尖东酒店自助餐 龙虾面包蟹焗蚝大晒冷!
2018-04-25

真心讲句,即使各大酒店自助餐有咩新主题,最受食客们欢迎嘅始终都系海鲜、海鲜同海鲜。既然系咁,尖东呢间酒店自助餐就同你嚟个海鲜大晒冷,除咗有龙虾面包蟹蟹脚大虾等冰冻海鲜之外,连热盘、串烧、汤水样样都海鲜出场,等你哋班自称好擦得、好锺意海鲜嘅buffet迷都投晒降,捧腹离场!

唔讲废话,首先即刻介绍一下各位必食嘅冰冻海鲜吧,海鲜款式有7-8款,包括:波士顿龙虾、加拿大长蟹脚、法式面包蟹、蟹钳等,(左)蟹钳被餐厅预自处理,食起来非常方便,啱晒一众又懒又想食海鲜嘅各位;而蟹脚亦见粗身,蟹肉都几多!(右)波士顿龙虾可算系最受欢迎嘅冻海鲜,采访当晚,开饭仔眼见厨师一refill,龙虾迅速被夹走,好在厨师们都密密refill,各位唔使担心。

另有蚬、虾、青口及翡翠螺,旁边除咗有柠檬,酱汁亦设6-7款,好多选择!


除咗冰冻海鲜,餐厅更设日式炉端烧,由师傅不断即席烧制各位串物,包括虾串、菠萝、匈牙利鬈毛猪肉肠、番薯、南瓜、牛舌、车厘茄、粟米、茄子。开饭仔推介 (左)匈牙利鬈毛猪肉肠,卖相虽然无普通肠仔无异,不过呢款猪肉肠系由纯皇鬈毛猪肉及天然肠衣制成,猪肉好有油香,肉味亦够浓;而即烧即食嘅(右)鸡软骨、虾串味道亦见鲜美。

相比起刺身,寿司款式较有惊喜。杂锦烧寿司有3-4款火灸寿司如灸烧三文鱼寿司畀客人拣;至於刺身寿司,有三文鱼、八爪鱼、油甘鱼等5-6款常见选择。

呢款越式粟米片炒蟹听落几盏鬼,但微甜嘅粟米片可增添炒蟹味道及口感,蟹肉更为惹味。

洋葱烟肉焗蚝调味不多,蚝肉都几大粒,而且依然juicy,配埋有咬口嘅烟肉,口感不俗。

爽口嘅田螺,加埋软腍腍嘅薯蓉,呢道法式焗田螺无得输!


嫩滑嘅(左)泰式焗青斑吸收多款香料嘅味道,香味十足;(右)椒盐虾唔使多介绍,相信系各位必爱嘅菜式。

西班牙海鲜炒饭以青口、蚬、虾等海鲜煮成,米饭尽吸海鲜嘅鲜味,食落更为鲜甜。

汤水都用海鲜熬煮而成,采访当晚有带子海鲜周打汤、炖螺头汤。

除咗海鲜,餐厅新增即制澳洲蓝蟹鸭肝大阪烧,入面有椰菜、洋葱、木鱼丝、紫菜丝等配料,并以照烧汁、沙律酱作调味,好滋味。而且分量细细件,食完都仲有大把quota可以食到其他食物。

肉食方面有即切烧美国特级肉眼,牛味浓郁,另有烧汁、黑椒汁等酱汁选择。


除咗牛肉之外,仲新增香草烧全羊,厨师喺客人面前即切出片片羊肉,羶味都几浓。

至於甜品,餐厅新增几款芒果甜品以及卖相好靓嘅法式甜品,数埋都有10几款选择架!雪糕则采用Häagen-Dazs,有呍呢嗱、咖啡、士多啤梨、tiramisu、蓝莓及曲奇呍呢嗱6款口味,可单食或配以即制法式crepe同食架!

最为eye-catching嘅,当然系呢个以糖丝包围住嘅(左)泡芙山,每粒泡芙都细细粒,入面仲有香甜吉士,好甜。仲有呢个充满蛋香嘅(右)焦糖炖蛋,甜度亦都调得啱啱好。

而(左)朱古力歌剧院蛋糕采用嘅朱古力好幼滑,食完都不太感腻;呢款(右)法式柠檬挞卖相睇落以为好甜,食到柠檬挞时口感顿时好fresh,正!

呢个用菲律宾吕宋芒做成嘅(左)芒果肠粉,既香甜又够滑;而(右)芒果紫糯米好有泰国风味。

每位客人可凭券换领法式酿面包蟹盖配鳟鱼籽,面包蟹盖中酿咗鲜甜蓝蟹肉、薯蓉、杂菜等,面层再有大大粒又bling bling嘅三文鱼籽,分量十足,一定要记得换呀!


自助餐餐厅设於酒店中庭,感觉似置身於後花园般舒适,今晚仲会有live music performance,情侣或夫妻去食都几romantic架!



「海洋奇缘」海鲜自助晚餐
供应日期:即日起至5月31日
供应时间:(星期日至四、公众假期)6:30pm-10pm、(星期五、六及公众假期前夕)6:30pm-9:45pm
价钱:(星期一至四)成人$598/位、小童$468/位;(星期五至日、公众假期及前夕)成人$678/位、小童$508/位
注:另设加一


雅苑座
地址:尖沙咀麽地道69号帝苑酒店3楼


文:Joy

关键字
自助餐
龙虾
海鲜
酒店自助餐
尖沙咀
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】零食速报 每周新款零食、酒品点评
5天前
【随时更新】最後倒数!即将结业的老字号及人气小店
7天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【特约分享】超抵外卖陪你抗疫 即睇将军澳饮食地图!
2020-03-10
【随时更新】全城抗炎!多间集团餐厅及老字号宣布 暂停晚巿或休业 (内附名单)
5天前