就嚟又到農曆新年啦，呢個節日唔少得嘅係去拜訪下親朋戚友，順便逗利是嘛。不過上去人哋屋企無理由兩手空空嘅，想揀個特別啲嘅賀年禮盒？咁就要睇下呢篇介紹啦。
金魚形蘋果羊羹禮盒 city’super
呢一款禮盒送畀鍾意日本嘅朋友仔就啱啦，包裝靈感來自青森睡魔祭嘅傳統金魚燈籠，再加上日本摺紙元素，感覺好日系。而羊羹就係用青森蘋果製成，味道天然香甜。
法式手工曲奇禮盒 PAUL LAFAYET
呢個禮盒包裝以春暖花開為主題，賣相優雅。一盒四十八件共有五款口味，分別係川香胡椒、醇香抹茶、經典牛油、焙香芝麻同燕麥葡萄。開飯仔就最鍾意川香胡椒，帶微辣但又唔會嗆喉。而燕麥葡萄就有粒粒提子乾，好有咬口。
手製朱古力 VERO
當然唔少得大人小朋友都鍾意嘅朱古力。年年有餘禮盒入面有6件錦鯉形狀嘅手繪白朱古力，同16塊70%黑朱古力。造型精緻。而另一款禮盒裡面就有各式乾果同果仁，外層覆上黑朱古力，用嚟放全盒都唔錯。
蒸蒸日上馬福龍 Choco Lab
呢款禮盒造型好盞鬼，以蒸籠裝著印有「福」字嘅焦糖味馬卡龍同紅莓味馬卡龍，中西合璧，又幾創新喎。 蒸籠寓意蒸蒸日上，送畀做生意嘅朋友就夠晒好意頭。
精選甜點禮盒 星巴克
呢款禮盒有三款小食，分別係特濃咖啡果仁曲奇、楓糖蝴蝶酥同海鹽焦糖蛋卷。特濃咖啡果仁曲奇食落好香，粒粒果仁令口感更豐富。而楓糖蝴蝶酥同海鹽焦糖蛋卷就好酥脆，味道香甜。禮盒包裝以紅黑色為主調，低調得嚟又帶點型格。
五彩幸運彩虹糖 Skittles
呢隻牌子嘅彩虹糖平時就食得多，不過佢新出嘅五彩幸運口味就夠晒應節。五款全新口味包括綠豆、蜜瓜、芋頭、荔枝同桔子。包裝上仲印有唔同嘅祝賀語，好似「笑JOKE成世」同「GO!別單身」等，玩味十足。喺2月23日前，於指定商戶以單一收據購買任何彩虹糖或瑞士糖產品滿$288，仲可以加錢換一副麻雀添，啱晒新年同親朋戚友大戰四方城，不過數量有限，換晒就冇！
文：Crystal