必试稀有鸟取A4和牛+清酒自动售卖机 尖沙咀新开日式烧肉店
2020-09-22

锺意食烧肉嘅朋友有口福啦!尖沙咀呢间新店主打日式烧肉,新开即推出期间限定嘅鸟取县和牛Menu,畀大家唔使飞都叹到全日本只得1%嘅优质和牛。最重要系有专人烧肉服务,每块都帮你烧得啱啱好。仲有部自助清酒售卖机,用手机Scan QR code就可以拣心水清酒,配烧肉一流呀。
 


烧肉臻位於尖沙咀宝勒巷,特色之一系有专人帮可以大家烧肉,唔使再怕自己烧得太生或者太熟,每块高级肉类都会按建议顺序烧至理想熟度。餐厅亦设有熟成柜,供应低温熟成牛肉。不过新张期间最推介嘅,就系期间限定嘅鸟取和牛!
 

期间限定鸟取和牛


鸟取牛A4牛三角($288/100g)

鸟取和牛有咩咁架势?一方面因为鸟取县从江户时代就作为和牛产地,但养嘅和牛只占日本全国嘅1%,每年输入香港嘅都唔过10只!另一方面系鸟取和牛嘅脂肪含有大量油酸,令肉质柔软而且入口即溶。
 


牛三角系牛肋当中嘅顶级部位,一只牛先得两块,特色系油花细密、分布平均。烧过後唔单止带出油香,食落更有牛脂嘅甘甜!肉质柔嫩多汁,一试难忘。
 


鸟取牛A4牛胸腩($268/100g)

牛胸腩相对起牛三角会有更多肌肉,所以口感会比较结实,加上充沛油花,喺口腔当中油香会越咬越香!牛肉香味亦更为浓郁。
 

全港首部清酒自动售卖机


清酒自动售卖机起源於新泻县,当地就入硬币方便随时饮,而喺香港就有公司研发出呢部用手机QR Code嘅清酒自动售卖机啦。全港第一部而家就放咗喺烧肉臻,用法都好简单,用手机Scan QR Code去到SAKE Z网上系统,然後买代币券($100/10个代币),准备好酒杯再喺部机前面Scan多次买咗嘅代币券QR Code就得啦。每杯系30mL,畀大家可以试多几款。
 


镜山 千秋龙脉(5个代币/30mL)

清酒自动售卖机有成18款嚟自日本唔同地方嘅清酒,可以喺自动售卖机睇到精米步合、酒精浓度等基本资料,亦可以喺SAKE Z网上系统搵到详细介绍。当中比较特别嘅有嚟自滋贺县嘅镜山 千秋龙脉,属於无滤过嘅生原酒,味道爽朗淡丽,带类似青苹果嘅微酸,相当清新。

如果想配搭烧肉、特别系和牛嘅清酒,就推介试京姬 匠 纯米大吟醸(3个代币/30mL)同六十余州 雄町(3个代币/30mL),两款都系比较Dry嘅清酒,可以中和烧肉嘅油腻感。而如果系平时比较少饮清酒嘅女士初入门,可以选择加茂锦 纯米大吟醸(4个代币/30mL)或者东洋美人 醇道一途(4个代币/30mL),都系带优雅果香同米香。
 

更多【新店直击】:
1. 中环天妇罗名店北角开设副线 $68入门版天丼+$108原只软壳蟹天妇罗丼饭
2. 创意中菜!铜锣湾新开摩登粤菜馆 秘制素叉烧、牛油果川味辣子鸡
3. 爆笑潮语餸名 尖沙咀新创意Fusion菜馆 庆生必点扑朱古力寿桃

 
招牌烧肉推介


牛肉盛合($330)

牛魔王必点!由餐厅精选挑选出七个最受欢迎又适合烧嘅部位:鹿儿岛和牛(牛三角胸小排、牛背峰、牛板腱、牛腩肉)、美国安格斯牛(牛翼板)、荷兰牛肝,同厚切牛舌。当中最特别嘅系坊间少见嘅牛背峰,雪花纹理丰富,口感细腻柔软。锺意有咬口就要食牛三角胸小排,因为同筋膜相连,烧脆之後可以同时食到软嫩同烟韧两种口感。
 


蒜香牛腱薄烧($48)

另一推介系牛腱,肉质比较结实所以有嚼劲,配搭香味浓郁嘅蒜蓉带出肉汁香气。重口味人士必点。
 


鸡肉盛合($148)

鸡肉同样有五款精选部位:日本德岛阿波尾鸡(柚子鸡腿、鸡肾、鸡心)、日本一夜干鸡翼,同鸡胸软骨。柚子鸡腿用日本柚子汁加韩国柚子酱腌至入味,味道酸甜肉质弹牙。一夜干鸡翼即系将鸡翼洒上调味料後风乾一日,可以令鸡肉更结实,皮脆肉嫩又带咸香,最啱送啤酒!
 


炭火鸡($98)

日本产炭火鸡选用鸡髀肉,先以炭火汁腌过,再用真·炭火烧香,所以上枱就闻到炭火烟燻风味。虽然黑黑哋色但食落肉质滑溜软嫩又多汁,鸡不可貌相呀。
 


豚肉盛合($198)

猪肉盛合全部取自新鲜猪只,再经过处理,就算连内脏都唔会有任何异味。精选部位包括:伊比利亚猪肋条、明太子紫苏豚肉卷、猪大肠、猪心、猪脷。伊比利亚猪系西班牙独有嘅黑毛猪,猪肋条油花均衡,嫩滑得嚟厚实有嚼劲。
 


伊比利亚梅头($78)

梅头系猪嘅上肩肉,雪花纹理明显、油花丰富最啱烧烤!而且因为无肉筋、纤维细致,所以肉质非常软腍,烧过後更加系入口即溶呀。
 




烧肉臻
地址:尖沙咀宝勒巷3-7A号万事昌大厦1楼102号舖




文:Cathy
相、片:Tom Li

关键字
尖沙咀
烧肉
鸟取和牛
清酒
炭火鸡
烧肉臻
新店直击
走在最前线,为大家搜罗及报道有关新开餐厅的资讯。
餐厅资料
本月热门
情人节爱意满泻 甜蜜蜜堂食/外卖下午茶推介
2021-02-01
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
1月份好评餐厅十强
2021-02-09
食肉兽必收藏!牛年到 五间品牛餐厅介绍返
2021-02-11