夏天咁熱，當然要搵啲清涼又滿足嘅下午茶嚟嘆吓啦！今次就為大家精選咗幾間充滿夏日感覺嘅下午茶推介，有薄荷朱古力主題、榴槤主題下午茶自助餐，又有夏日限定刨冰系列，食一啖即刻消暑，選擇咁多一定搵到心水之選！
仲夏薄荷朱古力之夢下午茶 樂聚廊 
薄朱迷注意！酒店以薄荷朱古力概念融入8款鹹甜點，喺炎炎夏日為大家帶嚟清新甜蜜滋味～薄荷朱古力慕絲蛋糕以光滑黑朱古力鏡面包裹薄荷朱古力慕絲同朱古力碎，口感層次豐富，甜而不膩；仲有薄荷朱古力脆筒注滿薄荷忌廉、薄荷朱古力脆脆同朱古力碎，風味最突出！另外法式薄荷士多啤梨泡芙同薄荷朱古力奶凍都畀人好refresh嘅感覺，就連下午茶不可或缺嘅經典英式鬆餅，都特別配製香滑嘅薄荷奶油忌廉同朱古力醬～鹹點方面，有魚油香氣嘅薄荷三文魚醬三文治、鹹香清新嘅忌廉芝士青瓜卷配薄荷茶啫喱；而薄荷鮮蝦撻配椰子菠蘿莎莎嘅蝦肉，特別用Cajun同薄荷調味再輕烤，係滿滿嘅熱帶風味。餐廳更送上薄荷脆脆黑朱古力(190g)畀惠顧呢款雙人下午茶嘅薄荷朱古力迷，好貼心呀！
供應時間: 即日起至另行通知，星期一至五下午3時至5時30分；星期六、日及公眾假期下午3時至5時30分
榴槤忘返周末下午茶自助餐 Yamm 
呢間酒店今個夏天重磅推出「品味大馬・榴槤美食文化薈」，喺餐廳打造咗一個榴槤迷天堂。成個下午茶自助餐有齊7款頂級榴槤，包括大家熟悉嘅貓山王、D24、黑刺，仲有罕見嘅松鼠王榴槤，果香濃郁，質地綿滑，真係食到唔捨得停口。除咗食榴槤，仲有6個以檳城街頭為設計靈感嘅即席烹調檔口，有鑊氣十足嘅炒粿條、香濃藥材味嘅肉骨茶、滑溜椰香白咖喱麵，仲有加入榴槤醬煮嘅巴丁魚，夠晒南洋風味。燒烤區亦係重點區域，用上秘製沙嗲醬，香辣惹味，尤其係配搭花生醬、香茅同柑橘，層次豐富。甜品方面，糕餅總廚炮製咗6款創意榴槤甜品，好似貓山王布甸、D24麻糬、金鳳榴槤抹茶泡芙、榴槤千層班戟，樣樣都咁吸引。
供應時間: 2025年7月15至17日晚上6時30分至10時
沁夏香莓下午茶 SAVVY
主打用多款時令新鮮莓果入饌，無論鹹點定甜點都充滿果香酸甜滋味。鹹點方面，包括香烤布里芝士餡餅，外層酥脆，內裡流心芝士好香濃，再配上自家製雜莓蜜餞，鹹甜平衡，口感豐富；金黃炸蟹鉗炸得香脆唔油膩，配搭清新微酸嘅雜莓果醬，海鮮嘅鮮味即時被提升。甜品一共有七款，全部都以莓果為靈魂，士多啤梨芝士蛋糕質地綿密，芝味濃厚，入口即融；迷你牛角包用上牛油香濃嘅酥皮，夾住滑溜忌廉芝士同酸甜平衡嘅雜莓果醬，一啖咬落多重口感。其他甜點包括紅桑子果凍、黑加侖馬卡龍或雜莓塔等，以唔同嘅做法將夏日莓果化成味蕾嘅小確幸，配埋一壺香氣撲鼻嘅花茶或者果茶簡直係絕配！
供應時間: 2025年7月1日至8月31日
Chocolate Rain主題下午茶 大堂茶座
今個夏天首度聯乘本地人氣藝術品牌Chocolate Rain，帶嚟一個充滿童趣同藝術感嘅主題下午茶，以「開箱驚喜」為概念，打開精緻木盒就有一系列鹹甜點等緊你發掘；配上色彩繽紛嘅插畫、特製陶瓷杯、貼紙同杯墊，睇得又食得，打卡一流！鹹點方面，有無花果開心果脆筒釀鴨肝醬，香滑鴨肝配上果仁同果香，口感豐富又有驚喜。甜品就包括清新又夢幻嘅椰子芒果芭菲，層層果香酸甜有致，仲有香氣十足嘅桃子蜂蜜蛋糕，軟熟鬆軟、甜而不膩。整個下午茶體驗充滿創意，每款甜點鹹點都融入Chocolate Rain嘅幻想風格，就連餐具都用上藝術陶瓷，絕對係夏日輕鬆嘆茶嘅玩味之選。
供應時間: 即日起至2025年8月31日，星期一至五：下午2:30至5:30分；星期六、日及公眾假期： 首輪用餐：下午1:30至4:00時 / 次輪用餐：下午4:15至6:00時
東京夏日の味下午茶 大堂酒廊
東京直送嘅東京夏日之味下午茶同夏日限定刨冰系列，無需飛日本都可以喺香港嘆到由東京香格里拉糕點副主廚Takashi Irishika精心設計嘅日系夏日美點，適合同朋友或者摯愛一齊慢慢嘆。鹹點方面，首推富士大西洋三文魚竹葉壽司，用上油脂豐富嘅三文魚包裹壽司飯，配上竹葉裝飾，賣相吸睛又清爽開胃。甜點方面，選用日本當造水果製作，包括山形白桃撻、靜岡蜜瓜蛋糕，果香四溢。沖繩百香果朱古力蛋糕甜中帶酸，仲有經典京都焙茶蛋糕同宮崎芒果楊枝甘露，款款都色香味俱全，滿足晒夏日少女心。同場加映夏日限定刨冰系列，絕對係打卡熱選！宇治抹茶紅豆刨冰用上濃郁宇治抹茶配綿密紅豆蓉，冰層如富士山積雪咁夢幻；愛文芒果開心果脆脆刨冰堆滿台灣愛文芒果果肉，加埋開心果脆脆，甜香又爽口。
供應時間: 2025年7月5日至8月31日下午3時至下午6時
夏逸菓香下午茶 Three on Canton
呢間喺炎炎夏日帶嚟夏逸菓香下午茶，用上多款清爽鮮果入饌，鹹甜點配搭新穎又有層次，啱晒鍾意輕盈口味嘅你。鹹點方面有幾款都非常有驚喜，如酥炸青口配荔枝莎莎、青口炸得香脆唔油膩，外脆內嫩，配上甜甜酸酸嘅荔枝莎莎，口感清新；薄荷果仁菲達芝士伴西瓜清甜多汁，加上鹹香菲達芝士，再配合香脆果仁同淡淡薄荷香，層次豐富。甜點就更加唔可以錯過，自家製嘅雪條用上當造水果，可能有芒果、奇異果、紅莓等，酸甜冰凍，一食就透心涼；熱情果班戟卷以軟綿班戟包住酸甜熱情果醬，好清新。
供應時間：星期一至五(公眾假期除外)下午3時至5時
文：Yanica、Cathy
編：Cathy
