对於戒牛人士嚟讲,好多时都食唔到越南河,因为正宗嘅越南河汤底系用牛骨牛腩等材料煲成。尖沙咀呢间越港式餐厅,主打嘅就系一款无牛成份嘅越南河,老板Jacky用其他材料,成功煲出一款无牛、但味道同正宗越南汤底相似嘅无牛越南河!就算戒牛人士都可以一嚐正宗越南pho嘅滋味!
老板Jacky话,佢有呢个idea系因为太太阿Ling就系其中一位好锺意越南汤河嘅戒牛人士,太太一直都好挂住越南汤河嘅味道,自己曾经尝试过用鸡及其他肉类去煮,但可惜味道完全唔同。所以老公Jacky就邀请其越南厨师朋友研究,佢相信除咗太太,一定仲有好多戒牛人士锺意越南汤河。经过多番尝试,终於用超过20款材料调较出近似牛汤但又唔系牛汤嘅越南河粉!
鸡丝扎肉河汤底用上多款药材,如小皮、八角、花椒丶香叶、胡椒粒、黑椒粒及姜等,再加上猪骨、鸡骨及金华火腿,汤底补而不燥,润而不腻。虽然比牛骨汤清淡,但戒牛人士绝对搵得返回忆中嘅味道。
最特别系餐厅虽然主打越南菜,但竟然有烧味食,而且仲要系每日即烧㗎!即烧烧味同区嚟讲真系比较少见,而且价钱合理。烧鹅皮脆肉香,叉烧亦肥瘦均匀,有阵阵蜜汁香。
媚公河大头虾选用新鲜大头虾,沿用法式制法,先炒香啲蒜蓉,加入牛油,大头虾新鲜弹牙,好惹味。
咖哩亦系老板拿手菜式之一,咖哩香而不辣,牛腩炆约3-4小时,软腍而唔痴牙,牛筋部位亦腍而有咬口。
地址: 尖沙咀汉口道38-40号汉兴大厦地下C,D及E号舖
文、相、片: Yanica