大角咀日式餐厅 新推2小时啤酒+日本酒放题 (有片)
2019-10-30

饮酒无需搵原因,想饮咪饮罗。但如果真系要搵原因,大角咀有居酒屋新推出两小时啤酒、日本酒放题任饮,难得可以一次过任试超过成廿款酒,呢个原因够唔够强?

呢间居酒屋推出嘅「啤酒‧日本酒放题」,总共有三个放题级别选择,分别系梅($278/ 位)、竹($308/ 位)、松($338/ 位),每款放题都包送3款关东煮、1份先付同4串串烧!

最低级别嘅「梅」就啱晒锺意饮酒但又唔饮得太多太浓烈酒嘅朋友,特别系女生,因为呢级可以饮嘅,主要都系较为甜身啲嘅果酒或者梅酒。

粉红色嘅Strawberry & Lime果酒,4.5%酒精,非常爽口,而且清甜嘅士多啤梨味突出。人气果酒舩坂熟成梅子酒味道都几甜,而舩坂柚子兵卫则带有清新嘅柚香, 酸酸咪咪咁好易入口。

「竹」就喺「梅」嘅基本酒款以上,再加多咗7款日本清酒同吟酿。当中特别推介雪之茅舍山废本酿造,呢只酒酒体浓醇,米味香甜,如果温热饮仲有淡淡果香;贺茂鹤酒造一滴入魂纯米吟酿嘅米香同样丰富,而且呢只仲有啲微辛嘅感觉,余韵悠长,衬串烧食几夹。

至於自问系酒鬼嘅朋友,就当然要拣最高级嘅「松 」啦,除咗可以拣「竹」、「梅」嘅酒之外,仲有啲舖头新引入嘅清酒,其中一只就系带有哈密瓜果香嘅自言自语纯米吟酿。而且4个人嗌嘅话,成枱仲会额外送多支「獭祭三割九纯米大吟酿」或者「梵特撰纯米大吟酿」添呀!

至於附送嘅先付,食得辣嘅话韩酱青瓜系必然首选,佐酒一流。

串烧选择多多,净系鸡肉都可以拣要大葱鸡肉、梅子紫苏鸡肉、胡椒柚子鸡肉、山葵鸡肉定明太子鸡肉串,另外仲有 明太子玉子烧、烟肉露笋卷等,即叫即烧,相当香口惹味。

而餐厅本身就系主打关东煮,汤底烹煮5个钟以上,原汁原味,唔同食材仲有唔同酱料配搭。

东京大众酒场 
地址:大角咀利得街11号利奥坊地下G504号舖


文、相、片:Kar


关键字
大角咀
啤酒
清酒
放题
串烧
关东煮
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】便利店寻宝 每周新品速报
2019-12-30
荃湾新开无敌海景日式放题 占地过万尺 新张期间88折!
2020-01-03
【2019回顾】 过江龙之年 逾50间海外人气店登陆 + 2020年预告 (有片)
2019-12-30
【特约分享】新年去始创 食尽中、日、国际贺年佳肴
5天前
迎接全新2020 1-2月下午茶推介
2020-01-06