新加坡海南鸡饭始祖 进驻尖咀新商场 香港限定美禄雪花冰甜品 (有片)
2019-08-30

夸张啲讲句,话文华酒店嘅海南鸡饭系新加坡嘅国菜都冇讲错,自1971年起就一直吸引各地旅客慕名去食,相信唔少香港人亦都试过。嚟紧,大家唔使搭飞机都食到啦,呢间鼎鼎大名嘅海南鸡饭始祖餐厅,要进军海外巿场,仲拣咗香港做首站添!下星期五就会喺尖东新场K11 MUSEA度试业啦。

招牌主打毫无悬念,一定系文华海南鸡饭啦!鸡肉慢煮50分钟,肉质鲜嫩滑溜,仲要系无骨添,啖啖肉好鬼爽。由鸡汤同鸡油烹煮而成嘅饭,粒粒分明仲有少少咸咸地,点埋特制鸡饭酱油,加多啲啲姜蓉同辣椒酱,就好似飞咗去新加坡一样。

每个地方嘅肉骨茶都有啲唔同,马来西亚嘅药材味重啲,而新加坡嘅就会胡椒味出啲,而嚟到香港,师傅亦特别为香港人重新调配过各项食材嘅比例,两者味道变得平均、相若。以猪骨、胡椒粒、蒜头熬制嘅白胡椒肉骨茶配白饭,味道香浓而辣度适中。

新加坡美食点少得喇沙?餐厅除咗有食开嘅喇沙外,仲有乾炒喇沙,够晒特别!招牌珍宝带子喇沙嘅带子大大粒又鲜爽,汤底富椰奶香味,仲有丝丝菇条同面条一齐食到,口感丰富。而乾炒喇沙意粉配猪扒亦以椰奶、喇沙酱配搭成独特酱料,香口惹味。

面食以外仲有唔少小食选择,心大心细选择困难症发作时,咩都唔好谂,叫呢碟咸蛋鸡翼就啱喇。外皮香脆,阵阵咸香就梗喇,仲有啲咖喱香同微辣添,原来系用咗咖喱粉腌制呀只鸡翼。

传统甜虾酱蔬果花生沙律(rojak)亦有别於一般嘅沙律,一粒粒嘅有沙葛、青瓜、蕃石榴等全部都系好爽口嘅蔬果,食落sharp sharp声,拌匀特调嘅虾酱,甜甜der。

好似食咗好多嘢,但又硬系争紧啲嘢咁?梗系啦甜品都未出场!呢个超吸睛又巨型嘅珍宝美禄雪花冰配意大利芝士蛋糕,系香港限定嘅款式嚟。大份到就算两个人都应该未必得食晒!唔好以为净系得面层见到嘅美禄波波同士多啤梨,以为哔几下刨冰就搞掂。少年你太年轻,喺劲香美禄味而又轻盈嘅刨冰中心,收埋咗件超浓香嘅意大利芝士蛋糕啊!整到成座雪山咁高系有原因㗎~~ 

而招牌椰子雪糕同样打卡able,椰壳内放入坚有椰子果肉嘅椰子雪糕,再插埋红毛丹、放上核桃等,好清甜。食晒啲雪糕之後记得唔好嘥,要哔埋啲椰青出嚟食呀!

 冻美禄恐龙、凉粉豆浆


Chatterbox Café
地址:尖沙咀梳士巴利道18号Victoria Dockside K11 Musea B1楼B110号舖
预计试业日期:9月6日

文:Kar
相、片:Tom Li


关键字
尖沙咀
尖东
K11MUSEA
过江龙
新加坡菜
海南鸡饭
新店预告
走在最前线,为大家搜罗及报道有关即将开张的话题新餐厅资讯。
餐厅资料
本月热门
【随时更新】零食速报 每周新款零食、酒品点评
4天前
【特约分享】超抵外卖陪你抗疫 即睇将军澳饮食地图!
2020-03-10
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
2月份好评餐厅十强
2020-03-05
【3月生日】优惠情报!有折扣仲有生蚝送
2020-03-03