,然後再炆一炆,咁先至可以食到又软腍又多汁嘅羊膝肉。以红咖喱、肉桂心、花椒八角等煮成嘅酱汁辛中带甜,点完羊膝仲好啱用嚟送饭!


泰式烧鸡

即叫即烧嘅泰式烧鸡特别香口,师傅特地选用约2斤重嘅龙岗鸡,以椰汁腌制,慢焗完再烧香,锁紧晒啲肉汁。仲喺面层搽上泰式风味烧烤酱。难怪烧鸡可以保持外脆内嫩嘅口感,辣辣地嘅酱汁酸酸甜甜,份外有泰国风味。


等等HEA (九龙城) 

泰国菜唔系九龙城嘅专利,而入到九龙城都唔一定净得泰菜选择嘅。呢间风格现代化,挂满霓虹灯字句嘅台湾菜餐厅,绝对值得一试。早午晚餐下午茶都有唔同嘅菜式供应,无论系小食、主食定甜品都有,连烧肉都有呢!

台式烧肉

好多人都锺意自己烧肉自己烧,呢度绝对可以畀大家发挥厨艺小宇宙,识自转嘅光波炉端烧,少油烟之余,啲肉仲冇咁易燶,叫返个牛肉拼盘或海鲜拼盘就啱晒!一个牛肉拼盘有4个部位,包括牛舌、牛肩、牛小排同牛胸腹,每款肉嘅肉味同肉质都有分别,有啲肉香浓啲,有啲肉汁多啲……点都满足到牛魔王。


等一个人可颂

呢个可颂个名好浪漫,查实即系法国火腿牛角包配黑松露炒蛋。超大份馅啊,大份到一个酥脆嘅牛角包都夹唔得晒,睇住啲馅就快要漏出嚟咁嘅状态,加埋阵阵扑鼻嘅松露香,好诱人。食一份做早餐,即刻有个good morning!


台式红烧牛肉面

牛肉面可以话系台湾菜嘅一大特色,汤底以牛骨,加埋萝卜、白胡椒等熬足6个钟,肉味香浓之余仲好清甜,饮多几啖都唔怕咸。牛肉煮得软腍,又够入味。至於面底,想要索多少少汤嘅话,可以拣刀削面,韧度适中。


蚵仔卤肉饭

食台菜嘅话,点少得蚵仔同卤肉饭?呢碗将两大台湾美食合二为一,啲蚵仔堆到成座小山丘咁嘅蚵仔卤肉饭,净系卖相已经抢得唔少眼球目光同分数,再望真啲,蚵仔有啲系原味,有啲系酥炸,一菜两食,味道多变,入口满满鲜香,好惹味。每日限量30碗咋。


金牌台湾啤酒蟹

酒迷应该对呢只蟹几有兴趣,系餐厅嘅得意招牌菜式,加入啤酒煮嘅新鲜蟹,肉质弹牙,酒香渗晒入啲蟹肉到,但又唔会抢去原有嘅鲜甜味,层次变得更丰富。


心动不如行动!有兴趣就快啲约埋三五知己去叹下美食!快啲bookmark定啦!

*以上图片只供参考,所有食品以实物为准. 食品供应因餐厅而异



关键字
铜锣湾
九龙城
台湾菜
泰国菜
大厨招牌菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
2天前
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08